33
1 Bɔ̃rurobɑ bɛɛ, bɛsɛn yibɛrɛbɑ.
Domi i tɔmbu wɔri i ben yɑ̃nu ɡurɑ
mɑ i kɑ bu murɑfitiru kuɑ,
bɑɑ mɛ bɑ ǹ bɛɛ yen ɡɑɑ kuɑre.
Yen sɔ̃, ì n tɔmbu wɔri i kpɑ,
i ben yɑ̃nu ɡurɑ,
bɑ koo mɑɑ bɛɛ kuɑ nɡe mɛ.
Mɛyɑ sɑɑ ye i bu murɑfitiru kuɑ i kpɑ,
bɑ koo mɑɑ bɛɛ murɑfitiru kuɑ.
2 Yinni Gusunɔ, ɑ bɛsɛn wɔnwɔndu wɑɑwo,
wunɑ sɑ yĩiyɔ.
A de ɑ n sɑ̃ɑ bɛsɛn dɑm bururu bɑɑtere.
Kpɑ ɑ sun fɑɑbɑ ko sɑnɑm mɛ sɑ wɑ̃ɑ nɔni swɑ̃ɑru sɔɔ.
3 Yibɛrɛbɑ bɑ̀ n wunɛn nɔɔ dɑmɡuu nuɑ,
bɑ koo duki yɑkikirɑ.
À n mɑɑ seewɑ bɑ koo yɑrinɑ.
4 Tɔmbɑ koo ben yɑ̃nu wɔri bu ɡurɑ
nɡe mɛ twee yi rɑ tem wukiri
yi dĩɑnu kpuro di.
5 Yinni Gusunɔ u kpɑ̃,
domi u wɑ̃ɑ wɔllɔ.
U koo de win ɡem mu n yibɑ Siɔni kpuro sɔɔ.
6 Yinni Gusunɔ, kɑɑ de
Siɔniɡibu bɑ n wɑ̃ɑ bɔri yɛndu sɔɔ,
kpɑ bɑ n bwisi kɑ lɑɑkɑri mɔ
ye yɑ koo de bu fɑɑbɑ wɑ.
Wunɛn nɑsiɑrɑ tɑ sɑ̃ɑ ben ɑrumɑni.
Bɑ fɑɑbɑ kɑnɑmɔ
7 Adɑmɑ tɛ̃, wee tɑbu durɔbu bɑ kuuki mɔ̀,
bɑ fɑɑbɑ kɑnɑmɔ.
Be bɑ ɡɔrɑ bu kɑ yibɛrɛbɑ suuru kɑnɑ bu nɔɔ tiɑ ko
bɑ kpɑnɑ, bɑ wuri mɔ̀.
8 Tɔmbu bɑ ku rɑ mɑɑ sĩ swɛɛ sɔɔ.
Domi yibɛrɛbɑ bɑ ben ɑrukɑwɑni kusiɑ.
Bɑ ǹ mɑɑ ben seedɑɡibu yɛ̃.
Bɑ ǹ mɑɑ ɡoon bɛɛrɛ yɛ̃.
9 Wee tɔmbu bɑ ben ɡbeɑ deri.
Libɑnin dɑ̃ɑ sɔ̃su su ɡberɑmɔ.
Mɑ Sɑronin tem ɡem mu kuɑ yɑni sɛɛri.
Bɑsɑnin berɑ ɡiɑ kɑ ɡuu te bɑ mɔ̀ Kɑɑmɛliɔ
dɑ̃nun wurusu dɛllɑmɔ.
10 Yinni Gusunɔ u bwese tukunu
sɔ̃ɔwɑ u nɛɛ,
yen sɔ̃ tɛ̃, kon se n yɔ̃rɑ,
kpɑ n sɔ̃ɔsi nɡe mɛ nɑ kpɑ̃ɑru nɛ.
11 Domi bɛɛn bwisikunu nu sɑ̃ɑwɑ
nɡe yɑkɑ bii yi bɑ duurɑ.
Nù n koorɑ, nu koo kɑm kowɑ nɡe yɑkɑ si.
Nɛn wɛ̃siɑru tɑ ko n sɑ̃ɑwɑ nɡe dɔ̃ɔ wi u koo bɛɛ mwɑ,
12 kpɑ i ɡɔsirɑ nɡe kuku ni bɑ dɔ̃ɔ mɛni,
ǹ kun mɛ nɡe sɑ̃ki yi bɑ bɔɔrɑ bɑ dɔ̃ɔ doke.
