34
1 Dɑfidi u tii ɡɔsiɑ wiiro Abimɛlɛkin wuswɑɑɔ, yerɑ durɔ wi, u nùn ɡirɑ win min di. Sɑɑ yerɑ Dɑfidi u womu ɡeni kuɑ u nɛɛ,
2 nɑ kon Yinni Gusunɔ siɑrɑ sɑɑ bɑɑyere.
Mɛyɑ nɛn nɔɔ ɡɑ ǹ mɑrimɔ nɑ kun nùn tɔmɛ.
3 Yinni Gusunɔ sɔɔrɑ kon yɛ̃ɛri.
Bɛɛ wɔnwɔndobu, i swɑɑ dɑkio,
kpɑ i ɡɔ̃ru dorɑ.
4 I kɑ mɑn Yinni Gusunɔ wɔlle suo,
su win yĩsiru bɛɛrɛ wɛ̃ sɑnnu.
5 Nɑ Yinni Gusunɔ sokɑ, mɑ u mɑn wurɑri,
u mɑn yɑrɑ nɛn bɛrum kpuron di.
6 Be bɑ nùn wuswɑɑ kisi, bɑ rɑ n nuku dobu mɔwɑ.
Bɑ ǹ mɑɑ ben wuswɑɑ wukirimɔ sekurun sɔ̃.
7 Yinni Gusunɔ u rɑ wɔnwɔndon sokuru nɔ.
Mɛyɑ u rɑ mɑɑ nùn yɑre nuku sɑnkirɑnu kpuron di.
8 Win ɡɔrɑdo u rɑ be bɑ nùn nɑsie kɔ̃su,
kpɑ u bu yɑrɑ kɑrin di.
9 I nɑ, i win durom dendɑ kpɑ i wɑ nɡe mɛ mu kpɑ̃.
Doo nɔɔruɡiiwɑ wi u kuku yeru kɑsu win mi.
10 Bɛɛ be i sɑ̃ɑ wiɡibu, i nùn nɑsio.
Domi be bɑ nùn nɑsie, ɡɑ̃ɑnu ku rɑ bu kɔmiɛ.
11 Bɑɑ ɡbee sunɔ kpɛmu ɡɑ rɑ ɡɑsɔ bie ɡu di.
Adɑmɑ be bɑ Yinni Gusunɔ kɑsu,
ɡɑ̃ɑ ɡeenu kun bu sɑrɑrimɔ.
12 Bɛɛ nɛn bibu, i susimɑ i nɔ,
kpɑ n bɛɛ sɔ̃ɔsi nɡe mɛ i ko kɑ Yinni Gusunɔ nɑsiɑ.
13 Wi u kĩ u wɑ̃ɑru di bɔri yɛndu sɔɔ,
kpɑ u tɛ,
14 u kɔ̃sɑn ɡerubu de, kpɑ u weesu deri.
15 U kɔ̃sɑ suurio, kpɑ u ɡeɑ ko.
U ɑlɑfiɑ nɑɑ ɡiro.
16 Gemɡibɑ Yinni Gusunɔ u rɑ n nɔni wɛ̃ɛ.
Mɛyɑ u rɑ mɑɑ ben wuri swɑɑ dɑki.
17 Yinni Gusunɔ u rɑ kɑ kɔ̃sɑn kowobu sɑnnɛ,
kpɑ u de bu ben ɡɑri duɑri tem mɛni sɔɔ.
18 Yinni Gusunɔ u rɑ ɡemɡibun sokuru wure,
kpɑ u bu wunɑ ben wɑhɑlɑ kpuron di.
19 U rɑ n kɑ be bɑ nuki sɑnkire wɑ̃ɑ,
kpɑ u be bɑ mwiɑ kpɑnɑ fɑɑbɑ ko.
20 Kɔ̃sɑ dɑbinɑ nu rɑ ɡemɡii deemɛ,
ɑdɑmɑ Yinni Gusunɔwɑ u rɑ nùn wɔre ye kpuron di.
21 Wiyɑ u win wɑsin ɡbin ɡbinkɑ kɔ̃su.
U ǹ derimɔ bɑɑ win kuku teeru tu kɔsirɑ.
22 Adɑmɑ kɔ̃sɑ yɑ̀ n tɔn kɔ̃so deemɑ, yɑ rɑ nùn ɡowɑ.
Mɛyɑ u rɑ mɑɑ ɡemɡiin yibɛrɛbɑ sɛɛyɑsie.
23 Wiyɑ u rɑ win sɔm kowobun hunde wɔre kɑrin di.
Be bɑ mɑɑ nùn nɑɑnɛ sɑ̃ɑ bɑ ǹ tɑɑrɛ wɑsi.