27
1 Tɔ̃ɔ te sɔɔ, Yinni Gusunɔ u koo wɑɑ kɔ̃sɑ ye yɑ dukɑ mɔ sɛɛyɑsiɑ kɑ win tɑkobi dɑmɡiɑ ye yɑ kpɑ̃, kpɑ u yɑɑ kɔ̃sɑ ye ɡo, ye yɑ wɑ̃ɑ nim wɔ̃ku sɔɔ.
Yinni Gusunɔ
kɑ win resɛm ɡbɑɑru
2 Yen tɔ̃ɔ te, Yinni Gusunɔ u koo womu ko
win resɛm ɡbɑɑrun sɔ̃, te tɑ bii ɡeenu mɑrumɔ, u nɛɛ,
3 nɛ, Yinni Gusunɔwɑ nɑ tu nɔɔrimɔ.
Nɛnɑ nɑ tu nim yɛ̃kɑmɔ sɑɑ kpuro.
Nɑ tu kɔ̃su sɔ̃ɔ sɔɔ kɑ wɔ̃kuru,
ɡoo u ku rɑɑ kɑ tu wɔri u mwɑ.
4 Nɑ ǹ mɑɑ kɑ nɛn resɛm ɡbɑɑ te mɔru sɑ̃ɑ.
Adɑmɑ nɑ̀ n sɑ̃ki kɑ ɑwĩi wɑ mi,
kon yi wɔriwɑ n dɔ̃ɔ mɛni,
5 mɑ n kun mɔ yi mɑn kuɑ yin kuku yeru,
mɑ yi kɑ mɑn nɔɔ tiɑ kuɑ.
Yì n kuɑ mɛ, kon yi deri.
Yinni Gusunɔ
u koo Isirelibɑ suuru kuɑ
6 Sɑɑ ɡɑɑ sisi yè sɔɔ
Isirelibɑ bɑ koo ɡbini ɡirɑ
bu kɛri ko nɡe dɑ̃ɑ,
bu wɛ̃su ko bu mɑ
kpɑ ben binu nu hɑnduniɑ yibu.
7 Yinni Gusunɔ u ǹ bu sɛɛyɑsie
nɡe mɛ u ben yibɛrɛbɑ sɛɛyɑsiɑ.
U ǹ mɑɑ bu ɡo nɡe mɛ u ben yibɛrɛbɑ ɡo.
8 U bu sɛɛyɑsiɑwɑ sɑkɑ sɔɔ.
U derɑ yibɛrɛbɑ bɑ nɑ
nɡe sɔ̃ɔ yɑri yerun woo dɑmɡuu,
bɑ bu ɡurɑ bɑ kɑ doonɑ.
9 Nɡe mɛyɑ u kɑ Isirelibɑn durum wɔkɑ.
Wee ye n koorɑ yen biru.
U ben bũu turɑnu ɡɔsiɑ torom.
Bɑ ǹ mɑɑ Asitɑɑten bwɑ̃ɑrokunu kɑ sɔ̃ɔɡinu seeyɑmɔ.
10 Ben wuu dɑmɡuu ɡe,
ɡɑ kuɑ bɑnsu, bɑ ɡu deri.
Miyɑ n kuɑ yɑɑ sɑbenun kpɑrɑ yeru
kɑ nin kpin yeru.
Mɑ nu kiku si su tiɑrɑ dimɔ.
11 Dɑ̃ɑ yɑ̀ n ɡberɑ bɑ rɑ ye bɔɔriwɑ
kpɑ tɔn kurɔbu bu kɑ doo ko.
Wee nɛn tɔn be, bɑ ǹ bwisi mɔ.
Yen sɔ̃nɑ Yinni Gusunɔ wi u bu tɑkɑ kuɑ
u ǹ bu wɔnwɔndu kue,
u ǹ mɑɑ bu durom kue.
Be bɑ rɑɑ yoru mwɛɛrɑ
bɑ koo wurɑmɑ
12 Sɑɑ ɡɑɑ sisi yè sɔɔ Yinni Gusunɔ u koo bɛɛ Isirelibɑ sirɑ nɡe dɑ̃ru,
kpɑ bu bɛɛ dɔbiri tiɑ tiɑ
sɑɑ Efɑrɑtin dɑɑrun di n kɑ ɡirɑri Eɡibitin dɑɑrɔ.
13 Yen tɔ̃ɔ te, bɑ koo kɔbi bɑkɑ so
kpɑ be bɑ rɑɑ yoru mwɛɛrɑ bɑ woo Asiriɔ
kɑ be bɑ kpikiru dɑ Eɡibitiɔ bu wurɑmɑ.
Kpɑ bu yiirɑ bu Yinni Gusunɔ sɑ̃
ɡuu dɛɛrɑ ten mi, Yerusɑlɛmuɔ.
Bɑ Isirelibɑn bwese kɛri
wɔku te kirɔ mɔ̀