7
Sitifen eyo꞉ towo꞉ wido꞉
1 Sitifen e mo꞉walila꞉la꞉ga꞉ dotabikiyo꞉, bobalo꞉ so꞉mea꞉sen misa꞉ kalu a꞉ma꞉yo꞉ emo꞉wo꞉ a꞉la꞉dabu ba꞉ba꞉, “To gemo꞉lo꞉ mo꞉walilakilo꞉ sa꞉lab we hendeleyo꞉?”
2-3 To elo꞉ dabu ba꞉dab a꞉no꞉, a꞉ma꞉la꞉ sa꞉lakiyo꞉ a꞉la꞉sio꞉, “Nao i, do i, gio꞉ dabuma! Nili ma꞉mu Ablaham eyo꞉ Halan amisa꞉n amio꞉ semo꞉ ha꞉naki, Mesobotemia hen a꞉naka o꞉sen amio꞉, Gode halaido꞉ a꞉no꞉ elo꞉wa fa꞉la꞉dowakiyo꞉, emo꞉wo꞉ a꞉la꞉sio꞉, ‘Ge go꞉no꞉n mo꞉mio꞉ o꞉lia꞉, go꞉no꞉n hen o꞉lia꞉yo꞉ ta꞉taki, hen ko꞉li nilo꞉ gemo꞉lo꞉ walama꞉no꞉ a꞉no꞉, ge a꞉na mesa꞉ni hamana.’
4 A꞉la꞉sa꞉labikiyo꞉, Ablaham e Kaldia hen a꞉no꞉ kata꞉ta꞉sa꞉ga꞉, Halan amisa꞉n a꞉na ha꞉na꞉sa꞉ga꞉ sen. A꞉na sen ami iyayo꞉ sowabikiyo꞉, Gode eyo꞉ e a꞉na a꞉la꞉ta꞉ga꞉ tililia꞉ga꞉, o꞉go꞉do꞉ gilo꞉ sab hen wena tililia꞉ mio꞉.
5 Ho꞉len a꞉namio꞉, hen ha꞉lu nowo꞉ emo꞉wo꞉ mada mo꞉dimi. Ko꞉sega Godeya꞉ emo꞉ dinali sa꞉laki a꞉la꞉sio꞉, ‘Niyo꞉ hen we tambo ge o꞉lia꞉ gilo꞉ so꞉wa sa꞉la꞉la꞉i ha꞉nab o꞉lia꞉mo꞉wo꞉ dimia꞉no꞉.’ Ablaham e so꞉walo꞉ma dowo꞉ ko꞉sega, Gode eyo꞉ emo꞉wo꞉ a꞉la꞉dinali salifa꞉.
6 Gode eyo꞉ emo꞉wo꞉ a꞉la꞉sio꞉, ‘Gi so꞉wa sa꞉la꞉la꞉i ha꞉na꞉lab i a꞉no꞉ ini heno꞉ ta꞉ta꞉sa꞉ga꞉, hen noma꞉lo꞉wa mageso꞉ kalu ko꞉lo꞉ mio꞉ san o꞉ngo꞉ mesa꞉ib ko꞉lo꞉, donayo꞉ 400 a꞉la꞉fo꞉ a꞉na silikiyo꞉, hendo꞉ biso꞉ kalu iliyo꞉ iyo꞉ madali nanogdo꞉ dian kalu dowaki, iyo꞉ dikidi sa꞉ndamela꞉ib.
