25
1 Yinni Gusunɔ, wunɑ ɑ sɑ̃ɑ nɛn Yinni,
wunɑ kon tɔmɑ,
kpɑ n wunɛn yĩsiru wɔlle suɑ.
Domi ɑ ɡɑ̃ɑ bɑkɑnu kuɑ,
wunɛn himbɑ ye ɑ yi sɑɑ yellun di,
yɑ ǹ kɔsɑ.
2 A derɑ wuu ɡe, ɡɑ wɔrumɑ
ɡɑ kuɑ nɡe kpee ni bɑ subɑ.
Mɑ wuu ɡe ɡɑ ɡbɑ̃rɑru mɔ ɡɑ kuɑ bɑnsu.
A derɑ tii suobun wuun ɡbɑ̃rɑnu nu wɔrukɑ.
Bɑ ǹ mɑɑ nu seeyɑmɔ sere kɑ bɑɑdommɑɔ.
3 Yen sɔ̃nɑ bwese dɑmɡinu nu nun bɛɛrɛ wɛ̃ɛmɔ.
Mɑ be bɑ ɡɑbu dɑm dɔremɔ bɑ nun nɑsie.
4 Domi ɑ kuɑ dɑm sɑriruɡibu kɑ wɔnwɔndobun kuku yeru, wɑhɑlɑn sɑɑ.
A bu beruɑ woo bɔkɔn sɑɑ kɑ sɔ̃ɔn sɑɑ.
Domi tɔn kɔ̃sobu bɑ rɑ tɔnu wɔriwɑ
nɡe ɡuru woo ɡe ɡɑ ɡɑnɑ sweemɔ.
5 Yinni Gusunɔ, wunɑ ɑ tii suobun wɔkinu kpeerɑsiɑ
nɡe mɛ ɑ rɑ yɑm susuru kpeerɑsie
tem mi ɡɑ̃ɑnu ku rɑ kpi.
Wunɑ ɑ ben nɑsɑrɑn womusu tɛɛsi
nɡe mɛ ɡuru wiru tɑ rɑ sɔ̃ɔ tɛɛsi.
Yinni Gusunɔ u tɔmbu kpuro
tɔ̃ɔ bɑkɑ dim sɔɔru kuɑmmɛ
6 Gusunɔ, wɔllu kɑ tem Yinni
u koo bwesenu kpuro tɔ̃ɔ bɑkɑ dim soku, Siɔnin ɡuurɔ.
Dĩɑ duronu kɑ yɑɑ ɡumɡiɑ
kɑ tɑm ɡemɑ u koo bu wɛ̃.
7 Kpɑ u sɔnditiɑ ye bɑ ben wuswɑɑ wukiri nuku sɑnkirɑnun sɔ̃ wunɑ ɡuu ten wɔllu mi.
8 U koo de ɡɔɔ u kpe sere kɑ bɑɑdommɑɔ,
kpɑ u ben nɔni yĩresu wokɑ
kpɑ u ben sekuru wunɑ tem mɛ kpuro sɔɔ.
Wi, Yinni Gusunɔwɑ, u yeni ɡeruɑ.
Yinni Gusunɔ
u koo Mɔɑbubɑ sɛɛyɑsiɑ
9 Tɔ̃ɔ te sɔɔ, bɑ koo Yinni Gusunɔ sɔ̃ bu nɛɛ,
wunɑ ɑ sɑ̃ɑ bɛsɛn Yinni wi sɑ nɑɑnɛ sɑ̃ɑ.
Wunɑ ɑ sun fɑɑbɑ kuɑ.
Su nuku dobu ko kpɑ su yɛ̃ɛri fɑɑbɑ yen sɔ̃.
10 Yinni Gusunɔ u koo Siɔnin ɡuuru kɔ̃su.
Adɑmɑ u koo Mɔɑbubɑ munkuwɑ
nɡe yɑkɑ si bɑ yɑri kɔkɔrɔwɔ.
11 Kpɑ bu ben nɔmɑ dɛmiɑ kɔkɔrɔ ɡe sɔɔ
nɡe be bɑ kɛ̃ɛrimɔ.
Kɑ mɛ, u koo de ben tii suɑ bi, bu kpewɑ.
12 U koo ɡbɑ̃rɑ dɑmɡii ni nu ɡunu surɑ u kɔsuku
nu ɡɔsiɑ tuɑ.
Yinni Gusunɔ
u koo win tɔmbu nɑsɑrɑ wɛ̃