19
Hodáwanday Sharyat tamán o béayb ent
Pa sázger o washáwázáni sálárá. Dáuday Zabur.
1 Ásmán Hodáwanday shán o mazaniá paddara kant,
borzén arsh áiay dastay kárán.
2 É róch pa á róchá habar rawána kant o
é shap pa á shapá zánt o hekmat darshána kant,
3 na habaré o na gálé,
áyáni tawár eshkonaga nabit.
4 Padá ham áwázesh sarjamén zeminá sheng o tálána bit o
habaresh tán jahánay goddhi marz o simsarána rasant.
Pa róchá, Hodáyá ásmáná tambué bastag,
5 róch sálónkéay paymá cha wati kellahbandá dara kayt o
chó ke pahlawáné shádán maydána kant.
6 Cha ásmánay yak gwaréá dara kayt o
tán á dega gwará chahra wárt,
hech chizzé cha áiay horm o garmiá chér naent.
7 Hodáwanday Sharyat tamán o béayb ent o
jesm o jáná bóda kárit.
Hodáwanday hokm porehtebár ant o
kamzántán dáná o aglmand kant.
8 Hodáwanday rahband rást ant o
delá shádána kanant.
Hodáwanday parmán pák ant o
chammán rozhnága kanant.
9 Hodáwanday tors pák ent o
tán abad páydár.
Hodáwanday parmán barhakk ant o
sarjamiá adl,
10 cha teláhá delkashter, tantaná cha asilén zarr ham,
cha shahdá shirkenter, tantaná cha bénagay kodámay har trampá washter.
11 Tai hezmatkárá cha áyán dháh o hoshdár rasit o
gón áyáni dáragá mazanén mozzé.
12 Kay ent á ke wati radián bezánt o sarpad bebit?
Maná cha wati nazántagén gonáhán pák o sallah kan.
13 Wati hezmatkárá cha gorunák o porkebrén kár o kerdán bedár,
mayl ke mani sará báládast bebant.
Hamá wahdá tamán o béayba bán o
cha har mazanén gonáhá pák.
14 Oo Hodáwand! Mani dapay habar o delay pegr o hayál
tai delá benendátant,
taw ke mani talár o posht o panáh ay.