7 Ko꞉sega niyo꞉ ilo꞉ da꞉ibo꞉ so꞉wa doma꞉kilo꞉ ta꞉fo꞉ kalu i a꞉no꞉ mo꞉walilakiyo꞉ wa꞉dema꞉no꞉. A꞉la꞉ta꞉ga꞉ tif amio꞉ niyo꞉ gi so꞉wa sa꞉la꞉la꞉i ha꞉nab i a꞉no꞉ a꞉ma꞉la꞉ tililia꞉ga꞉, hen wena siliki, nemo꞉wo꞉ wabulu sa꞉la꞉mela꞉ib.’ Gode eyo꞉ a꞉la꞉salifa꞉
8 A꞉la꞉dinali sio꞉ ko꞉lo꞉, emo꞉lo꞉ dinali sio꞉ a꞉no꞉ ele ba꞉ba꞉no꞉ a꞉lakiyo꞉, ‘Ge do꞉go꞉fo꞉ hege gedema꞉ib’ a꞉la꞉salifa꞉ ko꞉lo꞉, Ablaham eyo꞉ Aisa꞉go꞉ sa꞉la꞉liakiyo꞉, ho꞉len ola꞉fo꞉wo꞉ ta꞉ta꞉ga꞉yo꞉, do꞉go꞉fo꞉ hege gede alifa꞉. A꞉la꞉go꞉ko꞉lo꞉ tif amio꞉ Aisa꞉g eyo꞉ Ya꞉kobo꞉ sa꞉la꞉li, a꞉la꞉ta꞉ga꞉ Ya꞉kob eyo꞉ so꞉wa kugula꞉fo꞉wo꞉ sa꞉la꞉li ko꞉lo꞉, so꞉wa i a꞉na a꞉la꞉ta꞉ga꞉yo꞉ Isolaela꞉ eso꞉lo꞉ kugula꞉fo꞉wo꞉ a꞉na fa꞉la꞉dowo꞉.
9-10 “Nili ma꞉mu, Ya꞉koba꞉ insiso꞉i nolba꞉yo꞉ Yosa꞉bo꞉wo꞉ kele asula꞉sa꞉ga꞉, e Isib kaluwa꞉ da꞉ibo꞉ kalu doma꞉ki, moleya꞉ kilili. Ko꞉sega Gode eyo꞉ Yosa꞉b e hida꞉yo꞉ ba꞉dab a꞉namio꞉, e o꞉lia꞉ dofo꞉liki asufa꞉ ko꞉lo꞉, emo꞉wo꞉ asulo꞉ alan dimiabiki, Isib misa꞉ kalu, Fa꞉lo꞉wa꞉ siwa꞉l amio꞉ Yosa꞉ba꞉ ene mano꞉ nafa ba꞉da꞉sa꞉ga꞉, Fa꞉lo꞉ e sagalaki, Isib hen o꞉lia꞉ ene a o꞉lia꞉yo꞉ Yosa꞉b emo꞉ bo꞉fo꞉melea꞉ki ta꞉fo꞉.
11 “A꞉la꞉ta꞉ga꞉ Isib hen o꞉lia꞉ Ka꞉ina꞉n hen a꞉namio꞉ maiyo꞉wo꞉ alan fa꞉la꞉dowaki, hida꞉yo꞉ alan dowo꞉ ko꞉lo꞉, ni ma꞉muwa꞉yo꞉ ma꞉no꞉ ma꞉no꞉wo꞉ aundo꞉ma dowo꞉.
12 A꞉la꞉fo꞉ko꞉lo꞉ Ya꞉kob eyo꞉ Isib hen amio꞉ ma꞉no꞉wo꞉ da꞉laka꞉ a꞉la꞉sa꞉labiki da꞉da꞉sa꞉ga꞉yo꞉, eyo꞉ nili ma꞉mu iyo꞉ tamin amio꞉ a꞉na iliga꞉fo꞉.
13 Iyo꞉ andeb ane amio꞉, Yosa꞉b eyo꞉ ao imo꞉wo꞉ eneno꞉ a꞉na wida꞉sa꞉ga꞉ dowabiki, Fa꞉lo꞉ e Yosa꞉ba꞉ so꞉lo꞉wo꞉ welo꞉b a꞉la꞉bo꞉ a꞉na asulo꞉.
