47
Hodá, sajjahén jahánay bádsháh
Pa sázger o washáwázáni sálárá. Kórahay chokkáni Zabur.
1 Oo sajjahén kawmán! Cháp bejanét.
Gón shádmániay borzén sawtán dém pa Hodáyá kukkár kanét.
2 Chiá ke borzén arshay Hodáwand bákamál ent,
sajjahén jahánay mazanén bádsháh.
3 Kawmán may chérdasta kant,
ráján may pádáni chérá.
4 May mirásá pa má gechéna kant,
wati dóstén Ákubay pahrá. Ósht...
5 Hodá shádmániay kukkáráni nyámá borzád shotag,
Hodáwand sornáay tawáray nyámá.
6 Gón wati názénkán Hodáyá satá kanét, názénk janét,
benázénét, may bádsháhá benázénét.
7 Chiá ke Hodá sajjahén jahánay bádsháh ent,
áiá gón shayré benázénét.
8 Hodá kawmáni sará bádsháhia kant,
á wati pákén tahtá neshtag.
9 Kawmáni sarók o master mocch butagant,
gón Ebráhémay Hodáay kawmá yakjáh,
chiá ke jahánay sajjahén sardár, Hodáayg ant,
á béhesáb mazanshán ent.