47
1 Yinni Gusunɔ u nɛɛ,
wunɛ wi bɑ ǹ kɑmiɑre,
kɑɑ wɔrumɑ ɑ kpunɑ tuɑ sɔɔ.
Wunɛ wi ɑ sɑ̃ɑ nɡe wɔndiɑ,
kɑɑ sinɑ temɔ, ɑ ǹ mɑɑ sinɑmɔ sinɑ kitɑrɔ.
Domi bɑ ǹ mɑɑ nun sokumɔ kurɔ burɔ.
2 Kɑɑ nɛɛ biɑ suɑ kpɑ ɑ som nɑm nɡe yoo.
Kɑɑ wunɛn sɔnditiɑ wunɑ,
kpɑ ɑ wunɛn bekuru kpɑɑsinɑ
ɑ wunɛn tɑɑnu sɔ̃ɔsi
kpɑ ɑ dɑɑnu tɔburɑ.
3 Bɑ koo wunɛn tereru wɑ
kpɑ sekuru tu nun mwɑ.
Kon nun mɔru kɔsie.
Nɑ ǹ ɡoo derimɔ wunɛn nukurɔ.
4 Nɛn yĩsirɑ Gusunɔ, wɔllu
kɑ tem Yinni.
Nɑ mɑɑ sɑ̃ɑ Isirelibɑn Yinni dɛɛro,
wi u bu fɑɑbɑ mɔ̀.
5 Bɑbiloni, wunɛ wi ɑ sɑ̃ɑ nɡe Kɑlɑdebɑn wɔndiɑ,
ɑ doo ɑ sinɑ yɑm wɔ̃kuru sɔɔ, ɑ mɑri.
Bɑ ǹ mɑɑ nun sokumɔ sinɑmbun sinɑ boko.
6 Wee, nɑ rɑɑ kɑ nɛn tɔmbu mɔru kuɑ,
nɑ bu ɡɑrisi nɡe disi,
be, be bɑ sɑ̃ɑ nɛɡibu.
Mɑ nɑ nun bu nɔmu bɛriɑ.
Adɑmɑ ɑ ǹ bu wɔnwɔndu kue,
sere ɑ mɑm ben durɔ tɔkɔnu yoru diisiɑ.
7 Mɛyɑ ɑ rɑ n ɡerumɔ ɑ n mɔ̀,
kɑɑ n bɑndu diiwɑ sere kɑ bɑɑdommɑɔ.
Adɑmɑ ɑ ǹ bwisikɑ wunɛn ɡɔ̃ruɔ
mɑ yenibɑ kpuro yɑ koo nɔru ko.
8 A swɑɑ dɑkio, Bɑbiloni,
wunɛ wi ɑ rɑ n wunɛn tiin nuku dobu kɑsu,
mɑ ɑ sɔ̃ kɑ toro sindu ɑ ɡerumɔ wunɛn ɡɔ̃ruɔ ɑ mɔ̀,
wunɑ mi, ɡoo mɑɑ sɑri wi u kɑ nun nɛ.
A ǹ ɡɔminiru dimɔ, wunɛn bii ɡoo kun mɑɑ ɡbimɔ.
9 Adɑmɑ tɛ̃ ye yiru kpuro yɑ koo nun deemɑ
sɔ̃ɔ teeru subɑru sɔɔ.
Bɑɑ mɛ wunɛn tim mu do,
mɑ wunɛn dobo dobo yɑ kpɑ̃,
kɑ mɛ, kɑɑ ɡɔminiru sinɑ,
kpɑ wunɛn bibu bu ɡbi.
Ye kpuro yɑ koo koorɑwɑ mɑm mɑm.
10 Wee, ɑ rɑɑ kom kɔ̃sum mɔ̀ kɑ toro sindu,
domi ɑ ɡerumɔ ɑ mɔ̀, ɡoo kun nun wɑɑmɔ.
Wunɛn lɑɑkɑri kɑ wunɛn yɛ̃ru tɑ nun wiru ɡɔsiɑ.
Mɑ ɑ ɡerumɔ wunɛn ɡɔ̃ruɔ ɑ mɔ̀,
wunɑ mi. Goo kun kɑ nun nɛ.
11 Adɑmɑ tɛ̃, kɔ̃sɑ koo nun deemɑ.
A ǹ mɑɑ ɡoo wɑsi wi u koo nun wɔrɑ.
Nɔni swɑ̃ɑrɑ koo nun wɔri.
A ǹ mɑɑ kpɛ̃ ɑ tu suuri,
kpɑ ɑ kɑm ko subɑru sɔɔ.
12 Ǹ n mɛn nɑ, ɑ n wɑ̃ɑ ɑ n wunɛn dobo dobo mɔ̀
kɑ tim timminu ni ɑ rɑ rɑɑ ko wunɛn piiburun di.
Sɔrɔkudo yɑ koo nun ɑrufɑɑni mɑruɑ.
Ǹ kun mɛ, yɑ koo de bu nun nɑsiɑ.
13 Wee, ɑ wɑsirɑ bikiɑrun sɔ̃
be bɑ rɑ wɔllun kperin sɑriɑ mɛɛrin mi.
Ǹ n mɛn nɑ, bu seewo bu nun fɑɑbɑ ko,
be, be bɑ rɑ nun sɔ̃ suru kɑ suru ye n koo nun deemɑ.
14 Ben tii bɑ koo dɔ̃ɔ mwɑɑrɑ nɡe yɑkɑsu.
Bɑ ǹ kpɛ̃ bu ben wɑ̃ɑru wɔrɑ sɑɑ dɔ̃ɔ yɑrɑn di.
Dɔ̃ɔ yɑrɑ ye, yɑ ǹ ko n sɑ̃ɑ nɡe pɛ̃ɛn doon dɔ̃ɔ.
Yɑ ǹ mɑɑ sɑ̃ɑ dɔ̃ɔ wìn bɔkuɔ bɑ rɑ sinɛ.
15 Yerɑ yɑ koo bɛɛn sɔro be deemɑ
bèn sɔ̃ ɑ rɑɑ tii wɑhɑlɑ kuɑ sɑɑ yellun di.
Be kpuro bɑ koo yɑrinɑwɑ.
Ben ɡoo kun nun fɑɑbɑ mɔ̀.
Gusunɔ u Isirelibɑ sɔ̃ɔwɑ
ye n koo koorɑ