14-15 A꞉ma꞉ fa꞉s amio꞉, Yosa꞉b eyo꞉ ene iya Ya꞉kob o꞉lia꞉ ene so꞉lo꞉ o꞉lia꞉yo꞉ elo꞉wa tambo mena꞉ki saga꞉fo꞉. To saga꞉fo꞉ a꞉no꞉ da꞉da꞉sa꞉ga꞉, Ya꞉kobo꞉ Isib ane ko꞉lo꞉, Ya꞉koba꞉ so꞉lo꞉ Isibdo꞉ a꞉lab a꞉no꞉lia꞉ agelo꞉wo꞉ do꞉la꞉fo꞉ dom a꞉la꞉ta꞉ga꞉ bila꞉fo꞉ ko꞉lo꞉ fa꞉la꞉dowo꞉. A꞉la꞉ta꞉ga꞉ Ya꞉kob o꞉lia꞉ ene so꞉wayo꞉lo꞉ a꞉naka sowo꞉.
16 Tif amio꞉ inin ki a꞉no꞉ a꞉ma꞉la꞉ dia꞉ya꞉sa꞉ga꞉, Sekem hen a꞉namio꞉, Hamola꞉ ene so꞉lo꞉wa꞉ heno꞉ Ablaham eyo꞉ tamina moleya꞉ kilili ko꞉lo꞉ ene kiyo꞉ a꞉na daido꞉.
17 “Gode eyo꞉ Ablahambo꞉lo꞉ dinali sio꞉ ho꞉leno꞉ ko꞉na꞉ma fa꞉la꞉dowabiki, Isib a꞉namio꞉ Isolael kaluka꞉isaleyo꞉ mada modo꞉ ko꞉lo꞉ fa꞉la꞉dowo꞉.
18-19 A꞉la꞉ta꞉ga꞉ Isib a꞉namio꞉ misa꞉ kalu ho꞉gi fa꞉la꞉dowakiyo꞉, eyo꞉ Yosa꞉bo꞉ mo꞉fanda asulo꞉ ko꞉lo꞉, eyo꞉ ni ma꞉mu imo꞉wo꞉ dikida꞉sa꞉ga꞉ hida꞉yo꞉wo꞉ alan dimi. A꞉la꞉gabiki, eyo꞉ inin so꞉wa sa꞉la꞉liab a꞉no꞉ ka soma꞉ki, sa꞉la꞉ buluga꞉fela꞉bi a꞉la꞉saefa꞉.
20 “Ho꞉len a꞉namio꞉, Godeya꞉ siwa꞉l amio꞉ Mo꞉sa꞉s e mada gesego꞉ ko꞉lo꞉ sa꞉la꞉li. Ele otalen us a꞉namio꞉ iyaya꞉ aya siliki bo꞉fo꞉len.
21 Ko꞉sega iyo꞉ misa꞉ kaluwo꞉ tagilaki, e ha꞉la꞉ya ta꞉fa꞉ni ane ko꞉lo꞉, Isib misa꞉ kaluwa꞉ ida꞉ya꞉ ta꞉ulia꞉ga꞉, ene so꞉wayo꞉ o꞉ngo꞉ fofo꞉.
22 A꞉la꞉fo꞉ko꞉lo꞉ Isib kalu ili mano꞉ Mo꞉sa꞉s emo꞉wo꞉ tambo walali ko꞉lo꞉, Mo꞉sa꞉s elo꞉ to sa꞉lan o꞉lia꞉ man dimidan o꞉lia꞉yo꞉ halaido꞉lo꞉ di kalu ko꞉lo꞉ fa꞉la꞉dowo꞉.
23 “Mo꞉sa꞉s e donayo꞉ do꞉la꞉fo꞉ fa꞉la꞉da꞉ino꞉ ta꞉ta꞉ga꞉ dowabiki, Isolael kaluka꞉isale ene ao i a꞉no꞉ ba꞉ba꞉ ha꞉na꞉no꞉ asulo꞉.
24 E a꞉na elen amio꞉, Isib kalu noma꞉yo꞉ Isolael kaluwo꞉ mogagi dikidi sa꞉ndabiki ba꞉ba꞉ ko꞉lo꞉, eyo꞉ Isolael kalu a꞉no꞉ asuwa꞉taki wa꞉deakiyo꞉, Isib kalu a꞉no꞉ sanaefa꞉.
