27
پولُس و رومئے سپر
1 وهدے کرار بوت ما گۆن بۆجیگا ایتالیایا برئوێن، گڑا پولُسِش گۆن دگه لهتێن بندیگا، جولیوس نامێن اَپسرێئے دستا دات، که چه کئیسرئے لشکرا اَت.
2 ما بۆجیگێا سوار بوت و راه کپتێن که آ چه اَدْرامیتینئے بندنا آتکگ‌اَت و آسیائے دَمگئے اے دگه بندنان رئوگی اَت. تِسالونیکیئے شهرئے اَریسْتَرکاس نامێن مَکْدونیے هم، اے بۆجیگا گۆن اَت.
3 دومی رۆچا، مئے بۆجیگا سئیدونئے بندنا نَنگر دئور دات. اَپسر جولیوس گۆن پولُسا مهربان اَت و اِشتی که پولُس برئوت گۆن وتی دۆستان گِندُک بکنت و آییئے زلورتان پوره بکننت.
4 چه اۆدا پدا راه گپتێن بله گوات مئے دێما اَت، پمێشکا ما کِبْرِسئے جَزیرهئے کَش گپت و اێرگواتا دێما رئوان بوتێن.
5 چه کیلیکیَه و پَمپیلیَهئے زِرکِرّان گوَزان، لیکیَهئے دَمگا، میرَهئے شهرا آتکێن.
6 اۆدا مئے پئوجی اَپسرا دگه بۆجیگے در گێتک که چه مِسرئے شهر اِسْکَنْدَریَها آتکگ‌اَت و ایتالیایا رئوگا اَت. آییا مارا همے بۆجیگا سوار کرت.
7 ما تان بازێن رۆچان مَدان مَدان دێما شتێن و په هیلّتے کْنیدوسئے بندنئے نزّیکا آتک و رَستێن. نون گوات مئے دێما اَت، پمێشکا چه کْریتئے اێرگواتێن پهناتا سَلمونَهئے کِرّا گوَزان، دێما شتێن و
8 په سکّی و سۆریے «زێبا» نامێن بندنێا سر بوتێن که لاسیَهئے شهرئے نزّیکا اِنت.
9 بازێن وهدے زئوال بوتگ‌اَت، تنتنا رۆچگئے ایید هم گوَستگ‌اَت و دریائے سپر باز تُرسناک بوتگ‌اَت، پمێشکا پولُسا آ ڈاه دات و هُژّار کرتنت،
10 گوَشتی: «او واجهان! من اَنچشَ گندان که سکّێن بیمناک و تاوانبارێن سپرے مئے دێما اِنت، نه تهنا په بۆجیگ و بۆجیگئے بار و بُنَگا، په مئے زِندا هم.»
11 بله پئوجی اَپسرا پولُسئے هبرانی سرا دِلگۆش دئیگئے بدلا، بۆجیگئے هُدابُند و ناهُدائے هبر زرتنت.
12 زمستانا آ بندن په دارگا شَرّ نه‌اَت، پمێشکا گێشترێنانی شئور همِش اَت که بۆجیگ چه اۆدا در بکپیت و اگن بوتَ کنت، آ پینیکْسئے بندنا وتا برسێننت و زمستانا اۆدا بگوازیننت. پینیکْسئے بندن، کْریتئے یک بندنے که دێمی چه شمال و جنوبا، مگربئے نێمگا اِنت.
مزنێن توپّان
13 وهدے سُبکّێن زِرباری گوات وشّ وشّا کَشّگا لگّت، گُمانِش کرت که نون آیانی دلئے مُراد پورهَ بیت. گڑا بۆجیگئے نَنگرِش چست کرت و کْریتئے جَزیرهئے پهناتا گران، تئیابئے نزّیکا رئوان بوتنت.
14 بله دێر نگوَست که توپّانێن گواتێا چه کْریتا سر کرت، که آییا گۆریچانی رۆدَراتکئے گواتَ گوَشنت.
15 بۆجیگ گۆن توپّانا دُچار کپت و گواتئے دێمی داشت نکرت، پمێشکا ما وتا گواتئے سپرده کرت و چئول و مئوجان مارا دێما برت.
16 ما گوَنڈێن کئودا نامێن جَزیرهێئے اێرگواتا، په سکّی بۆجیگئے کَٹی دستا آورت.
17 کَٹیئے سر گێجگا رَند، گۆن تئیل و سادان بۆجیگِش چپّ و چاگردا مُهربند کرت که مپرُشیت. تُرستِش چُش مبیت که بۆجیگ، سیرتیسئے بَزێن رێکانی تها مێن برئوت، پمێشکا بۆجیگئے آچارِش اێر گێتک و بۆتک، نون گوات بۆجیگا دێما برگا اَت.
18 بۆجیگ چه گواتئے ترندی و دریائے چئول و مئوجانی مستیا چست و اێر بئیگا اَت، پمێشکا دومی رۆچا، بۆجیگئے بار و بُنَگانی چَگل دئیگا لگّتنت.
19 سئیمی رۆچا، بۆجیگئے بازێن کارگێج و سامانِش هم دستِ وت دریایا دئور داتنت.
20 وهدے تان بازێن رۆچان نه رۆچ گِندگَ بوت و نه اِستار و توپّانێن گوات هم کَشّگا اَت، گڑا ما په وتی زِندئے رَکّگا هچ اُمێت نکَشّت.
