17
Tai bánzoláni chérá
Dáuday dwá.
1 Oo Hodáwand! Mani barhakkén peryátán beshkon o
nálagánon gósh dár,
dwáyánon beshkon,
ke cha béryáén dap o lonthán dara káyant.
2 Cha tai bárgáhá maná dádrasi o ázáti sar bát,
chammet rásténá begendátant.
3 Taw mani del ázmáesh kortag o shappásán mani cháragá átkagay,
maná chakkásetaget o hech dar nagétkag,
ahdon kortag ke dap gonáh makant.
4 Mardománi kár har ché ke bit,
bale man cha tai lontháni gálá
watá cha zálemáni ráhá dur dáshtag.
5 Mani pádáni pad tai ráhá naksh ant,
pádon nalarzetagant.
6 Oo Hodá! Tará lóthán, chiá ke taw maná passawa dayay,
gósh dár o habaránon beshkon.
7 Wati mehray ajabbatiá pésh bedár!
Taw hamáyána rakkénay
ke cha wati dozhmenán tai gwará mayár o báhótha bant.
8 Maná chó wati chammá besambál o
wati bánzoláni sáhegá chér beday,
9 cha á badkárán ke maná gár o gomsára kanant o
cha hamá jawrén dozhmenán ke maná angerresh kortag.
10 Á wati sengén delán mohra kanant o
áyáni zobán porkebr o gorunákén habara kant.
11 Mani padesh geptagant o hamé annun maná angerresh kortag,
chammesh pa man dótkag tán zeminá dawron bedayant.
12 Á shéréay paymá ant ke pa shekárá shodig ent,
warnáén shéréay paymá ke kaminá neshtag,
13 Oo Hodáwand! Jáh jan, esháni démá dar á o zeminá bejanesh,
gón wati zahmá maná cha badkárán berakkén.
14 Hodáwandá! Maná cha é paymén mardománi dastá ázát kan,
cha é donyáay mardomán ke nasibesh tahná hamé donyá ent o bass,
ke lápánesh cha wati hazánagá séra kanay,
chokkesh báza bant o
áyáni pasht kaptagén chizz pa chokkánesha rasit.
15 Bale man pa pahrézkári tai démá gendán,
ágáh ke bán, cha tai gendagá séra bán.