25 Mo꞉sa꞉s eyo꞉ a꞉la꞉asulo꞉. Gode eyo꞉ eya a꞉la꞉ta꞉ga꞉yo꞉ kaluka꞉isaleyo꞉ tambo asuwa꞉taki gasiliab a꞉la꞉asulo꞉. A꞉la꞉ta꞉ga꞉ Mo꞉sa꞉s eyo꞉ ene ao i a꞉ma꞉yo꞉lo꞉ asulo꞉wo꞉ imilise o꞉ngo꞉ doma꞉ib a꞉la꞉asulo꞉ ko꞉sega iliyo꞉ a꞉la꞉bo꞉ mo꞉fanda asulo꞉.
26 Ho꞉len no amio꞉, Mo꞉sa꞉s e Isolael kalu a꞉la꞉ nowo꞉ buba꞉lena ba꞉ba꞉. E ba꞉da꞉ga꞉, a꞉la꞉yo꞉ ha꞉sa mesea꞉ki sagale alitakiyo꞉, towo꞉ a꞉la꞉sio꞉, ‘Gao gaino꞉, waga bubadi?’
27 Ko꞉sega kalu noldo꞉ sa꞉nda꞉likilo꞉ ha꞉nab a꞉ma꞉yo꞉, Mo꞉sa꞉s e kanilaki, emo꞉wo꞉ a꞉la꞉sio꞉, ‘Nio꞉ gi bo꞉fo꞉liki mo꞉walila꞉lubika꞉ a꞉la꞉bo꞉, abe saefa꞉yo꞉?
28 Alilo꞉ Isib kalu nowo꞉ gilo꞉ so꞉no꞉ aumbo꞉, o꞉go꞉lo꞉ nelo꞉ gi sanaefa꞉nigaya?’
29 To sa꞉lab a꞉no꞉ da꞉da꞉sa꞉ga꞉, Mo꞉sa꞉s e nai ha꞉na꞉ga꞉, Isib heno꞉ ta꞉ta꞉ga꞉, Midian hen a꞉na ha꞉na꞉sa꞉ga꞉yo꞉, e mageso꞉ kalu o꞉ngo꞉ a꞉na sa꞉sen. A꞉na silikiyo꞉, so꞉wayo꞉ a꞉la꞉ ko꞉lo꞉ sa꞉la꞉li.
30 “Mo꞉sa꞉s e hen a꞉na sen amio꞉, donayo꞉ do꞉la꞉fo꞉ fa꞉la꞉da꞉ino꞉ a꞉na gulula꞉sa꞉ga꞉yo꞉, e kalaleli hen Sainai misio꞉ anib doba꞉da꞉ sia꞉len amio꞉, i abol ko꞉lo꞉ nudula꞉ a꞉no꞉ deyo꞉ wa꞉sowala꞉lena ba꞉ba꞉. A꞉la꞉ta꞉ga꞉ delo꞉ wa꞉sowala꞉lab us a꞉namio꞉ ma꞉mul kaluwo꞉ a꞉na elena ba꞉ba꞉.
31 Mo꞉sa꞉s eyo꞉ ba꞉da꞉ga꞉yo꞉, e moda꞉sa꞉ga꞉, e ma꞉uwa꞉ya ba꞉ba꞉ni ha꞉nabiki, Gode Alana꞉ towo꞉ a꞉na dabu.
32 Gode eyo꞉ Mo꞉sa꞉s emo꞉wo꞉ a꞉la꞉sio꞉, ‘Ne gi ma꞉mu Ablahamo꞉, Aisa꞉go꞉, Ya꞉kobo꞉ i a꞉ma꞉ Godeyo꞉ Ne.’ A꞉la꞉sa꞉labiki Mo꞉sa꞉s e tagilaki bibisoda꞉sa꞉ga꞉, e mo꞉sikudu ba꞉ba꞉.
