6
1 mɑnɑ wunɛn kĩnɑsi wi, u dɑ,
wunɛ wi ɑ kurɔbu kpuro burɑm kere.
Berɑ mɑnɑ u ɡɛre, kpɑ su kɑ nun wi kɑsu.
Kurɔ u nɛɛ,
2 nɛn kĩnɑsi u dɑwɑ win dɑ̃ɑ ɡbɑɑrɔ,
mi turɑre bii wɑ̃ɑ yi yi kpiibu wee,
u kɑ win sɑbenu kpɑrɑ kpɑ u biibii bɔɔri.
3 Nɑ sɑ̃ɑwɑ nɛn kĩnɑsiɡii, mɑ u mɑɑ sɑ̃ɑ nɛɡii.
U win sɑbenu kpɑrɑmɔ biibiin suunu sɔɔ.
Nɡe mɛ kurɔ win wɑsi sɑ̃ɑ
Durɔ u nɛɛ,
4 ɑ ɡirimɑ mɔ nɡe wuu ɡe bɑ mɔ̀ Tirisɑ.
Nɛn kĩnɑsi, ɑ wɑ̃ nɡe Yerusɑlɛmu.
A nɑnum mɔ nɡe tɑbu sĩɑ kɑ yen ɡidi bɔrɑ.
5 A ku mɑɑ mɑn mɛɛri.
Domi wunɛn nɔni yi nɛn kĩru seeyɑmɔ.
Wunɛn seri yi sɑ̃ɑ nɡe boo wuuru
te tɑ sɑrɑmɑmɔ Gɑlɑdin ɡuurun wɔllun di.
6 Wunɛn donnu nu buriri nɡe yɑ̃ɑ nìn sɑnsu bɑ bɔɔrɑ
nu nim nɔrum wee, nu mɑɑ nɔɔ nɛwɑ swɛɛ swɛɛ, nin ɡɑrɑ kun kɑnde.
7 Wunɛn bɑɑnu nu bɑllimɔwɑ nɡe dire sɔnsɔm biɑ wunɛn sɔnditiɑn wɛ̃rin di.
8 Sinɑnibun ɡeerɑ sɑ̃ɑwɑ wɑtɑ,
sinɑ kurɔbu mɑɑ wɛnɛ.
Wɔndiɑbɑn ɡeerɑ kun nɔru mɔ be.
9 Adɑmɑ nɛn kĩnɑsi wi, u ǹ bɑu mɔ,
u sɑ̃ɑwɑ nɛnɛm be sɔɔ.
U sɑ̃ɑwɑ win mɛron bii wɔndiɑ teereru te u kĩ too.
Wɔndiɑ be bɑ nùn wɑ, bɑ nɛɛ,
u sɑ̃ɑwɑ domɑruɡii.
Sinɑnibu kɑ bɑn sinɑ kurɔbu bɑ mɑɑ nùn siɑrɑ bɑ nɛɛ,
10 wɑrɑ u yɑrimɑm wee nɡe buruku sɔ̃ɔ.
Wɑrɑ u wɑ̃ mɛ nɡe suru.
Wɑrɑ u bɑllimɔ nɡe sɔ̃ɔ.
U nɑnum mɔ nɡe tɑbu sĩɑ kɑ yen ɡidi bɔrɑ.
11 Nɑ dɑ dɑ̃ɑ ɡbɑɑrɔ mi dɑ̃ɑ mɑrum wɑ̃ɑ,
n kɑ wɑ yɑkɑsu sù n kpiɑ wɔwɑɔ,
kpɑ n wɑ resɛm tɔ̃kɑ yɑ̀ n kpɑrɑ,
kpɑ n mɑɑ wɑ dɑ̃ɑ te bɑ mɔ̀ ɡerenɑdi tɑ̀ n wɛ̃su sɑ̃ɑ.
12 Nɑ ǹ kɑ bɑɑru nɛn bwɛ̃rɑ mɑn suɑ,
yɑ mɑn doke nɛn tɔmbun tɑbu kɛkɛbɑn suunu sɔɔ yi dumi ɡɑwe.
Kurɔbu kɑ wɔndiɑbɑ bɑ nɛɛ,