43
1 Yinni Gusunɔ u nɛɛ,
Isireli, Yɑkɔbun bweseru,
wunɛ wi nɑ mɔmɑ nɑ tɑkɑ kuɑ,
ɑ ku bɛrum ko, domi nɛnɑ nɑ nun yɑkiɑ.
Nɑ nun sokɑ kɑ wunɛn yĩsiru,
ɑ sɑ̃ɑwɑ nɛɡii.
2 À n wɑhɑlɑ mɔ̀ nɡe wi u nim bweru tɔburɑmɔ,
ko nɑ n kɑ nun wɑ̃ɑ.
Wɑhɑlɑ ye, yɑ ǹ nun kɑmiɑmɔ.
À n mɑɑ nɔni sɔ̃ɔre nɡe wi u sĩimɔ dɔ̃ɔ sɔɔ,
ɑ ǹ wururɑmɔ.
Mɛyɑ nɔni swɑ̃ɑ te, tɑ ǹ nun surɑmɔ.
3 Domi nɛnɑ nɑ sɑ̃ɑ Gusunɔ wunɛn Yinni Dɛɛro,
nɛ wi nɑ nun fɑɑbɑ mɔ̀.
Nɑ kon Eɡibiti kɑ Etiopi kɑ Sɑbɑn tem yibɛrɛbɑ wɛ̃ wunɛn ɑyerɔ,
kpɑ ɑ yɑkiɑrɑ,
4 yèn sɔ̃ ɑ sɑ̃ɑ ɡɑ̃ɑ bɑkɑnu nɛn nɔni sɔɔ.
A ɡirimɑ mɔ, nɑ mɑɑ nun kĩ.
Kon bwese dɑbinu yibɛrɛbɑ nɔmu sɔndiɑ wunɛn ɑyerɔ
n kɑ wunɛn wɑ̃ɑru yɑkiɑ.
5 Yen sɔ̃, ɑ ku bɛrum ko, domi nɑ kɑ nun wɑ̃ɑ.
Kon de wunɛɡii be bɑ ɡurɑ bɑ kɑ dɑ sɔ̃ɔ yɑri yeru ɡiɑ mi,
bu wurɑmɑ,
kpɑ n mɑɑ be bɑ wɑ̃ɑ sɔ̃ɔ duu yeru ɡiɑ mɛnnɑmɑ.
6 Nɑ ǹ mɑɑ derimɔ sɔ̃ɔ yɛ̃si yɛ̃sikɑn tɔmbu bu mɑɑ bu nɛnɛ.
Adɑmɑ bu de nɛn bii be bɑ wɑ̃ɑ hɑnduniɑn ɡoonu nnɛ ye sɔɔ kpuro bu wurɑmɑ,
7 be, be bɑ nɛn yĩsiru sɔɔwɑ,
be nɑ tɑkɑ kuɑ bu kɑ mɑn bɛɛrɛ wɛ̃.
Isirelibɑ bɑ sɑ̃ɑwɑ
Yinni Gusunɔn seedɑɡibu
8 Gusunɔ u nɛɛ,
bu de nɛn tɔmbu bu yɑrimɑ,
be, be bɑ nɔni mɔ,
ɑdɑmɑ bɑ ǹ yɑm wɑɑmɔ,
bɑ swɑsu mɔ,
ɑdɑmɑ bɑ ǹ ɡɑri nɔɔmɔ.
9 Bwesenu kpuro nu mɛnnɔ
kpɑ n nu bikiɑ,
bũu wɑrɑ u yenin ɡɑri ɡeruɑ.
Bũu wɑrɑ u ɡbiɑ u ye nɔɔsiɑ
yɑ sere koorɑ.
U win seedɑɡibu mɛnnɑmɑ,
kpɑ bu sɔ̃ɔsi mɑ u ɡem mɔ,
kpɑ bu swɑɑ dɑki bu wurɑ mɑ ɡemɑ u ɡeruɑ.
10 Wunɛ Isirelin bweseru, wunɑ ɑ sɑ̃ɑ nɛn seedɑ.
Wunɑ nɑ ɡɔsɑ ɑ n sɑ̃ɑ nɛn sɔm kowo,
kpɑ ɑ n kɑ yɛ̃ kɑm kɑm
mɑ nɛ bɑɑsi, Gusunɔ ɡoo mɑɑ sɑri.
Mɛyɑ Gusunɔ ɡoo kun mɑɑ koorɔ.
11 Nɛnɑ nɑ Gusunɔ wi u rɑ n wɑ̃ɑ.
Nɛ bɑɑsi, fɑɑbɑ kowo ɡoo sɑri.
12 Nɛnɑ nɑ nun nɔɔsiɑ ye yɑ koo koorɑ.
Mɑ nɑ nun fɑɑbɑ kuɑ.
Bũu ɡoo kun kpĩɑ u nun ɡɑ̃ɑnu nɔɔsie.
Wunɑ ɑ sɑ̃ɑ nɛn seedɑ.
Nɛnɑ nɑ sɑ̃ɑ Gusunɔ sɑɑ toren di.
13 Goo sɑri wi u koo ɡoo wɔrɑ sɑɑ
nɛn nɔmɑn di.
