86
Wati móleday chokká berakkén
Dáuday dwá.
1 Oo Hodáwand! Wati delgóshá gón man kan o maná passaw day,
ke garib o mohtájé án.
2 Mani zenday negahpániá bekan ke tai dóstdár án,
wati hezmatkárá berakkén ke tai sará tawkala kant.
3 Oo Hodáwand! Mani sará rahm kan,
ke sajjahén róchá tará tawára kanán.
4 Wati hezmatkáray delá shádmán kan, oo Hodáwand,
ke man cha taw dwá lóthán.
5 Taw, oo Hodáwand, nék o bakshendah ay o
pa áyán cha mehrá sarréch ay ke gón taw peryáta kanant.
6 Oo Hodáwand! Mani dwáyán gósh dár,
mani peryát o zárián delgósh kan.
7 Sakkiáni róchá tará tawára kanán,
ke taw passawa dayay.
8 Oo Hodáwand! Hodáyáni nyámá kass tai mattha nabit o
tai kár bématth ant.
9 Oo Hodáwand! Tai jórh kortagén sajjahén kawma káyant o
tará sojdaha kanant,
tai námá shán o shawkata dayant,
10 ke taw mazan ay o ajabén kára kanay,
Hodá tahná taw ay.
11 Wati ráhá maná sój day, oo Hodáwand,
ke tai rástén ráhá berawán,
mani delá sarjamá gón wat kan ke cha tai námá betorsán.
12 Gón tamánén delé tai shográ gerán, oo Hodáwand, mani Hodá!
Tai námá tán abad shán o shawkata dayán
13 ke pa man tai mehr sakk mazan ent,
taw maná cha johlánkián rakkéntag, cha mordagáni jaháná.
14 Oo Hodá! Gorunákén mardom mani helápá pád átkagant,
zórákáni rombé mani koshagay johdá ent o
tará hech mána nayárit.
15 Bale taw, oo Hodáwand, rahm kanók o mehrabánén Hodáé ay,
hezhm geragá déra kanay o mehr o wapáyá sarréch ay.
16 Démá gón man tarrén o mani sará rahm kan,
wati hezmatkárá zór o wák bebaksh o
wati móleday chokká berakkén.
17 Maná wati rahmatáni neshánié beday,
tán hamá ke gón man naprat kanant begendant o sharmendag bebant,
chiá ke taw, oo Hodáwand, maná madat kortag o tasallá dátag.