29
Hodáwanday tawár zórmand ent
Dáuday Zabur.
1 Oo ásmánián! Hodáwandá satá kanét,
Hodáwanday shán o kodratá satá kanét.
2 Hodáwanday námay shán o shawkatá satá kanét,
Hodáwandá mán áiay pák o palgárén drapshnákiá satá kanét.
3 Hodáwanday tawár ápáni sarborá ent,
shán o shawkatay Hodá grandit,
Hodáwand porzórén ápáni sarborá grandit.
4 Hodáwanday tawár zórmand ent,
Hodáwanday tawár drapshnák ent.
5 Hodáwanday tawár gazzána próshit,
Hodáwand Lobnánay gazzána próshit.
6 Á Lobnáná gwaskéay paymá jáha serrénit,
Siryuná jalabén gókéay paymá.
7 Hodáwanday tawár grand o grókén áchesh rawána kant.
8 Hodáwanday tawár gyábáná larzénit,
Hodáwand Kádeshay gyábáná larzénit.
9 Hodáwanday tawár áposén áskána géjénit o
jangalá bé lamb o táka kant.
Áiay parasteshgáhá sajjahén gwánka janant: “Shawkat o shán!”
10 Hodáwand hár o tuppánay sarborá, wati tahtay sará neshtag,
Hodáwand tán abad wati bádsháhi tahtay sará neshtag.
11 Hodáwand wati kawmá wák o kodrat bebakshát,
Hodáwand wati kawmá gón sohl o émeni barkat bedayát.