28
ایسّائے جاه جنَگ
(مَرکاس 16:1–8؛ لوکا 24:1–12؛ یوهَنّا 20:1–10)
1 شَبَّتئے رۆچا رَند، بزان یکشَمبِهئے گوَرباما مَریم مَجْدَلیَه و آ دگه مَریم کبرئے چارگا شتنت.
2 یک اَناگت مزنێن زمین‌چَنڈے بوت، چیا که هُداوندئے پرێشتگے چه آسمانا اێر آتک، ڈۆکی لێٹێنت و آییئے سرا نِشت.
3 رَنگ و دْرۆشمی گْرۆکئے پئیما دْرپشگا اَت و گُد و پۆشاکی، برپئے ڈئولا اِسپێت اتنت.
4 نگهپانێن سپاهیگ چه بیمّا لَرزگا لگّتنت و مُردگئے ڈئولا بوتنت.
5 پرێشتگا گۆن جنێنان گوَشت: «متُرسێت! منَ زانان شما ایسّائے شۆهازا اێت که سَلیب کَشّگ بوتگ.
6 آ اِدا نه‌اِنت، اَنچش که وت گوَشتگ‌اَتی زندگ بوتگ و جاهی جتگ، بیاێت هما جاگها بچارێت که اێر کنگ بوتگ‌اَت.
7 اِشتاپیا برئوێت و آییئے مریدان سهیگ کنێت که آ چه مُردگان زندگ بوتگ و چه شما پێسر جَلیلا رئوت، همۆدا آییا گِندێت. نون من شمارا هال دات.»
8 گڑا جنێن په تُرس و هم گۆن وشّی چه کبرئے سرا تچان بوت و شتنت تان اے هالا مریدان سر بکننت.
9 ایسّا بے گَت و گُمانا اَناگت وت گۆن آ جنێنان دُچار کپت و گوَشتی: «دْرود و دْرَهبات!» آ نزّیکا آتکنت، ایسّائے پادِش گپتنت و پرستشِش کرت.
10 ایسّایا گۆن آیان گوَشت: «متُرسێت! برئوێت منی براتان بگوَشێت که جَلیلا برئونت، همۆدا منا گِندنت.»
دینی پێشوا و سپاهیگانی پندل
11 هما وهدا که جنێن پِر ترّگ و رئوگا اتنت، لهتێن نگهپانێن سپاهیگ، دێم په شهرا شت تان دینی پێشوایان چه اے سرگوَستان سهیگ بکننت.
12 دینی پێشوایان، کئومئے کماشانی گِند و نند و شئور و سَلاها رَند، سپاهیگ مزنێن زَرّے لالِچ دات و
13 گوَشتنت: «گۆن مردمان بگوَشێت: ‹شپا ما واب بوتگێن، آییئے مرید آتکگ‌اَنت و جۆنِش دُزِّتگ و برتگ.›
14 اگن والی چه اے هالان سهیگ بوت، شما پرێشان و دِلتپرکه مبێت، ما آییا سرپدَ کنێن که په شما جنجالے مبیت.»
15 سپاهیگان زَرّ زرتنت و اَنچش که سۆج دئیگ بوتگ‌اتنت، هما دابِش کرت. اے کِسّه تان رۆچ مرۆچیگا یَهودیانی نیاما شنگ و تالان اِنت.
جهان و ایسّائے مستاگ
(مَرکاس 16:14–18؛ لوکا 24:36–49؛ یوهَنّا 20:19–23؛ کاسِدانی کار 1:6–8)
16 گڑا یازدهێن مرید جَلیلئے هما کۆهئے سرا شتنت که ایسّایا گۆن آیان گوَشتگ‌اَت.
17 وهدے آیان ایسّا دیست پرستشِش کرت، بله لهتێن اَنگت شکّ اَت.
18 ایسّایا گۆن آیان گوَشت: «آسمان و زمینئے سجّهێن زۆر و واک منی دستا دئیگ بوتگ.
19 پمێشکا، برئوێت سجّهێن کئومان منی مرید بکنێت، پت و چُکّ و پاکێن روهئے ناما پاکشۆدی بدئیێت و
20 آیان درس و سَبک بدئیێت که منی سجّهێن هُکم و پرمانانی سرا کار بکننت. دلجم ببێت، من تان دنیائے هلاسیا، مُدام گۆن شما گۆن آن.»