Goo mɑɑ sɑri wi u koo yinɑ n ko ye nɑ kĩ.
Bɑ koo Isirelibɑ yɑrɑ
Bɑbilonin di
14 Yinni Gusunɔ u nɛɛ,
bɛɛ Isirelibɑ, ɑmɛniwɑ nɛ Gusunɔ, bɛɛn Yinni Dɛɛro,
nɛ wi nɑ bɛɛ yɑrɑ, nɑ ɡeruɑ nɑ nɛɛ,
kon Bɑbiloniɡibu bɛri yibɛrɛbɑn nɔmɑɔ bɛɛn sɔ̃,
kpɑ n ben wuun ɡɑmbobɑ kɔsuku,
kpɑ ben nuku dobun kuuki yi ɡɔsirɑ nuku sɑnkirɑnun wuri.
15 Nɛnɑ nɑ sɑ̃ɑ Gusunɔ bɛɛn Yinni Dɛɛro.
Nɛnɑ nɑ bɛɛ tɑkɑ kuɑ nɑ mɑɑ sɑ̃ɑ bɛɛn sunɔ.
Swɑɑ kpɑɑ ɡbɑburɔ
16 Mɑ Esɑi u nɛɛ,
yellu, Yinni Gusunɔ u swɛɛ yɑrɑ
nim wɔ̃ku kɑ nim tori dɑmɡii sɔɔ.
17 U tɑbu kɛkɛ be dumi ɡɑwe
kɑ tɑbu durɔ wɔruɡɔbɑ tɑbu sure.
Be kpuro bɑ wɔrukɑ, bɑ kpɑnɑ bu se,
mɑ bɑ kɑm kuɑ bɑ ɡu nɡe fitilɑ.
18 Adɑmɑ tɛ̃, u ɡeruɑ u nɛɛ,
i ku mɑɑ ye yɑ koorɑ kɔn bwisikunu ko.
I ku mɑɑ ɡɑ̃ɑ ɡurunun lɑɑkɑri ko.
19 Wee kon ɡɑ̃ɑ kpɑɑnu ko.
Ni wee nu wee. I ǹ nu tubɑ?
Kon swɑɑ yɑrɑ ɡbɑburɔ,
kpɑ dɑɑnu nu n wɑ̃ɑ mi tem ɡbere.
20 Tɑɑtɑɑnu kɑ ɡbeeku bɔ̃nu,
ɡbeeku yɛɛ kpuro ɡesi, yi koo mɑn bɛɛrɛ wɛ̃.
Domi kon de nim mu n wɑ̃ɑ ɡbɑburɔ, mi tem ɡbere,
kpɑ tɔn be nɑ ɡɔsɑ bu nim wɑ bu nɔ,
21 be, be nɑ tɑkɑ kuɑ bɑ koo mɑn tɔmɑ.
Gusunɔ u Isirelibɑ sirimɔ
22 Adɑmɑ bɛɛ Isirelibɑ,
bɛɛ be i sɑ̃ɑ Yɑkɔbun bweseru,
i kɑ mɑn wɑsirɑ,
i ku rɑ mɑɑ mɑn sɑ̃.
23-24 N ǹ nɛ i yɑ̃ku dɔ̃ɔ mwɑɑrɑruɡinu kuɑmmɛ kɑ bɛɛn yɑ̃ɑnu.
Yɑ̃ku ni i rɑ mɑɑ ko mi,
nu ǹ mɑn bɛɛrɛ wɛ̃ɛmɔ.
N ǹ nɛn sɔ̃ i ɡobi bɛkɛ di
i kɑ turɑre dɔ̃ɔ doke.
N ǹ mɑɑ nɛ i kɑ yɑɑ ɡum nɑɑwɑmmɛ
ì n yɑ̃kuru mɔ̀ mu sere mɑn tusi.
N ǹ nɛ nɑ bɛɛ tilɑsi kuɑ
i n dɑ kɑ mɑn kɛ̃nu nɑɑwɛ.
Mɛyɑ nɑ ǹ mɑɑ bɛɛ tɔ̃yɑ kue
i kɑ mɑn turɑre dɔ̃ɔ dokeɑ.
Adɑmɑ i mɑn wɑhɑlɑ kpɛ̃ɛwɑ bɛɛn durum sɔ̃,
mɑ nɑ wɑsirɑ bɛɛn torɑnun sɔ̃.
25 Kɑ mɛ, nɛnɑ nɑ bɛɛn durum wɔkɑmɔ
yèn sɔ̃ nɑ sɑ̃ɑ Gusunɔ.
Nɑ ǹ mɑɑ ye yɑɑyɑmɔ.
26 I seewo i nɑ i mɑn bɛɛn ɡɑri tɛriɑ,
kpɑ i kɑ tii yinɑ.
27 Bɛɛn sikɑdo ɡbiikoo u durum kuɑ,
mɑ bɛɛn sɑ̃ɑ ɡbiobu bɑ mɑn seesi.
28 Yen sɔ̃nɑ nɑ yɑ̃ku kowobu yɑrɑ
nɛn sɑ̃ɑ yerun di,
mɑ nɑ bɛɛ Isirelibɑ, Yɑkɔbun bweseru kɑm koosiɑ,
nɑ bɛɛ sekuru doke.