33 “A꞉la꞉ta꞉ga꞉ Gode eyo꞉ emo꞉wo꞉ a꞉la꞉sio꞉, ‘Hen gelo꞉ kagafo꞉lab we mada malilo꞉ hen ko꞉lo꞉, gi gido꞉fo꞉ amilo꞉ budi sa꞉ga꞉lo꞉ ko dugula꞉ma!
34 Kaluka꞉isale nilo꞉ ko꞉lo꞉ Isib hen ami silikilo꞉ hida꞉yo꞉ ililo꞉ diab a꞉no꞉ ne ba꞉ba꞉. Ne ililo꞉ ya꞉la꞉lab a꞉no꞉ da꞉da꞉sa꞉ga꞉, ne iyo꞉ ko꞉lo꞉ sili alifa꞉ni mio꞉. A꞉la꞉fo꞉ko꞉lo꞉ ge mena. Niyo꞉ ge a꞉ma꞉la꞉ Isib iliga꞉fa꞉nigo꞉l.’ Gode eyo꞉ a꞉la꞉sio꞉.”
35 A꞉la꞉fo꞉ko꞉lo꞉ Sitifen eyo꞉ to nolo꞉ a꞉kudu sio꞉, “Isolael kaluka꞉isale iliyo꞉ Mo꞉sa꞉s e gola ba꞉dakiyo꞉, emo꞉wo꞉ a꞉la꞉sio꞉, ‘Nio꞉ gi bo꞉fo꞉liki mo꞉walila꞉lubika꞉ a꞉la꞉bo꞉, abe saefa꞉yo꞉?’ Iliyo꞉ a꞉la꞉sio꞉ ko꞉sega kalu imilig a꞉no꞉ko꞉ Gode eyo꞉ ma꞉mul kalu ko꞉lo꞉ de wa꞉sowaya amilo꞉ handalowab a꞉ma꞉ ilikiyo꞉, Mo꞉sa꞉s e Isolael kaluka꞉isaleyo꞉ sili alita꞉ga꞉ bo꞉fo꞉melea꞉ki iliga꞉fo꞉.
36 Kalu imilig a꞉ma꞉ka iyo꞉ Isibdo꞉ seno꞉ sililia꞉ga꞉ handaloma꞉nikiyo꞉, eyo꞉ molo ha꞉na꞉no꞉wo꞉ modo꞉ dimido꞉. Isib hen amio꞉lo꞉, ho꞉n genelo꞉ amio꞉lo꞉, a꞉la꞉ta꞉ga꞉ Isolael kaluka꞉isaleyo꞉ dona do꞉la꞉fo꞉ fa꞉la꞉da꞉ino꞉ kalaleli hen usa sia꞉likiyo꞉lo꞉, e tililia꞉ ha꞉na꞉likiyo꞉, molo ha꞉na꞉no꞉wo꞉ dimida꞉len.
37 “Mo꞉sa꞉s imilig eka Isolael kaluka꞉isalemo꞉wo꞉ a꞉la꞉sio꞉, ‘Gode eyo꞉ Isolael gi amio꞉ kalu nowo꞉ da꞉fea꞉sa꞉ga꞉, e dinali sa꞉lan kalu ne o꞉ngo꞉ doma꞉ki fa꞉la꞉do alifa꞉ib.’
38 Isolael kaluka꞉isaleyo꞉ kalaleli hena siliki kegea꞉len amio꞉, Mo꞉sa꞉so꞉ i o꞉lia꞉ elen. A꞉la꞉ta꞉ga꞉ ni ma꞉mui Isolael i o꞉lia꞉ elen amio꞉, e misio꞉ Sainai fa꞉la꞉dowo꞉ a꞉namio꞉, ma꞉mul kaluwo꞉ e o꞉lia꞉ tola꞉. A꞉la꞉fo꞉ko꞉lo꞉ eyo꞉ to mela꞉no꞉lo꞉ a꞉lab a꞉no꞉ nimo꞉ malolo꞉ mea꞉niki di.