21 تان باز رۆچا ورگِش هم نئوارتگ‌اَت. گڑا، پولُس آیانی دێما اۆشتات و گوَشتی: «او مردان! اگن شما منی هبر بزُرتێن و چه کْریتا در مئیاتکێنێت، مئے سرا اینچک سکّی و سۆری نکپتگ‌اَت و اینچک تاوان هم نرَستگ‌اَت.
22 بله نون گۆن شما دَزبندیَ کنان وتی دلا ڈَڈّ کنێت، بۆجیگَ بُڈّیت بله شمئے جندا هچَ نبیت.
23 اے هبرا، من پمێشکا زانان که دۆشی چه هما هُدائے نێمگا که من آییئیگ آن و آییئے هِزمتکار آن، پرێشتگے آتک، منی کَشا اۆشتات و
24 گوَشتی: ‹او پولُس! متُرس، تئو باید کئیسرئے دربارا پێش کنگ ببئے، مان بۆجیگا تئیی همراه هم هُدایا رَکّێنتگ‌اَنت.›
25 او براتان! دلا ڈَڈّ کنێت چیا که منا هُدائے سرا سِتک اِنت و دلجم آن، پرێشتگا هرچے منا گوَشتگ، اَلّما هما ڈئولا بیت.
26 بله مئے بۆجیگ یک جَزیرهێا مێنَ رئوت.»
بۆجیگئے پرُشگ
27 چاردهمی شپا، مئے بۆجیگ اَنگت آدْریاتیکئے زِرا جُمبان و چست و اێر بئیان اَت. شپنێما، جانشۆان گُمان کرت که تئیاب‌گوَر نزّیک اِنت.
28 گڑا آپئے جُهلی‌اِش سۆدت و کِساس کرت که بیست گواز اَت، وهدے بۆجیگ کمّے دێمترا شت پدا آپِش سۆدت و زانتِش که زِرئے جُهلی پانزده گواز اِنت.
29 تُرستِش، چُش مبیت که بۆجیگ آپا گۆن کۆهێا ڈیکّ بوارت. پمێشکا بۆجیگئے پُشتی نێمگا چار نَنگرِش دریایا دئور دات و دْوااِش کرت که زوت‌تر رۆچ ببیت.
30 جانشۆ چه بۆجیگا اێر کپگ و جِهَگا دِلمانگ اتنت، پمێشکا آیان کَٹیئے ساد پَچ کرتنت و دریایا اێر گێتک. آیانی نیمّۆن اِش اَت که چه دێمی نێمگا هم نَنگر آپا اێر بگێجنت.
31 پولُسا گۆن پئوجی اَپسر و سپاهیگان گوَشت: «اگن جانشۆان بۆجیگ یله دات و جِستنت، گڑا شما رَکّتَ نکنێت.»
32 پمێشکا سپاهیگان ساد بُرِّتنت و کَٹی دریایا یله دات.
33 وهدے گوَربام نزّیک بوت، پولُسا سجّهێن دِلبڈّی دات و گوَشتنت: «شما تان چارده رۆچا ودار کرتگ که بارێن چے بیت و وَرد و وراکۆ دست هم نجتگ.
34 پمێشکا من گۆن شما دَزبندیَ کنان چیزّے بوَرێت تان زِندگ بمانێت، چه شما هچکسئے سرئے مودانی ٹالے هم زیانَ نبیت.»
35 پولُسا نان زرتنت، سجّهێنانی دێما هُدائے شُگر گپت و پدا نان تْرُنست و ورگ بُنگێج کرت.
36 چه اِشیا سجّهێنانی دل ڈَڈّ بوت و آ هم ورگا لگّتنت.
37 بۆجیگئے تها ما دوسَد و هپتاد و شش مردم اتێن.
38 وهدے ورگِش وارت و سێر کرت، گَلّهێن دانِش دریایا دئور داتنت تان بۆجیگ سُبکتر ببیت.
39 رۆچ که در آتک، تئیابِش دیست بله نزانتِش کجام سرڈگارا اَنت. تلگێن هۆرے دیستِش که تئیابی رێک اَت، شئورِش کرت، اگن ببیت بۆجیگا همے هۆرا سرَ گێجنت.
40 نَنگرِش بۆتک و دریایا یله کرتنت. بۆجیگئے سُکّانِش که گۆن سادان بستگ‌اَت پَچ کرت و بۆجیگئے دێمی نێمگئے آچار بُرز کرت، تانکه تئیابا سر ببنت،
41 بله آپ اے جاگها تَلگ اَت، پمێشکا بۆجیگئے دێمی نێمگ رێکانی تُمپێا مێن شت و پُشتی نێمگ چه مستێن چئولانی زۆرا پرُشگا لگّت.
42 سپاهیگان کئیدیانی کُشگئے شئور کرت تان چۆ مبیت که چه آیان کَسے اۆژناگ بکنت و بتچیت،
43 بله پئوجی اَپسرا په پولُسئے زِندئے رَکّێنگا سپاهیگ چه اے کارا مکن کرتنت و پرمان دات که اگن کَسے اۆژناگ کرتَ کنت، دریایا کُپّ بکنت و تئیابا برئوت،
44 اے دگه مردم، لهتێن تَهتگێن دارانی کُمکا و لهتێن بۆجیگئے اے دگه ٹُکّرانی سرا وتا هُشکیا برسێننت. اے ڈئولا سجّهێن مردم په وشّی و سلامتی تئیابا اێر کپتنت.