3
1 Esɑi u nɛɛ,
Gusunɔ, wɔllu kɑ tem Yinni,
u koo Yerusɑlɛmuɡibu kɑ Yudɑbɑ kpuron ɑrumɑni kpeerɑsiɑ.
Bɑ ǹ mɑɑ dĩɑnu kɑ nim wɑsi.
Bɑ ǹ mɑɑ somiru ɡɑru wɑsi ɡɑm di.
2-3 Domi u koo ben tɑbu durɔ dɑmɡibu
kɑ ben tɑbu kowobu wunɑ u ɡo,
kɑ ben siri kowobu kɑ ben sɔrobu kɑ ɡuro ɡurobu
kɑ be bɑ sɑ̃ɑ tɑbu kowobu weerɑɑkuukuubun wiruɡibu
kɑ ben sinɑ ɑsɑkpɔbu kɑ ben bwisi kɛ̃ɔbu
kɑ ben nɔmɑn sɔm kowo kpokobɑ kɑ ben timɡii ɡisonkobɑ
kɑ mɑm wi, Gusunɔn sɔmɔbun tii.
4 U koo de ɑluwɑɑsibɑ bɑ n bu kpɑre
nɡe mɛ bɑ kɑ kĩ.
5 Tɔmbɑ koo dɑm dɔrenɑ.
Aluwɑɑsibɑ bɑ koo durɔ tɔkɔnu seesi,
kpɑ ɡɑru ko sɑribɑ bu dɑmɡibu nɔni du.
6 Sɑɑ ye sɔɔ, tɔnu u koo win wɔnɔ sɛ̃re u nɛɛ,
wunɛ ɑ yɑ̃nu mɔ.
Yen sɔ̃, ɑ koowo bɛsɛn yɛnu yɛ̃ro,
kpɑ ɑ bɛsɛn yɛnu seeyɑ.
7 Adɑmɑ u koo nùn wisi u nɛɛ,
nɑ ǹ yen tim mɔ.
Dĩɑnu sɑri yɛnu ɡe sɔɔ,
yɑ̃nu mɑɑ sɑri mi.
A ku mɑn ko bɛɛn yɛnu yɛ̃ro.
8 Esɑi u mɑɑ nɛɛ,
Yerusɑlɛmu yɑ bɑ̃ɑrimɔ,
mɑ Yudɑ yɑ wɔrukumɔ
yèn sɔ̃ bɑ Yinni Gusunɔ seesi
kɑ ben ɡɑri kɑ ben kookoosu.
Bɑ ǹ win bɛrum mɔ.
9 Ben kookoosu su ben dɑɑn seedɑ dimɔ.
Ben dɑɑ kɔ̃sɑ kun beruɑ.
Bɑ ye mɔ̀ bɑtumɑ sɔɔ nɡe Sodomuɡibu.
Bɔ̃rurobɑ bɑ sɑ̃ɑ,
domi bɔ̃riyɑ bɑ tii sɔɔru kuɑmmɛ mi.
10 A ɡemɡii sɔ̃ɔwɔ mɑ u koo kuurɑ.
U koo win sɔmburun ɑre wɑ.
11 Adɑmɑ bɔ̃rurowɑ wi u nuku kɔ̃suru mɔ.
U ko n wɑ̃ɑwɑ nuku sɑnkirɑnu sɔɔ,
domi win sɔmburun ɑreyɑ u koo wɑ.
12 Aluwɑɑsibɑ bɑ Yinni Gusunɔn tɔmbu dɑm dɔremɔ.
Mɑ tɔn kurɔbu bɑ sɑ̃ɑ ben yinnibu.
Be bɑ bu kpɑre bɑ bu torɑsiɑmɔ.
Bɑ ben swɑɑ ɡo ye bɑ rɑɑ swĩi.
Yinni Gusunɔ
u win tɔmbun wiruɡibu sirimɔ
13 Yinni Gusunɔ u nɑ u yɔ̃ u kɑ win tɔmbu siri.
14 U win siribu toruɑ kɑ win tɔmbun ɡuro ɡurobu,
kɑ ben wiruɡibu.
U nɛɛ, i tɔmbun dĩɑnu wɔrɑ
mɑ i ye i sɑ̃ɑrobu mwɑɑri yii bɛɛn yɛnusɔ.
15 Mbɑn sɔ̃nɑ i nɛn tɔmbu dɑm dɔremɔ,
mɑ i sɑ̃ɑrobu tɑki dimɔ.
Nɛ, Yinni Gusunɔ, wɔllu kɑ tem Yinniwɑ nɑ yeni bikiɑmɔ.
Bɑ koo Yerusɑlɛmun
tɔn kurɔbu sɛɛyɑsiɑ
16 Yinni Gusunɔ u mɑɑ nɛɛ,
wee Yerusɑlɛmun tɔn kurɔbu bɑ tii sue.
Mɑ bɑ sĩimɔ bɑ yɛ̃kɔ mɔ̀, bɑ wĩinu dɛmiɛ.
Bɑ ǹ sekuru mɔ, bɑ ben nɑɑsun sumi soonɑmɔ.
17 Yen sɔ̃nɑ kon de bu ko wii kpɑrɑnuɡibu,
kpɑ n bu terenu yɔ̃su.
18 Sɑɑ ye sɔɔ, kon ben burɑ yɑ̃nu kpuro wunɑ. Niyɑ ben nɑɑsun sumi kɑ ben serin burɑ yɑ̃nu kɑ ben sɑbɑbɑ yi yi kɑ suru kɛ̃kɑ weenɛ,
19 kɑ ben swɑɑ tonkunu, kɑ ben sumi kɑ ben sɔnditii,
20 kɑ yɑsi, kɑ yɔni yi bɑ doke nɑɑsɔ kɑ ben sɛ̃kɑtii, kɑ ben yɔrɔmɑnnin bɔki,
21 kɑ ben tɑɑbu nɔmɑɡinu kɑ wɛ̃ruɡinu,
22 kɑ ben yɑ̃ɑ ɡobiɡinu, kɑ yɑbe bɑkɑnu kɑ ben bɔɔnu,
23 kɑ diɡibɑ, kɑ yɑ̃ɑ ni nu ǹ sinum mɔ, kɑ yɑsi, kɑ sere sɔnditii.
24 Bɑ ǹ mɑɑ turɑren nuburu nɔɔmɔ
mɑ n kun mɔ nubu kɔ̃suru.
Bɑ ǹ mɑɑ sɛ̃kɑtii sɛ̃kemɔ mɑ n kun mɔ wɛ̃ɛ.
Bɑ ǹ mɑɑ seri wɑsi wirɔ bu tɑri.
Wii pɔnnɑ bɑ ko n mɔ.
Bɑ ǹ mɑɑ yɑbe bɑkɑnu sebumɔ
sere sɑɑkibɑ nuku sɑnkirɑnun sɔ̃.
Ben burɑm kun mɑɑ sɔ̃ɔsirɑmɔ.
Sekurɑ bɑ koo wɑ.
Yerusɑlɛmun ɡɔminibu
25 Bɑ koo Yerusɑlɛmun tɔmbu kɑ yen tɑbu durɔbu ɡo tɑbu sɔɔ.
26 Tɔmbɑ koo wuri ko bu ɡɔɔ swĩ yen ɡbɑ̃rɑ kɔnnɔwɔ
nɡe tɔn kurɔ wi bɑ wɔri bɑ win yɑ̃nu ɡurɑ mɑ u sɔ̃ temɔ.