39 “Ko꞉sega nili ma꞉mu iya꞉yo꞉ Mo꞉sa꞉sa꞉ towo꞉ mo꞉kudu ha꞉naki, iliyo꞉ Mo꞉sa꞉s e gola ba꞉da꞉sa꞉ga꞉, asulo꞉ inido꞉wo꞉ a꞉ma꞉la꞉ Isib ane.
40 A꞉la꞉fo꞉ko꞉lo꞉ iliyo꞉ A꞉lonbo꞉wo꞉ a꞉la꞉sio꞉, ‘Mo꞉sa꞉s nilo꞉ Isib a꞉la꞉ta꞉ga꞉lo꞉ tililia꞉mio꞉ we, e amio꞉ o꞉b fa꞉la꞉dowaba꞉le babalab ko꞉lo꞉, giyo꞉ gode nolo꞉ nilo꞉ tililia꞉ga꞉lo꞉ tamifo꞉ ha꞉na꞉no꞉wo꞉ dimidama’ a꞉la꞉sio꞉.
41 Ho꞉len a꞉namio꞉ iliyo꞉ madali godeyo꞉, kao inso꞉ o꞉ngo꞉ a꞉na dimida꞉sa꞉ga꞉ ta꞉fo꞉liki, iliyo꞉ o꞉mo꞉ boba so꞉meaki gulugulula꞉len. Iliyo꞉ ini dagiya꞉lo꞉ dimido꞉ gode a꞉no꞉ ko꞉lo꞉ wabudakiyo꞉, ma꞉no꞉ nakiyo꞉ sagalo꞉wo꞉ alan dowo꞉.
42 Iliyo꞉ a꞉la꞉dimidabikiyo꞉, Gode eyo꞉ iyo꞉ gola ba꞉da꞉sa꞉ga꞉, iyo꞉ ofo꞉, tamino꞉, eleyo꞉, a꞉no꞉ ko꞉lo꞉ wabuluma꞉ki ta꞉fo꞉. Dinali sa꞉lan kaluwa꞉ bugo꞉ amio꞉ a꞉la꞉sa꞉sa꞉lo꞉,
“ ‘Isolael kaluka꞉isale gio꞉, kalaleli hen amio꞉ dona do꞉la꞉fo꞉ fa꞉la꞉da꞉in a꞉namio꞉ no꞉wo꞉ sa꞉nda꞉sa꞉ga꞉lo꞉ so꞉kugulu mean a꞉no꞉ dimi.
Ko꞉sega giliyo꞉ ne wabudakiyo꞉, hendelelo꞉ mo꞉dimi.
43 Gio꞉ gulugululan helebeso꞉g a dia꞉likilo꞉ sia꞉len a꞉no꞉ madali gode Moleg eno꞉
a꞉la꞉ta꞉ga꞉ madali gode tamin ko꞉lo꞉ wabudab a꞉no꞉ Lafan eno꞉.
Gini dagiya꞉ madali gode a꞉no꞉ dimida꞉sa꞉ga꞉, o꞉mo꞉wo꞉ wabulu sio꞉.
A꞉la꞉fo꞉ko꞉lo꞉ niyo꞉ gini hende amio꞉ a꞉ma꞉la꞉yo꞉ mo꞉mena꞉ki, Babilon heno꞉ tiginita꞉ga꞉ ko꞉na꞉ ta꞉foma꞉ki ta꞉fa꞉no꞉.’ Dinali sa꞉lan kaluwa꞉yo꞉ a꞉la꞉sa꞉sa꞉lo꞉.
44 “Kalaleli hen a꞉namio꞉ nili ma꞉mu iyo꞉ a꞉na sia꞉likiyo꞉, Godelo꞉ dowa꞉sen so꞉g a a꞉no꞉ ili dia꞉ sia꞉len. So꞉g a a꞉no꞉ dia꞉no꞉wo꞉, Gode eyo꞉ Mo꞉sa꞉sbo꞉ wido꞉ ko꞉lo꞉, elo꞉ sio꞉ o꞉leau kudu ha꞉naki dimido꞉.
