6
1 Wɔ̃ɔ ɡè sɔɔ sinɑ boko Osiɑsi u ɡu, nɛ Esɑi, nɑ Yinni Gusunɔ wɑ kɑ̃siru sɔɔ, u sɔ̃ sinɑ kitɑ bɑkɑru ɡɑrun wɔllɔ win sɑ̃ɑ yerɔ. Mɑ win yɑberun kɑsɑ yɑ sure sɑ̃ɑ yee ten sɔɔwɔ kpuro.
2 Wɔllun kɔ̃sobu bɑ bɛllimɔ win wɔllɔ. Ben bɑɑwure, kɑsɑ nɔɔbɑ tiɑ u mɔ. U kɑ yen yiru win wuswɑɑ wukiri, yiru mɑɑ win nɑɑsu mɑ u kɑ yiru ye yɑ tie yɔ̃ɔwɑ.
3 Bɑ nɔɔɡiru sue bɑ mɔ̀,
Dɛɛro Dɛɛro,
Gusunɔ wɔllu kɑ tem Yinni u sɑ̃ɑwɑ Dɛɛro.
Win yiiko yɑ hɑnduniɑ kpuro yibɑ.
4 Mɑ sɑ̃ɑ yee ten ɡɑmbobɑ bɑ diirɑ sɑɑ ben tem di, nɔɔ ɡe ɡɑ nɔɔrɑmɔ min sɔ̃, mɑ wiisu su yibɑ dii te sɔɔ.
5 Sɑɑ ye sɔɔrɑ nɑ nɔɔɡiru suɑ nɑ nɛɛ, nɑ kɑm kuɑwɑ. Domi nɛn yɑrɑ yɑ durum sɔɔwɑ, nɑ mɑɑ wɑ̃ɑ tɔmbun suunu sɔɔ bèn yɑri durum sɔɔwɑ mɑ nɑ sere Gusunɔ, wɔllu kɑ tem Yinni wɑ kɑ nɔni wi u sɑ̃ɑ kpuron sunɔ.
6 Adɑmɑ wɔllun kɔ̃so ben turo u dɔ̃ɔ ɡɛ̃ɛ suɑ kɑ bɑku yɑ̃ku yerun di, u yɔ̃ɔmɑ u nɑ nɛn mi.
7 Mɑ u kɑ yi nɛn nɔɔ bɑbɑ mɑ u nɛɛ,
yeni yɑ wunɛn nɔɔ bɑbɑ
yɑ sɔ̃ɔsi mɑ Gusunɔ u wunɛn torɑru wunɑ.
Mɛyɑ u mɑɑ wunɛn durum wɔkɑ.
8 Yen biruwɑ nɑ Yinni Gusunɔn tiin nɔɔ nuɑ ɡɑ ɡerumɔ ɡɑ mɔ̀,
wɑrɑ kon wɑ n ɡɔri.
Wɑrɑ koo se u mɑn dɑɑwɑ.
Mɑ nɑ wisɑ nɑ nɛɛ,
nɛ wee, ɑ mɑn ɡɔrio.
9 Mɑ u mɑn sɔ̃ɔwɑ u nɛɛ,
ǹ n mɛn nɑ, n doo n Isirelibɑ ɡɑri yini sɔ̃ n nɛɛ,
wee bɑ ko n dɑ kɑsu bu win ɡɑri nɔ,
ɑdɑmɑ bɑ ǹ yi nɔɔmɔ.
Bɑ ko n dɑ kɑsu bu wɑ,
ɑdɑmɑ bɑ ǹ ɡɑ̃ɑnu wɑsi.
10 N de tɔn ben ɡɔ̃ru ɡu bɔbiɑ,
kpɑ bu swɑɑ tɑɑyɑ bu ku rɑɑ ɡɑri nɔ.
N ben nɔni wɔ̃kuo bu ku rɑɑ kɑ yɑm wɑ,
kpɑ bu ku rɑɑ ɡɔ̃ru ɡɔsiɑ bu fɑɑbɑ wɑ.
11 Mɑ nɑ nɛɛ,
Yinni, sere sɑɑ yerɑ̀ yɑ ko n sɑ̃ɑ mɛ.
Mɑ u mɑn wisɑ u nɛɛ,
sere wuu sinin tɔmbu bɑ̀ n ɡbisukɑ,
kpɑ su ko bɑnsu, kpɑ tem mɛ kpuro mu kɑm ko.
12 Domi u koo de bu kɑ mɛn tɔmbu dɑ sere mi n tomɑ
kpɑ bu mɛ deri mu n sɑ̃ɑ bɑnsu.
13 Bɑɑ bɑ̀ n tem mɛn tɔmbu bɔnu kuɑ subɑ wɔkuru,
mɑ ten teerɑ tie mi,
u koo tu surɑwɑ nɡe dɑ̃ɑ bɑkɑru.
Adɑmɑ nɡe mɛ dɑ̃ɑ kpiriru tɑ rɑ kpɑre,
nɡe mɛyɑ bwese kpɑɑrɑ koo se
tɑ n sɑ̃ɑ bwese ɡeeru te u ɡɔsɑ.
Gɑri yi Esɑi
u Akɑsi sinɑ boko sɔ̃ɔwɑ