75
Hodá ádel ent
Pa sázger o washáwázáni sálárá. “Barbád makanay” tarzay sará. Asápay Zabur. Sawté.
1 Oo Hodá! Tai shográ gerén,
tai shográ gerén ke tai nám nazzik ent o
mardom tai ajabén káráni habará kanant.
2 Taw gwashay: “Wati gisshéntagén wahdá
pa ensáp dádrasia kanán.
3 Hamá wahdá ke zemin o áiay sajjahén nendóka larzant,
é man án ke áiay pádagán mohra dárán. Ósht...
4 Gón porkebrán gwashán: ‘Pahr mabandét,’ o
gón badkárán: ‘Wati kánthán borz makanét.
5 Wati kánthán enkadar borz makanét o
pa kebr o gorunáki habar makanét.’ ”
6 Chiá ke sarperázi na cha ródarátká kayt,
na cha rónendá o na cha gyábáná.
7 É Hodá ent ke dádrasia kant,
yakkéá éra jant o yakkéá sarborza kant.
8 Chiá ke Hodáay dastá jámé,
cha porjóshén sharáb o tahlagá porr ent.
Sharábá réchit o zeminay sajjahén badkár
áiá tán goddhi trampá warant.
9 Bale man modám Hodáay káráni habará kanán,
Ákubay Hodáyá názénán.
10 “Sajjahén badkáráni kánthána próshán,
bale pahrézkáráni kánth borz dáraga bant.”