45 Tif amio꞉ ni ma꞉mu i a꞉ma꞉yo꞉ ini so꞉wamo꞉wo꞉ so꞉g a a꞉no꞉ dimi ko꞉lo꞉ iyo꞉ dia꞉li ha꞉na꞉sa꞉ga꞉yo꞉, Yosua e tililia꞉ ha꞉nakiyo꞉, iyo꞉ Godeya꞉ halaido꞉ o꞉lia꞉ma꞉yo꞉, ha꞉la꞉ kalu hen a꞉namilo꞉ sano꞉ o꞉luga꞉felesa꞉ga꞉yo꞉, so꞉g a a꞉no꞉ a꞉na dialifa꞉. A꞉la꞉ta꞉ga꞉ a a꞉no꞉ ho꞉len a꞉na a꞉la꞉ta꞉ga꞉lo꞉ dowa꞉i mio꞉wo꞉, Isolael misa꞉ Da꞉ibid ho꞉len a꞉na edo꞉.
46 Gode eyo꞉ Da꞉ibid e sagale alifa꞉ ko꞉lo꞉, Da꞉ibid eyo꞉ a ho꞉gi nowo꞉ Ya꞉koba꞉ Gode mesea꞉ki dia꞉nikiyo꞉, Godemo꞉wo꞉ dabu ba꞉ba꞉.
47 Ko꞉sega Godeya꞉ a a꞉no꞉ inso꞉ Solomona꞉ di.
48 “Ko꞉sega Gode Iwalulo꞉ A꞉lab E henfelo꞉ kaluwa꞉lo꞉ a dimido꞉ usamio꞉ mo꞉san. Dinali sa꞉lan kaluwa꞉yo꞉, Godeya꞉ towo꞉ sa꞉lakiyo꞉ a꞉la꞉sio꞉,
49 “ ‘Hebene halo misa꞉ kalu nelo꞉ mesa꞉no꞉ i fofodo꞉wo꞉ o꞉m,
a꞉la꞉ta꞉ga꞉ henfelo꞉ we ni gido꞉fo꞉lo꞉ wa꞉la꞉fo꞉mela꞉no꞉wo꞉ o꞉m.
A꞉la꞉fo꞉ko꞉lo꞉ a nelo꞉ mesa꞉no꞉ o꞉leo꞉ngo꞉wo꞉ gio꞉ waga dia꞉no꞉wo꞉?
Nelo꞉ ha꞉salo꞉ mesa꞉no꞉ ayo꞉ mada mo꞉dialifa꞉ib.
50 Mo꞉wo꞉ kelego꞉ we no꞉no꞉n tambo dimido꞉.’ Godeya꞉ a꞉la꞉sio꞉.”
51 Sitifen eyo꞉ to kudu sa꞉lakiyo꞉ a꞉la꞉sio꞉, “Asulo꞉ gililo꞉wo꞉ halaido꞉ dowa꞉sa꞉ga꞉, ka꞉la꞉no꞉ kali ko꞉lo꞉, asulo꞉ gililo꞉wo꞉ ha꞉la꞉ kalu o꞉ngo꞉ dowo꞉. Godeya꞉ Mamaya꞉lo꞉ gimo꞉lo꞉ to sa꞉lab a꞉no꞉, giliyo꞉ ho꞉leno꞉ tambo gola ba꞉da꞉sen. Giliyo꞉ ge ma꞉mu ima꞉lo꞉ man dimida꞉sen au dimida꞉lab.
