94
Pád á, oo zeminay dádras!
1 Oo bérgirén Hodá! Oo Hodáwand!
Oo bérgirén Hodá! Wati shán o shawkatá záher kan.
2 Pád á, oo zeminay dádras!
Porkebr o gorunákán sezá day.
3 Tán kadén, oo Hodáwand!
Badkár tán kadén sarzór bebant?
4 É mardom gón kebré habara kanant,
sajjahén badkár batháka janant.
5 Oo Hodáwand! Tai kawmá pádmála kanant o
tai mirásá ázára dayant.
6 Janózám o darámadán koshant o
chórhawán haláka kanant.
7 Gwashant: “Hodáwanda nagendit,
Ákubay Hodá sarpada nabit”.
8 Sarpad bét, oo kawmay názántán!
Oo jáhelán! Kadén ákela bét?
9 Á ke góshi addh kortag, naeshkont?
O á ke chammi addh kortag, nagendit?
10 Á kas ke kawmán sezá dant, áyán adaba nakant?
O á kas ke bani ádamá zánta bakshit, watá zánt o zánagi nést?
11 Hodáwand ensánay sajjahén pegrána zánt,
á zánt ke náhudag o nákár ant.
12 Oo Hodáwand! Bahtáwar ent hamá ke taw áiá adaba kanay,
hamá ke taw gón wati Sharyatá áiá tálima dayay.
13 Taw áiá cha sakkén róchána rakkénay,
tán hamá wahdá ke pa badkárán kallé kóchag bebit.
14 Chiá ke Hodáwand wati kawmá yalaha nakant o
wati mirásá dawra nadant.
15 Dádrasi padá pa ensápa bit,
sajjahén nékdel ensápay randgiriá kanant.
16 Kay ent ke pa manigi badkáráni démá pád byayt?
Kay ent ke pa manigi radkáráni démá bóshtit?
17 Agan Hodáwand mani komak mabutén,
man zutt markay bétawariá bokketagatán.
18 Wahdé gwashton: “Mani pád thagalagá ent”,
tai mehrá, oo Hodáwand, maná cha kapagá dásht.
19 Wahdé sargardána bán,
tai dátagén delbaddhi maná shádmána kant.
20 Choshén béensápén hákemé gón taw yak o tepák buta kant ke
gón wati hokm o kánunán náensápia kárit?
21 Áyáni thóli pahrézkáráni helápá hamdast o hamkára bant o
bégonáhán markay sezá dayant.
22 Bale Hodáwand mani kalát ent,
mani Hodá, mani talár, mani panáhgáh.
23 Hodá, áyáni gonáhán hamáyáni jenday sará pera tarrénit o
áyán, áyáni jenday badén káráni tahá gár o gomsára kant.
Haw, may Hodáwand áyán gár o tabáha kant.