40
1 Yinni Gusunɔ u nɛɛ,
i nɛn tɔmbu nukuru yɛmiɑsio.
2 I Yerusɑlɛmuɡibu nukuru yɛmiɑsio,
i nɛɛ, ben yorɑ kpɑ.
Domi nɑ bu ben ɡɔbɑ ye bɑ kuɑ kpuron ɑre wɛ̃.
Nɑ bu sɛɛyɑsiɑ ben durum ye bɑ kuɑ kpuron sɔ̃.
3 Wee ɡoo u ɡbɑ̃rɑmɔ u mɔ̀,
i Yinni Gusunɔ swɑɑ yɑbo ɡbɑburɔ,
kpɑ i ye nɔɔ nɛrɑsiɑ.
4 I yen wɔwɑ kpuro kɔruo yu nɔɔ nɛrɑ.
I mɑɑ yen ɡuunun ɡunum kɑwo,
kpɑ i yen ɡunɡunu nɔɔ nɛrɑsiɑ
nu ko nɡe tem tɛɛrɑ kpɑ swɛɛ yi dɛndɑ.
5 Sɑɑ yerɑ Yinni Gusunɔ u koo win yiiko sɔ̃ɔsi,
kpɑ tɔmbu kpuro bu ye wɑ sɑnnu.
Yinni Gusunɔn tiiwɑ u ɡeruɑ mɛ.
6 Yen biru nɑ ɡoon nɔɔ nuɑ
ɡɑ nɛɛ, ɑ kpɑro.
Mɑ nɑ bikiɑ nɑ nɛɛ,
mbɑ kon kpɑrɑ.
U nɛɛ, ɑ kpɑro
mɑ tɔmbu kpuro bɑ sɑ̃ɑwɑ nɡe yɑkɑsu,
mɑ ben burɑru tɑ sɑ̃ɑ nɡe dɑ̃ɑ wɛ̃su.
7 Yinni Gusunɔ ù n derɑ
woo ɡɑ yɑkɑsu swee,
su rɑ ɡberewɑ, kpɑ sin wɛ̃su su dɛllɑ.
Kɑ ɡem tɔmbu bɑ sɑ̃ɑwɑ nɡe yɑkɑsu.
8 Yɑkɑsu rɑ ɡbere kpɑ sin wɛ̃su dɛllɑ.
Adɑmɑ Yinni Gusunɔn ɡɑri yi ko n wɑ̃ɑwɑ
sere kɑ bɑɑdommɑɔ.
Lɑbɑɑri ɡeɑ ye bɑ koo kpɑrɑ
9 Yerusɑlɛmuɡibu, i yɔɔwo ɡuu te tɑ ɡunun wɔllɔ,
i nɔɔɡiru suɑ kɑ dɑm i lɑbɑɑri ɡeɑ kpɑrɑ.
I ku bɛrum ko.
I Yudɑbɑn wusun tɔmbu sɔ̃ɔwɔ i nɛɛ,
Gusunɔ ben Yinni u wee.
10 U wee kɑ dɑm u woodɑ wɛ̃ɛmɔ.
U win tɔn be u yɑkiɑmɑ kpɑre win wuswɑɑɔ.
11 U koo bu kpɑrɑwɑ
nɡe mɛ yɑ̃ɑ kpɑro u rɑ ko,
u n binu wuuwɑ,
u n kɑ nin mɛrobu kpɑre.
Gusunɔn bwisi
12 Wɑrɑ u koo kpĩ u nim wɔ̃kun nim
kɑ win nɔm wɔɔru sɑkɑ ko.
Wɑrɑ u koo kpĩ u kɑ win niki binu wɔllu yĩire.
Wɑrɑ u koo kpĩ u tem tuɑ kpuro ɡure nɔrɑ sɔɔ.
Wɑrɑ u koo kpĩ u ɡuunu kilo sɔndi.
13 Wɑrɑ u Gusunɔn bwisikunu yɛ̃.
Wɑrɑ u nùn bwisi kɛ̃ɛre.
14 Wɑrɑ u kɑ nùn wesiɑnɔ koore,
mɑ yɛ̃ro u nùn bwisi kɑ̃.
Nɡe wɑrɑ u nùn ɡem kɑ bwisi
kɑ lɑɑkɑrin swɑɑ sɔ̃ɔsire.
15 Win mi, bwesenu kpuro nu sɑ̃ɑwɑ piiminu
nɡe nim burɑ ye yɑ dɑ̃ɑre kotoru sɔɔ.
Nu sɑ̃ɑwɑ nɡe kpee tɑnɑ ye yɑ wɑ̃ɑ kilo wɔllɔ,
ǹ kun mɛ nɡe tuɑ ye woo ɡɑ kɑ doonɑmɔ.
