138
1 Womu ɡe Dɑfidi u kuɑ. Ge wee.
Yinni Gusunɔ, nɑ nun siɑrɑmɔ kɑ nɛn ɡɔ̃ru kpuro.
Kon nun tɔmɑ wɔllun tɔmbun wuswɑɑɔ.
2 Kon nun kpunɑ wunɛn sɑ̃ɑ yee dɛɛrɑrɔ,
kpɑ n nun tɔmɑ wunɛn tɔn ɡeeru kɑ wunɛn bɔrɔkinirun sɔ̃.
Domi ɑ yĩsiru yɑrɑ wunɛn nɔɔ mwɛɛ te ɑ rɑ yibien sɔ̃.
3 Sɑɑ ye nɑ nun sokɑ, ɑ mɑn wurɑri.
A mɑn dɑm kɑ̃, ɑ mɑn toro sindu wɛ̃.
4 Yinni Gusunɔ, sinɑmbu kpurowɑ bɑ koo nun siɑrɑ.
Domi bɑ wunɛn ɡɑri nuɑ.
5 Bɑ koo wunɛn kookoosu siɑrɑ.
Domi wunɛn bɛɛrɛ yɑ kpɑ̃.
6 Yinni Gusunɔ, bɑɑ mɛ ɑ kpɑ̃, ɑ be bɑ tii kɑwe wɑɑmɔ.
Mɑ ɑ rɑ be bɑ tii sue tubu sɑɑ tontonden di.
7 Nɑ̀ n sĩimɔ nuku sɑnkirɑnun swɑɑ sɔɔ,
ɑ rɑ mɑn wɑ̃ɑru wɛ̃.
A rɑ nɛn yibɛrɛbɑ nɔmu dɛmiɛ bɑ̀ n kɑ mɑn mɔru seewɑ.
Mɛyɑ wunɛn dɑm mu rɑ mɑn fɑɑbɑ ko.
8 Yinni Gusunɔ, kɑɑ mɑn sɑnnɑ.
Wunɛn tɔn ɡeeru tɑ ǹ nɔru mɔ.
Be ɑ tɑkɑ kuɑ, ɑ ku bu deri.