22
1-2 Gɑri wee, yi yi kɑ Yerusɑlɛmun wɔwɑ yɑ̃ mi bɑ rɑ kɑ̃si.
Wunɛ Yerusɑlɛmu, mbɑn sɔ̃nɑ wunɛn tɔmbɑ nuku dobu mɔ̀,
mɑ bɑ kuuki mɔ̀.
Mbɑ n kuɑ bɑ kɑ yɔɔmɔ dii tɛɛri wɔllɔ.
Wunɛn tɔn be bɑ mɛɛrɑ kuɑ, bɑ ǹ bu mɛɛrɑ kue tɑbu sɔɔ,
bɑ ǹ mɑɑ ɡu kɑ tɑkobi.
3 Wee wunɛn tɑbu sinɑmbu kɑ wunɛn tɔmbu kpuro
bɑ duki yɑrinɑ n tomɑ,
mɑ tɛn towobu bɑ bu mwɛɛrɑ bɑ kuɑ yobu.
4 Yen sɔ̃, nɑ bɛɛ sɔ̃ɔmɔ, i ɡɛsiro nɛn bɔkun di,
i mɑn derio n swĩ.
I ku tii nɔwiɑ ko i nɛɛ,
i ko i mɑn nukuru yɛmiɑsiɑ
nɛn tɔmbun nɔni swɑ̃ɑrun sɔ̃.
5 Tɔ̃ɔ teni sɔɔ, Gusunɔ, wɔllu kɑ tem Yinni
u derɑ sɑ nɔni sɔ̃ɔre, sɑ burisinɛ,
sɑ wɑ̃ɑ biti sɔɔ wɔwɑ yeni sɔɔ mi bɑ rɑ kɑ̃si.
Bɑ ɡɑni kɔsukumɔ mɑ sɑ nɔɔɡiru sue
sɑ fɑɑbɑ kɑnɑmɔ ɡuunun berɑ ɡiɑ.
6 Elɑmun tɑbu kowobu bɑ wee
bɑ wɑ̃ɑ tɑbu kɛkɛbɑ sɔɔ kɑ mɑɑsɔbu,
mɑ bɑ sɛ̃ɛ bwɑ̃ɑnu bɛki.
Kiriɡibu bɑ mɑɑ wee, bɑ tɛrɛnu nɛni.
7 Wunɛ Yerusɑlɛmu, wee tɑbu kɛkɛbɑ bɑ tɛrie
wunɛn wɔwi sɔɔ mi tem ɡem wɑ̃ɑ.
Mɑ mɑɑsɔbu bɑ wunɛn ɡbɑ̃rɑ kɔnnɔsu tɑrusi.
8 Bɛɛ Yudɑbɑ i ǹ mɑɑ tɑ̃si yeru mɔ.
Tɔ̃ɔ te, i mɛɛrɑ mi i rɑ bɛɛn tɑbu yɑ̃nu bere
dii te bɑ mɔ̀ Dɑ̃ɑ sɔ̃ɔwɔ.
9-10 Mɑ i deemɑ bɑ bɛɛn wuu Yerusɑlɛmun ɡbɑ̃rɑru yɑburɑ.
Yerɑ i diɑ mɛɛrɑ mɛɛrɑ i kɔsukɑ
i kɑ ɡbɑ̃rɑ te sɔnwɑ.
Mɑ i nim torɑ ye bɑ rɑɑ ɡbɑn nim yɔ̃rɑsiɑ wuu sɔɔ.
11 I kpɑɑ ɡbɑ ɡbɑ̃rɑnu yirun bɑɑ sɔɔ
yu kɑ yeɔnɔn nim nɛnɛ.
Adɑmɑ i ǹ Gusunɔ mɛɛrɑ
wi u yen himbɑ yi yellun di.
12 Yen sɔ̃nɑ tɔ̃ɔ teni sɔɔ,
Gusunɔ, wɔllu kɑ tem Yinni, u bɛɛ sokɑ i kɑ swĩ,
kpɑ i weeweenu ko i bɛɛn winu kɔni,
kpɑ i sɑɑkibɑ dewe nuku sɑnkirɑnun sɔ̃.
