7
Tai mayár o báhótha bán
Dáuday Shigáyun. Dáudá é Zabur Benyáminay kabilahay Kush námén mardoméay habaráni sawabá pa Hodáwandá darshán kortag.
1 Oo Hodáwand, mani Hodá! Tai báhóth o mayára bán.
Maná cha á sajjahénán ke mani randá kaptagant berakkén.
2 Agan na, á maná shéráni paymá derrant,
chondh chondha kanant o maná rakkénóké nabit.
3 Oo Hodáwand, mani Hodá! Agan man choshén káré kortag o
daston gonáhéá mén ent,
4 agan pa dóstéá badion kortag,
yá ke dozhmené bémayárá poletag,
5 bell ke dozhmen mani padá byayt o
áiay dast pa man berasit,
mani zendá pádmál bekant o
maná hákáni tahá bwápénit. Ósht...
6 Oo Hodáwand! Gón wati hezhmá jáh bejan o
mani dozhmenáni gazabay démá pád á!
Ágáh bay, oo mani Hodá!
Taw ay ke dádrasiay járet jatag!
7 Bell ke kawmáni romb tai gwará yakjáh bant,
cha borzá esháni sará hákemi bekan!
8 Bell ke Hodáwand pa kawmán shawr o hokm beborrit.
Oo Hodáwand! Gón mani rásti o tachkiá,
wati dadrasiá mani pahrézkáriáni sará bekan.
9 Oo ádelén Hodá ke del o darunána zánay!
Badkáráni sherrián halás kan o
pahrézkárán pa del mohr bedár.
10 Mani espar Hodá ent
ke nékdelána rakkénit.
11 Hodá ádelén dadrasé,
Hodáé ke har róch hezhma gipt.
12 Agan ensán pashómán mabit,
wati zahmá téza kant o
wati kamáná kasshit o tayára kant.
13 Áiá koshókén seláh tayár kortag o
wati tirán ácheshéna kant.
14 Á mardomá bechár ke cha sherr o shórá ápos ent o
cha petnahá lápporr, á dróga zayt.
15 Kallé kóchit o johla kant o
hamá chátá kapit ke wat kótkagi.
16 Áiay petnah wati sará kapit o
pasáti ham sará laggit.
17 Hodáwandá pa áiay adl o ensápá shogra gerán,
borzén arshay Hodáwanday námá názénán.