16 Yɛɛ yi yi wɑ̃ɑ Libɑnin dɑ̃ɑ sɔ̃ɔwɔ
yi ǹ dɑbiru turi bu kɑ nùn yɑ̃kuru kuɑ.
Mɛyɑ dɑ̃ɑ nin tii nu ǹ turi bu kɑ yɑ̃ku dɔ̃ɔ sɔ̃re.
17 Bwesenu kpuro nu ǹ sɑ̃ɑ ɡɑ̃ɑnu win mi.
Nu sɑ̃ɑwɑ kɑm dirum.
Yinni Dɑm kpuroɡiin kpɑ̃ɑru
18 Wɑrɑ i ko kɑ Gusunɔ weesinɑ.
Mbɑ i ko nɛɛ, u kɑ weenɛ.
19 U ǹ kɑ bwɑ̃ɑrokunu weenɛ,
ni bɑ kuɑ bɑ wurɑ pote mɑ bɑ nu sii ɡeesun yɔni sebusiɑ.
20 Sɑ̃ɑro wi u ǹ kpɛ̃ u sii ɡeesu kɑ wurɑ dwe,
u rɑ dɑ̃ɑ ɡeɑ kɑsu ye kɔkɔnu nu ǹ dimɔ,
kpɑ u dɑ̃ɑ dɑ̃ko ɡeo kɑsu
u kɑ nùn bwɑ̃ɑroku kuɑ ɡe ɡɑ ǹ wɔrumɑmɔ.
21 I ǹ yɛ̃ ro? I ǹ nɔɔre ro?
Bɑ ǹ bɛɛ nɔɔsie sɑɑ yellun di ro?
I ǹ bwisikure
nɡe mɛ bɑ kɑ hɑnduniɑn kpɛɛkpɛɛku swĩi ro?
22 Gusunɔwɑ u ɡu swĩi,
wi, wi u wɑ̃ɑ wɔllɔ u tɔmbu mɛɛrɑ
bɑ sɑ̃ɑ nɡe twee.
U wɔllu tɛriɑ nɡe beku te tɑ ǹ bunu.
U tu dɛmiɑ nɡe kuu bekuruɡiru
u kɑ win wɑ̃ɑ yeru kuɑ.
23 Wiyɑ u rɑ sinɑ bibu kɑwe,
kpɑ u wiruɡibu ko tɔn dirobu.
24 Be kpuro bɑ sɑ̃ɑ nɡe dɑ̃ɑ
ni bɑ ɡirɑ nu ǹ ɡbini mɔ.
Gusunɔ ù n derɑ woo ɡɑ bu swee,
kpɑ bu ɡberɑ,
woo ɡunɑ yu kɑ bu doonɑ nɡe yɑkɑsu.
25 Gusunɔ Dɛɛro u nɛɛ,
wɑrɑ tɔmbɑ kɑ nùn weesinɑmɔ.
26 I nɔni seeyo kpɑ i mɛɛri wɔllɔ.
Wɑrɑ u kperi kuɑ yi sĩimɔ nɡe tɑbu kowobu.
Yinni Gusunɔwɑ.
U mɑɑ yin bɑɑyeren yĩsiru yɛ̃.
Yin ɡɑɑ ku rɑ biɑre win dɑm bɑkɑm sɑɑbu.
Gusunɔ u koo
dɑm sɑriruɡibu dɑm wɛ̃
27 Bɛɛ Isirelibɑ, mbɑn sɔ̃nɑ i
weeweenu mɔ̀ i mɔ̀,
Gusunɔ kun bɛɛn siɑ yɛ̃,
u ǹ mɑɑ bɛɛ bɛɛn ɡem wɛ̃ɛmɔ.
28 I ǹ yɛ̃?
I ǹ nuɑ mɑ Yinni Gusunɔ u rɑ n wɑ̃ɑ?
Wiyɑ u tem tɑkɑ kuɑ.
U ku rɑ mɑɑ wɑsire.
Bɑ ǹ kpɛ̃ bu win bwisikunu ɡiɑ.
29 U rɑ be bɑ wɑsire
kɑ be bɑ wɑsikirɑmɔ dɑm wɛ̃.
30 Bibu bɑ rɑ wɑsire.
Aluwɑɑsibɑ bɑ rɑ mɑɑ kpɑnɛ.
31 Adɑmɑ bèn yĩiyɔbu wɑ̃ɑ Yinni Gusunɔ sɔɔ,
u ko n dɑ bu dɑm kpɑm wɛ̃,
kpɑ bu se kɑ dɑm nɡe ɡunɔ bɑkeru.
Bɑ̀ n duki mɔ̀, bɑ ǹ wɑsirɑmɔ.
Bɑ̀ n mɑɑ sĩimɔ, bɑ ǹ kpɑnɑmɔ.
Yinni Gusunɔ
u Isirelibɑ dɑm kɛ̃mɔ