40
Hodáwandá nókén sawté mani dapá dát
Pa sázger o washáwázáni sálárá. Dáuday Zabur.
1 Gón sabré pa Hodáwandá wadáron kort,
démi gón man tarrént o mani peryáti eshkot.
2 Maná cha johlánkén kalléá dar áworti,
cha gel o gandápá,
mani pádi taláréay sará óshtárént o
gámi mohr kortant.
3 Nókén sawté mani dapá dáti,
may Hodáay satá o sanáay shayr.
Bázéné gendit o mannit o
Hodáwanday sará tawkala kant.
4 Bahtáwar hamá ent ke Hodáwanday sará tawkala kant o
démá gón porkebrénána nakant,
gón hamáyán ke drógén hodáyáni randgiriá gomráh ant.
5 Oo Hodáwand, oo mani Hodá!
Taw pa má bázén ajabén kár o shawré kortag,
hechkas tai matth buta nakant.
Agan belóthán tai káráni bárawá jár bejanán o habar bekanán,
haminchok báz ant ke cha hesábá dar ant.
6 Tará pa hayrát o korbánigá hájaté nést,
bale mani góshet pach kortag,
sóchagi korbánig o gonáháni korbániget nalóthetag.
7 Gorhá gwashton: “Man átkag o tayár án,
mani bárawá ketábay tumárá nebisag butag.
8 Oo mani Hodá! Armánon tai lóth o wáhagay sarjam kanag ent,
tai Sharyat mani delá ent.”
9 Rakkénag o nejátay wasshén hálon mazanén diwáná jár jatag.
Oo Hodáwand! Hamá dhawlá ke taw zánay man wati dap lagám najatag.
10 Tai rakkénókén madaton wati delá chér nadátag,
tai wapádári o nejátbakshiay bárawá habaron kortag o
cha mazanén diwáná tai mehr o wapáon napóshéntag.
11 Oo Hodáwand! Maná cha wati rahmatá zebahr makan,
tai mehr o wapá tán abad maná émen bedárát.
12 Chiá ke béhesábén sakkián maná angerr kortag,
mayárbárián maná geptag o dista nakanán,
cha mani saray mudán gésh ant,
mani del kaptag.
13 Oo Hodáwand! Mehrabáni kan o maná berakkén.
Hodáwandá! Zutt pa mani madatá byá.
14 Á sajjahén ke mani kóshay randá ant o mani marká lóthant
sarjahl o sharmsár bátant,
á ke mani syahróchiay padá ant
poshtá berawát o roswá bátant.
15 Á ke mani sará “hah, haha” kanant
wati sarjahliá hayrán o habakkah bátant.
16 Bale á ke tai shóházá ant
sajjahén tai bárgáhá shádehi kanát o gal o bál bátant,
á ke tai rakkénókén madatesh dóst ent,
modám begwashátant: “Hodáwand mazan ent.”
17 Man garib o hájatmand án,
Hodáwandá mani hayál gwar bát.
Taw mani komak o rakkénók ay.
Oo mani Hodá! Dér makan.