52 Gi ma꞉mu iyo꞉ Godeya꞉lo꞉ dinali sa꞉lan kaluwo꞉ tambo mo꞉beaki, imo꞉wo꞉ hida꞉yo꞉wo꞉ dimia꞉sen. A꞉la꞉ta꞉ga꞉ tamin amio꞉ dinali sa꞉lan kalu nolba꞉ widakiyo꞉, Godeya꞉ Ene Digalo꞉ Kaluwo꞉ mia꞉ib a꞉la꞉do꞉ sio꞉ i a꞉no꞉lo꞉, iliyo꞉ sana sowa꞉sen. A꞉la꞉go꞉ko꞉lo꞉ o꞉go꞉ kalu a꞉no꞉ mio꞉ ko꞉lo꞉ giliyo꞉ E teledowa꞉sa꞉ga꞉ sana sowo꞉.
53 Godeya꞉ ma꞉mula꞉ kaluwa꞉yo꞉ ene eleyo꞉ gininbo꞉wo꞉ dimi ko꞉sega giliyo꞉ mo꞉kudu ane.” Sitifen eyo꞉ towo꞉ a꞉la꞉wido꞉.
Sitifen e uwa꞉ sana sowo꞉
54 A꞉la꞉fo꞉ko꞉lo꞉ Yu misa꞉ kaluwa꞉yo꞉ Sitifena꞉ to a꞉no꞉ da꞉da꞉ga꞉yo꞉, mada beso꞉ galita꞉ga꞉, emo꞉wo꞉ kulufa꞉yo꞉wo꞉ alan dowo꞉.
55 Ko꞉sega Sitifen e Godeya꞉ Mamayo꞉ e amio꞉ wa꞉lifo꞉ ko꞉lo꞉, eyo꞉ Hebeneyo꞉ alolo ba꞉ba꞉ amio꞉, Godeya꞉ ene halaido꞉ malilo꞉wo꞉ ba꞉da꞉ga꞉yo꞉, Ya꞉suwo꞉ Godeya꞉ ene dagi ililiba kagayabiki ba꞉ba꞉.
56 A꞉la꞉ta꞉ga꞉ eyo꞉ a꞉la꞉sio꞉, “Gio꞉ bo꞉ba! Ne Hebeneyo꞉ kolaetabiki ba꞉ba꞉ amio꞉, Kalule Dowo꞉ E Godeya꞉ ene dagi ililiba kagayabiki bo꞉do꞉l.”
57-58 Iyo꞉ to a꞉no꞉ da꞉da꞉sa꞉ga꞉yo꞉, ini ka꞉la꞉no꞉ ka꞉la꞉sa꞉ga꞉, emo꞉wo꞉ halale sio꞉. A꞉la꞉ta꞉ga꞉ iyo꞉ tambo elo꞉wa nai ha꞉na꞉ga꞉, e ta꞉lia꞉sa꞉ga꞉, amisa꞉n ha꞉la꞉ya susululia꞉ga꞉, uwa꞉ agodo꞉. Iliyo꞉ a꞉la꞉dimidabikiyo꞉, Sitifen elo꞉ mo꞉dimido꞉lo꞉ dikili sio꞉ kalu i a꞉ma꞉yo꞉ helebeso꞉g wa꞉l amilo꞉ kafo꞉leno꞉ hagulia꞉sa꞉ga꞉, kalu so꞉wa So꞉l a꞉ma꞉ gido꞉fo꞉ aniba difa꞉.
59 Iliyo꞉ uwa꞉ agodabikiyo꞉, Sitifen eyo꞉ Godemo꞉ dulugu sa꞉lakiyo꞉ a꞉la꞉sio꞉, “Ya꞉su Alan, giyo꞉ ni mama mela꞉no꞉wo꞉ dima.”
60 A꞉la꞉sa꞉la꞉sa꞉ga꞉yo꞉, e tulu alila꞉sa꞉ga꞉ gulalu silikiyo꞉, towo꞉ halaido꞉ sa꞉laki, “Alan giyo꞉, mogago꞉ ililo꞉ dimidab we, ga꞉lilaki wa꞉dea꞉so꞉bo.” Sitifen e to a꞉no꞉ sa꞉la꞉sa꞉ga꞉yo꞉, e ha꞉fo꞉wo꞉ siliga꞉taki sowo꞉.