65
1 Womu ɡe Dɑfidi u wom kowobun wiruɡii kuɑ. Ge wee.
2 Yinni Gusunɔ, sɑ ko nun siɑrɑ kɑ nɑɑnɛ dokebu Siɔniɔ,
kpɑ su nɔɔ mwɛɛ ni sɑ nun kuɑ yibiɑ.
3 Yinni Gusunɔ, wunɛ wi ɑ rɑ tɔmbun kɑnɑru nɔ,
tɔmbu kpuro bɑ koo nɑ wunɛn mi.
4 Bɛsɛn torɑnu sun buniɛ.
Wunɑ kɑɑ sun nu suuru kuɑ.
5 Doo nɔɔruɡiiwɑ wi ɑ ɡɔsɑ u nun susi u wɑ̃ɑ wunɛn sɑ̃ɑ yerɔ.
Wunɛn wɑ̃ɑ yerun nuku dobu koo de su debu wunɛn sɑ̃ɑ yee dɛɛrɑrɔ.
6 Gusunɔ bɛsɛn fɑɑbɑ kowo, wunɛn kĩrun sɑɑbu,
ɑ rɑ bɛsɛn kɑnɑru wure,
kpɑ ɑ sun sɔm mɑɑmɑɑkiɡinu sɔ̃ɔsi.
Wunɑ tɔmbu kpuro bɑ nɑɑnɛ sɑ̃ɑ temɔ sere kɑ be bɑ wɑ̃ɑ nim wɔ̃kun tem burenɔ.
7 Wunɑ ɑ dɑm mɔ.
Kɑ dɑm mɛyɑ ɑ kɑ ɡuunu swĩi nin ɑyenɔ.
8 Wunɑ ɑ rɑ nim wɔ̃kun wɔkinu mɑrisie,
kpɑ ɑ ɡen nim kurenu yɔ̃rɑsiɑ.
Mɛyɑ ɑ rɑ mɑɑ tɔmbun wurenu kpeesie.
9 Hɑnduniɑn ɡoonu nnɛ sɔɔ,
tɔmbu kpuro bɑ wunɛn sɔm mɑɑmɑɑkiɡinu nɑsie.
Wunɛ wi ɑ rɑ sɔ̃ɔ yɑri yeruɡibu kɑ sɔ̃ɔ duu yeruɡibu nuku dobu wɛ̃.
10 Wunɑ ɑ rɑ tem nɔɔri, kpɑ ɑ mu nim yɛ̃kɑ mu n kpɑ̃.
A rɑ mɑɑ de mu n dukiɑ mɔ.
Gusunɔ, wunɛn bwiɑ yɑ nim yibɑwɑ.
Mɛyɑ ɑ rɑ kɑ tem dwiiyɑsie, kpɑ dĩɑnu nu wɑ nu kɑ kpi.
11 A rɑ ɡberun kpĩin tem kusɑnu kɔsuku kpɑ ɑ nu nim yɛ̃kɑ.
A rɑ mɑɑ de ɡurɑ yu nu dwiiyɑsiɑ mɑm mɑm,
kpɑ ɑ ye bɑ duurɑ mi domɑru kuɑ yu kɑ kpi.
12 A rɑ dewɑ wɔ̃ɔ ɡu tore kpɑ ɡu kpe kɑ wunɛn durom,
kpɑ deburɑ n wɑ̃ɑ mi ɑ sɑrɑ kpuro.
13 Debu te, tɑ wɑ̃ɑwɑ kɑ kpɑrɑ yenɔ,
mɑ nuku dobu nɔɔrɑmɔ ɡuunɔ.
14 Mɑ yɑ̃ɑnu tɛrie kpɑrɑ yenu mi.
Mɛyɑ ɑlikɑmɑ yɑ kpiɑ yɑ wɔwɑ wukiri,
mɑ bɑɑyere kpuro yɑ nun tɑkɑru mɔ̀, yɑ womu mɔ̀ kɑ nuku dobu.