25
1 Dɑfidi kɑ tɑbu sinɑmbu bɑ Asɑfun bibun bweseru kɑ Hemɑnin bibuɡiru kɑ Yedutum bibuɡiru ɡɔsɑ bɑ yi nɛnɛm sɑ̃ɑrun sɔ̃. Gɑri yi Gusunɔ u bu sɔ̃ɔwɑ, yiyɑ bɑ rɑ kɑ womusu ko kɑ mɔrɔkunu kɑ ɡuunu kɑ sɛkɛtirɛnu. Be bɑ sɔmɑ ye mɔ̀, ben yĩsɑ wee.
2 Asɑfun bibun bweseru sɔɔ, Sɑkuri kɑ Yosɛfu kɑ Nɛtɑniɑ kɑ Asɑrelɑ. Ben tundo Asɑfuwɑ u rɑ n bu kpɑre. Gɑri yi Gusunɔ u nùn sɔ̃ɔwɑ yiyɑ u rɑ n kɑ womu mɔ̀ nɡe mɛ sinɑ boko u nùn yiire.
3 Yedutum bibun bweseru sɔɔ, Gedɑliɑ kɑ Seri kɑ Esɑi kɑ Hɑsɑbiɑ kɑ Mɑtitiɑ kɑ Simɛiwɑ. Ben tundo Yedutumwɑ u rɑ n bu kpɑre. Gɑri yi Gusunɔ u nùn sɔ̃ɔwɑ, yiyɑ u rɑ n kɑ womu mɔ̀ kɑ mɔrɔku, u n kɑ Gusunɔ siɑrɑmɔ kpɑ u n nùn bɛɛrɛ wɛ̃ɛmɔ.
4 Hemɑnin bibun bweseru sɔɔ mɑɑ, Bukiɑ kɑ Mɑtɑniɑ kɑ Usiɛli kɑ Sebuɛli kɑ Yerimɔti kɑ Hɑnɑniɑ kɑ Hɑnɑni kɑ Eleɑtɑ kɑ Gidɑliti kɑ Romɑnti Esɛɛ kɑ Yosibekɑsɑ kɑ Mɑlɔti kɑ Hotiri kɑ Mɑkɑsiɔti.
5 Beni kpurowɑ bɑ sɑ̃ɑ Hemɑnin bibun bweseru. Hemɑni wiyɑ u rɑ Yinni Gusunɔn dɑm wɔlle sue kpɑ u sinɑ boko sɔ̃ ye Yinni Gusunɔ u ɡeruɑ. Hemɑni wi, u bii tɔn durɔbu mɑrɑ wɔkurɑ nnɛ, bii tɔn kurɔbu mɑɑ itɑ.
6 Tɔn be kpurowɑ bɑ rɑ womusu ko Yinni Gusunɔn sɑ̃ɑ yerɔ kɑ sɛkɛtirɛnu kɑ ɡuunu kɑ mɔrɔkunu kpɑ ben tundobu bɑ n bu kpɑre. Bɑ rɑ ben sɔmburu kowɑ kɑ sinɑ bokon woodɑ. Kpɑ Asɑfu kɑ Yedutum kɑ Hemɑni bɑ n bu ɡbiiye.
7 Be bɑ womusu yɛ̃ kɑ be bɑ bu swĩi, be kpuron ɡeerɑ sɑ̃ɑwɑ ɡoobu kɑ wɛnɛ kɑ nɔɔbɑ itɑ (288).
8 Bɑ tɛtɛ tobɑwɑ bu kɑ sɔmburun kpunɑɑ yi. Bɑ ǹ nɛɛ, bukurowɑ ɡee, ǹ kun mɛ biiwɑ ɡee. Mɛyɑ bɑ ǹ mɑɑ nɛɛ, be bɑ womusu yɛ̃wɑ ɡee, ǹ kun mɛ be bɑ torumɔwɑ ɡee.
9-31 Wuuru kɑ wuurun wiruɡii be bɑ ɡɔsɑ kɑ tɛtɛ, be wee.
Yosɛfu, Asɑfun bweseru sɔɔ, wiyɑ u sɑ̃ɑ ɡbiikoo.
Mɑ Gedɑliɑ u sɑ̃ɑ yiruse.
Mɑ Sɑkuri u sɑ̃ɑ itɑse.
Mɑ Yiseri u sɑ̃ɑ nnɛse.
Mɑ Nɛtɑniɑ u sɑ̃ɑ nɔɔbuse.
Mɑ Bukiɑ u sɑ̃ɑ nɔɔbɑ tiɑse.
Mɑ Yesɑrelɑ u sɑ̃ɑ nɔɔbɑ yiruse.
Mɑ Esɑi u sɑ̃ɑ nɔɔbɑ itɑse.
Mɑ Mɑtɑniɑ u sɑ̃ɑ nɔɔbɑ nnɛse.
Mɑ Simɛi u sɑ̃ɑ wɔkuruse.
Mɑ Asɑrɛli u sɑ̃ɑ wɔkurɑ tiɑse.
Mɑ Hɑsɑbiɑ u sɑ̃ɑ wɔkurɑ yiruse.
Mɑ Subɑɛli u sɑ̃ɑ wɔkurɑ itɑse.
Mɑ Mɑtitiɑ u sɑ̃ɑ wɔkurɑ nnɛse.
Mɑ Yeremɔti u sɑ̃ɑ wɔkurɑ nɔɔbuse.
Mɑ Hɑnɑniɑ u sɑ̃ɑ wɔkurɑ nɔɔbu kɑ tiɑse.
Mɑ Yosibekɑsɑ u sɑ̃ɑ wɔkurɑ nɔɔbu kɑ yiruse.
Mɑ Hɑnɑni u sɑ̃ɑ wɔkurɑ nɔɔbu kɑ itɑse.
Mɑ Mɑlɔti u sɑ̃ɑ wɔkurɑ nɔɔbu kɑ nnɛse.
Mɑ Eliɑtɑ u sɑ̃ɑ yɛnduse.
Mɑ Hotiri u sɑ̃ɑ yɛndɑ tiɑse.
Mɑ Gidɑliti u sɑ̃ɑ yɛndɑ yiruse.
Mɑ Mɑkɑsiɔti u sɑ̃ɑ yɛndɑ itɑse.
Mɑ Romɑnti Esɛɛ u sɑ̃ɑ yɛndɑ nnɛse.
Wuuru bɑɑteren wiruɡii kɑ win yɛnuɡibu bɑ rɑ n sɑ̃ɑwɑ wɔkurɑ yiru.
Be bɑ rɑ sɑ̃ɑ yerun kɔnnɔsu
kɔ̃su