13 Bɛɛ be i tomɑ kɑ bɛɛ be i wɑ̃ɑ turuku,
i swɑɑ dɑkio i nɔ ye nɑ kuɑ,
kpɑ i ɡiɑ nɡe mɛ nɛn dɑm mu nɛ.
14 Durumɡibɑ nɑndɑ Siɔniɔ.
Be bɑ ǹ Yinni Gusunɔn bɛɛrɛ yɛ̃ bɑ diirimɔ bɑ mɔ̀,
Yinni Gusunɔ u sɑ̃ɑwɑ nɡe dɔ̃ɔ yɑri bɑkɑ ye yɑ ku rɑ ɡbi.
Wɑrɑ u koo kpĩ u yɔ̃rɑ win wuswɑɑɔ,
15 mɑ n kun mɔ wi u sĩimɔ ɡem sɔɔ,
mɑ u ku rɑ bwɛ̃ɛbwɛ̃ɛ tɑki di,
u ku rɑ mɑɑ nɔm birɑn kɛ̃ru mwɛ,
u ku rɑ tɔn ɡowobun ɡɑri swɑɑ dɑki,
u ku rɑ mɑɑ kɑ̃ u kɔ̃sɑ mɛɛri.
16 Tɔnu win bweserɑ ko n wɑ̃ɑwɑ nɑndɑbu sɑri
nɡe wi u kukuɑ kpee bɑɑ sɔɔ.
U koo mɑɑ wɑ u di, u nɔ.
Bɑ koo Yerusɑlɛmu wɔrɑ
17 Sɔ̃ɔ teeru, kɑɑ sinɑ boko wɑ
u wɑ̃ɑ win yiikon ɡirimɑ sɔɔ,
u bɑndu dii tem bɑkɑm sɔɔ.
18 Kɑɑ wunɛn yellun bɛrum yɑɑyɑ
mɛ ɑ rɑɑ mɔ sɑɑ ye ɑ wɑ̃ɑ yoru sɔɔ,
kpɑ ɑ nɛɛ, mɑnɑ ɡbere mwɑɔbu bɑ wɑ̃ɑ.
Mɑnɑ wɔ̃ɔ ɡobiɡibu bɑ wɑ̃ɑ.
Mɑnɑ ɡbɑ̃rɑrun kɔ̃sobu bɑ wɑ̃ɑ.
19 A ǹ mɑɑ tɔn tuko be bɑ tii sue mi wɑsi,
be, bèn bɑrum ɑ ǹ nɔɔmɔ.
20 A Yerusɑlɛmu mɛɛrio
mi sɑ rɑ bɛsɛn tɔ̃ɔ bɑkɑnu ko.
Kɑɑ ye wɑ yɑ wɑ̃ɑ bɔri yɛndu sɔɔ.
Yɑ ko n sɑ̃ɑwɑ nɡe kuu bekuruɡiru
tèn dɑ̃nu bɑ ǹ mɑɑ wukɑmɔ.
Mɛyɑ bɑ ǹ mɑɑ ten wɛ̃ɛ kusiɑmɔ.
21 Miyɑ Yinni Gusunɔ u koo sun win ɡirimɑ sɔ̃ɔsi.
U koo de sɑ n wɑ̃ɑ dɑɑ bɑkɑnun bɔkuɔ.
Adɑmɑ yibɛrɛbɑn ɡoo nimkusu ku ǹ kpɛ̃ su sĩ mi,
bɑɑ si su kpɑ̃ɑru bo.
22-23 Wee, sin wɛ̃ɛ yi koo kɑsikirɑ,
kpɑ yi kun mɑɑ sin bekɑ nɛni ɡberebɑ sɔɔ
woo ɡu kɑ su bɔriɑ.
Yerɑ n koo de bu bu dukiɑ bɑkɑ ɡurɑri.
Bɑɑ kɑ yɛmɔbɔ bɑ koo dɑ mi,
bu kɑ yɑ̃ɑ ni ɡurɑ.
Yinni Gusunɔwɑ u ko n sɑ̃ɑ bɛsɛn siri kowo,
kpɑ u sun woodɑ wɛ̃.
Wiyɑ u ko n sɑ̃ɑ bɛsɛn sinɑ boko.
Kpɑ u sun fɑɑbɑ ko.
24 Goo kun mɑɑ ɡerumɔ u nɛɛ,
u bɑrɔwɑ.
Yinni Gusunɔ u koo Yerusɑlɛmuɡibu ben durum wɔkɑ.
Yinni Gusunɔ u koo Edɔmubɑ
sɛɛyɑsiɑ