58
1 Yinni Gusunɔ u nɛɛ,
ɑ nɔɔɡiru suo kɑ dɑm nɡe mɛ kɑɑ kpĩ,
kpɑ wunɛn nɔɔ ɡu nɔɔrɑ nɡe kɔbɑ.
A nɛn tɔmbu Yɑkɔbun bweseru sɔ̃ɔwɔ
mɑ bɑ durum kuɑ.
2 Tɔ̃ɔ bɑɑtere bɑ rɑ n mɑn sokuwɑ
bɑ n kĩ bu ɡiɑ ye nɑ kĩ bu ko.
Bɑ mɔ̀ nɡe tɔn be bɑ ɡem swĩi,
be bɑ ǹ nɛn woodɑbɑ deri.
Bɑ rɑ mɑn kɑnɛ
n bu siriɑ dee dee,
kpɑ bɑ n kĩ bɑ n kɑ mɑn wɑ̃ɑ.
3 Adɑmɑ bɑ rɑ nɛɛ, mbɑn sɔ̃nɑ bɑ koo mɑɑ nɔɔ bɔke,
domi nɑ ǹ bu mɛɛrɑ.
Mbɑn sɔ̃nɑ bɑ tii wɑhɑlɑ mɔ̀,
domi nɑ bu ɑtɑfiiru sɑ̃ɑ.
Kpɑ n bu wisi n nɛɛ,
bɑɑ ì n nɔɔ bɔkumɔ,
bɛɛn tiin kĩrɑ i rɑ n mɔ̀,
kpɑ i n bɛɛn sɔm kowobu dɑm dɔremɔ.
4 I rɑ n sikirinɑmɔwɑ i n sɑnkinɑmɔ,
kpɑ i n nɔm kusenu soonɑmɔ kɑ nuku kɔ̃suru.
Ì n nɔɔ bɔkumɔ mɑ i mɔ̀ mɛ,
nɛ, Gusunɔ nɑ ǹ bɛɛn ɡɑri nɔɔmɔ.
5 Nɔɔ bɔku te nɑ kĩ, teyɑ mi?
I winu sikɑmɔ nɡe yɑkɑsu,
mɑ i sɑɑkibɑ sebuɑ i tii torom wisimɔ.
Adɑmɑ i tii kɑwewɑ mi kɑ ɡem?
Nɔɔ bɔku ten bweserɑ kun mɑn wɛ̃remɔ.
6 Wee nɔɔ bɔku te nɑ kĩ.
Be i bɔkuɑ nuku kɔ̃surun sɔ̃,
i bu yɔ̃suo.
Be i rɑɑ dɑm dɔremɔ,
i de bu doonɑ.
Kpɑ be bɑ yoru dimɔ bɛɛn mi,
bu kɑrɑ.
7 I bɛɛn dĩɑnu bɔnu koowo
kɑ wi u kun mɔ u di,
kpɑ i be bɑ kun wɑ̃ɑ yeru mɔ nɛnɛ bɛɛn yɛnuɔ.
Ì n ɡoo wɑ u sĩimɔ tereru,
i nùn yɑ̃nu wɛ̃ɛyɔ u sebe,
kpɑ i ku mɑɑ bɛɛn winsim biru kisi.
8 Sɑɑ yerɑ nɛn durom mu koo bɛɛ
nɑɑwɑ nɡe buruku sɔ̃ɔ,
kpɑ mi i mɛɛrɑ mɔ yu bɛkurɑ fuuku.
Mɛyɑ mɑɑ ɡem mu ko n dɑ n bɛɛ swɑɑ ɡbiiye.
Nɛ, Yinni Gusunɔ,
nɑ kon kɑ bɛɛ wɑ̃ɑ nɑ n bɛɛ kɔ̃su.
9 Sɑnɑm mɛyɑ ì n mɑn sokɑ,
kon bɛɛ wisi n nɛɛ, nɛ wee.
Ì n bɛɛn yobu kɑrɑ,
mɑ i murɑfitiru kɑ ɡɑri kɔ̃si deri,
10 ì n ɡɔ̃ɔro dĩɑnu wɛ̃,
mɑ i mɑɑ sɑ̃ɑro debiɑ,
sɑɑ yerɑ i ko yɑri yɑm wɔ̃kurun di,
kpɑ yɑm wɔ̃ku te, tu ko nɡe sɔ̃ɔ sɔɔ.
11 Nɛ, Yinni Gusunɔ, kon bɛɛ kpɑrɑ sere kɑ bɑɑdommɑɔ,
kpɑ n de i n debɑ bɑɑ mi dĩɑnu ku rɑ kpi.
Kon de bɛɛn wɑsi yi dɑm wɑ,
kpɑ i n sɑ̃ɑ nɡe ɡbee te tɑ kɑkoru mɔ,
ǹ kun mɛ nɡe bwii yìn nim ku rɑ kpe.
12 Sɑɑ yerɑ i ko bɑnsu seeyɑ
si bɑ kɔ̃ n tɛ,
kpɑ i mɑɑ bɑni kpɛɛkpɛɛku wɔllɔ
ɡe bɑ swĩi sɑɑ yellun di.
Sɑnɑm mɛyɑ bɑ koo bɛɛ soku
be bɑ rɑ bɑnsu kɑ swɛɛ sɔmɛ,
kpɑ bu de tɔmbu bɑ n wɑ̃ɑ mi sɔɔ.
A tɔ̃ɔ wɛ̃rɑruɡirun woodɑ mɛm nɔɔwɔ
13 Yinni Gusunɔ u nɛɛ,
ì n tii nɛnuɑ i kun sɔmburu kue,
mɑ i bɛɛn tiin kĩru deri
i kɑ tɔ̃ɔ wɛ̃rɑruɡirun woodɑ mɛm nɔɔwɑ,
mɑ i mɑn bɛɛrɛ wɛ̃
i nɛn tɔ̃ɔ dɛɛrɑ te ɡɑrisi tɔ̃ɔ duroru,
mɑ i kun ɡɑri bɛkɛ sɑɑre,
14 sɑɑ yerɑ i ko nuku dobu wɑ nɛn sɑ̃ɑru sɔɔ,
kpɑ tɔmbu kpuro bu bɛɛ bɛɛrɛ wɛ̃,
kpɑ n bɛɛ diisiɑ tem mɛ sɔɔ,
mɛ nɑ bɛɛn sikɑdo Yɑkɔbu wɛ̃.
Nɛ, Yinni Gusunɔwɑ nɑ yeni ɡeruɑ.
Ye yɑ Isirelibɑ kɑrɑnɛ
kɑ Gusunɔ