101
Wapádárén mardom shóháza kanán
Dáuday Zabur.
1 Mehr o adlay sawtá janán,
tará názénán, oo Hodáwand!
2 Bémayáriay ráhá rawán.
Mani kerrá kadi káay?
Gón delpahki wati lógá zenda gwázénán.
3 Wati chammán sell o bazzhnákén chizzáni cháragá naylán,
cha náráhén kárán bézár án, maná gón choshén chizzán kár nést.
4 Gomráhdelén mardomán cha wat dura dárán,
maná gón hecch badiéá kára nabit.
5 Gár o gomsára kanán hamáiá ke wati hamsáhegay báposhtá habara kant.
Hech porkebrén chamm o gorunákén deléay ópárá nakanán.
6 Mani chamm zeminay sará wapádárén mardom shóháza kanant
tánke gón man jahmenend bebant,
hamá kas mani hezmatkár buta kant
ke pa bémayária gardit.
7 Prébkárá mani lógá jágaha nabit o
drógband mani hezmatá korta nakant.
8 Har sohbá molkay sajjahén badkárán tabáha kanán,
radkárán cha Hodáwanday shahrá gár o gomsára kanán.