4
1 ɑ sɑ̃ɑwɑ kurɔ burɔ, nɛn kĩnɑsi.
Wunɛn nɔni yi bɑllimɔ nɡe wɑɑ bɑkɑɡii wunɛn sɔnditiɑn wɛ̃rin di.
Wunɛn seri yi sɑ̃ɑ nɡe boo wuuru te tɑ sɑrɑmɑmɔ Gɑlɑdin ɡuuru wɔllun di.
2 Wunɛn donnu nu buriri nɡe yɑ̃ɑ nìn sɑnsu bɑ bɔɔrɑ nu nim nɔrum wee.
Nu mɑɑ nɔɔ nɛwɑ swɛɛ swɛɛ, nin ɡɑrɑ kun kɑnde.
3 Wunɛn nɔɔ ɡɑ swɛ̃riwɑ nɡe tom,
mɑ ɡɑ wɑɑbu wɑ̃.
Wunɛn bɑɑnu nu bɑllimɔwɑ nɡe dire sɔnsɔm biɑ wunɛn sɔnditiɑn wɛ̃rin di.
4 Wunɛn wĩirɑ wɑ̃wɑ nɡe Dɑfidin dii bwereku ɡɑɡu
mi bɑ rɑ tɑbu yɑ̃nu bere.
Wunɛn sɑbɑn bɑtɑnibɑ bɑ sɑ̃ɑ nɡe tɑbu yɑ̃ɑ ni bɑ bwɛ̃ mi.
5 Wunɛn bwɑ̃su sɑ̃ɑ nɡe yɑɑ kpikun binu yiru ni nu yɑkɑsu dimɔ biibiin suunu sɔɔ.
6 Sere sɔ̃ɔ u kɑ du sɑɑru tu kpɛ̃ɑ,
kon dɑ ɡuuru wɔllɔ mi turɑre ye bɑ mɔ̀ miru kɑ turɑre dɛkɑɡiɑ yɑ wɑ̃ɑ.
7 A sɑ̃ɑwɑ kurɔ burɔ, nɛn kĩnɑsi.
A ǹ bɑu ɡɑɡu mɔ.
8 A nɑ su doonɑ sɑɑ Libɑnin ɡuunun di
kɑ Seniri kɑ Hɛɛmɔɔn ɡuurun di
mi ɡbee sinɑnsu kɑ musuku yɑmbɑrɔsu rɑ n wɑ̃ɑ.
9 Bɛsɛn nɔni yì n yinnɑ, ǹ kun mɛ nɑ̀ n wunɛn sɑbɑn bɑtɑni tiɑ wɑ,
wunɛn kĩrɑ rɑ nɛn ɡɔ̃ru kpuro mwɛwɑ, nɛn sesu, nɛn kurɔ.
10 Wunɛn kĩru tɑ nuku dobu mɔ nɛn sesu, nɛn kurɔ.
Wunɛn kĩru tɑ tɑm dobu kere.
Mɛyɑ mɑɑ wunɛn turɑren nuburu tɑ do tɑ turɑre kpuro kere.
11 Wunɛn nɔɔ ɡɑ sɔ̃subu do nɡe tim bɑu.
Tim kɑ bom mu wɑ̃ɑ wunɛn nɔɔ sɔɔ.
Wunɛn yɑ̃nu nu nuburu dowɑ nɡe dɑ̃ɑ te bɑ mɔ̀ sɛduru Libɑniɔ.
12 A sɑ̃ɑwɑ nɡe dɑ̃ɑ ɡbɑɑru te bɑ kɑrɑ koosi, nɛn sesu, nɛn kurɔ.
A sɑ̃ɑwɑ nɡe dɔkɔ ye bɑ kɛnuɑ, ǹ kun mɛ nɡe bwiɑ ye bɑ mɑrɑ.
13 Wunɛn nim mu dɑ̃ɑ ɡbɑɑrun dɑ̃nu yɛ̃kɑmɔ.
Nin binu ni bɑ sokumɔ ɡerenɑdi nu do too.
Mɛyɑ lɑlle kɑ nɑɑdi yɑ mɑɑ kpiɑ mi,
14 kɑ sɑfɑrɑni, kɑ yɑkɑ si su nuburu do, kɑ kɑnɛli,
kɑ dɑ̃ɑ ni bɑ rɑ kɑ turɑre dɛkɑɡiɑ ko, kɑ miru, kɑ ɑloɛsi,
kɑ sere yɑkɑ si su nuburu dobu bo kpuro.
15 Wunɛ ɑ sɑ̃ɑwɑ nɡe dɑ̃ɑ ɡbɑɑrun dɔkɔ
ǹ kun mɛ nɡe bwiɑ ye yɑ nim sumɔ
mɛ mu wee sɑɑ Libɑnin ɡuunun di.
Kurɔ u nɛɛ,
16 sɔ̃ɔ yɛ̃si yɛ̃sikɑn wosu,
i seewo i nɛn dɑ̃ɑ ɡbɑɑrun dɑ̃nu kɔ̃,
kpɑ nin nubu duroru tu yɑri kpuro.
I de nɛn kĩnɑsi u du win dɑ̃ɑ ɡbɑɑru sɔɔ
kpɑ u yen dɑ̃ɑ bii ɡeenu di.
Durɔ u wee
Durɔ u nɛɛ,