13 Adɑmɑ wee i nuku dobu mɔ̀ i yɛ̃ɛrimɔ.
I kɛtɛbɑ kɑ yɑ̃ɑnu ɡoomɔ.
I yɑɑ temmɔ mɑ i tɑm nɔrumɔ i mɔ̀,
su di kpɑ su nɔ, domi siɑ sɑ ko ɡbi.
14 Yen sɔ̃nɑ Gusunɔ, wɔllu kɑ tem Yinni
u mɑn sɔ̃ɔwɑ u nɛɛ,
u ǹ bɛɛ bɛɛn durum yeni wɔkɑmmɛ
sere i kɑ ɡbi.
Bɑ Sebinɑ kirɔ mɔ̀
15 Amɛniwɑ Gusunɔ, wɔllu kɑ tem Yinni, u mɑn sɔ̃ɔwɑ. U nɛɛ, n doo n Sebinɑ wi u sɑ̃ɑ sinɑ kpɑɑrun sɔm kowobun wiruɡii sɔ̃ n nɛɛ,
16 mbɑ u mɔ̀ mi.
Wɑrɑ u mɔ mi u kɑ tii siki wɔru dɑ̃kuɑmmɛ kperɔ.
17 Wee wi, Yinni Gusunɔ u koo nùn bɔke nɡe kureru
kpɑ u nùn kɑsɑ kɔ̃ kɑ dɑm,
18 kpɑ u n bindimɔ nɡe bɑnɔ bɑtumɑ bɑkɑ sɔɔ.
Miyɑ u koo ɡbi kɑ win tɑbu kɛkɛ sisuɡii yi u nɑɑnɛ sɑ̃ɑ,
wi, wi u win yinnin yɛnu sekuru doke.
19 Wi, Yinni Gusunɔ, u koo nùn yɑrɑ win sɔmburun di
kpɑ u kun mɑɑ sɑ̃ɑ ɡoo.
20 Yen tɔ̃ɔ te, wi Yinni Gusunɔ,
u koo win sɔm kowo Eliɑkimu, Hilikiyɑn bii soku,
21 kpɑ u nùn wi, Sebinɑn yɑberu sebusiɑ
kpɑ u nùn win kpɑkɑ sɛ̃ke
kpɑ u nùn win dɑm wɛ̃.
Eliɑkimu wi, u ko n sɑ̃ɑwɑ Yerusɑlɛmuɡibu kɑ Yudɑbɑn bɑɑbɑ.
22 Yinni Gusunɔ u koo nùn Dɑfidin yɛnun kɔkɔrɔ wɛ̃.
Ù n kɛniɑ, ɡoo kun kɛnumɔ.
Ù n mɑɑ kɛnuɑ, ɡoo kun kɛniɑmɔ.
23 U koo nùn ɡirɑwɑ nɡe sɑsɑru
mi n nɑɑnɛ mɔ,
kpɑ u de win tundon yɛnu ɡɑ n bɛɛrɛ mɔ.
24 U ko n sɑ̃ɑwɑ bɛɛrɛ yen wiru. Be bɑ wɑ̃ɑ win yɛnuɔ, bukurobu kɑ bibu, ɡobiɡibu kɑ sɑ̃ɑrobu, wiyɑ u ko n be kpuro sɔɔwɑ nɡe sɑsɑru.
25 Adɑmɑ Gusunɔ, wɔllu kɑ tem Yinni, u mɑɑ nɛɛ, sɔ̃ɔ teeru bɑ koo sɑsɑ te wukɑ te bɑ rɑɑ ɡirɑ mi n nɑɑnɛ mɔ mi, kpɑ tu wɔrumɑ tu bɔɔrɑ, kpɑ sɔmu ni tɑ rɑɑ sɔɔwɑ mi, nu kɑm ko. Yinni Gusunɔwɑ u yeni ɡeruɑ.
Yinni Gusunɔ u koo Tiri
kɑ Sidoni kpeerɑsiɑ