Mo꞉fo꞉s We
Hibulu
Kaluka꞉isalemo꞉ Sa꞉sa꞉liga꞉fo꞉
Asuluma꞉no꞉ Towo꞉ We
Hibulu bugo꞉ we kalu abe sa꞉sa꞉lo꞉wa꞉le, nio꞉ babalab. Kalu nolba꞉ asulakiyo꞉, Fo꞉la꞉ sa꞉sa꞉lo꞉wa꞉le, nolba꞉yo꞉ Banabasa꞉le, nolba꞉yo꞉ Abolo꞉sa꞉le, a꞉la꞉asulab. Ko꞉sega bugo꞉ welo꞉ sa꞉sa꞉lo꞉wo꞉ mo꞉fanda sio꞉ ko꞉lo꞉ a꞉lab. Lom ame kaluwo꞉ ya꞉sa꞉ga꞉ Ya꞉lusalemo꞉ mogagilaki, Keliso kaluka꞉isaleyo꞉ hida꞉yo꞉wo꞉ dimiabikiyo꞉, mo꞉fo꞉s we a꞉na sa꞉sa꞉lo꞉. Ya꞉suwo꞉ sowa꞉sa꞉ga꞉yo꞉ donayo꞉ do꞉la꞉lowo꞉wo꞉ fa꞉la꞉da꞉in a꞉la꞉fo꞉ (40) o꞉leo꞉ngo꞉ dowa꞉sena, hida꞉yo꞉ we a꞉na fa꞉la꞉dowo꞉. A꞉la꞉gabiki mo꞉fo꞉s we sa꞉sa꞉la꞉sa꞉ga꞉, Hibulu Keliso kaluka꞉isale ko꞉lo꞉ kalu nolba꞉lo꞉ wa꞉la꞉ sa꞉ndakilo꞉ hida꞉yo꞉ dimiab a꞉namio꞉, tilidabu ililo꞉wo꞉ sulufa꞉no꞉ dowabiki, asuwa꞉foma꞉ki iliga꞉fo꞉. Mo꞉fo꞉s sa꞉sa꞉lo꞉ a꞉namio꞉ tilidabu ililo꞉ a꞉no꞉ ko꞉lo꞉ halale alitakiyo꞉, Gode elo꞉ Ya꞉su Keliso amilo꞉ kaluka꞉isale asuwa꞉takilo꞉ nanog alan dimido꞉ a꞉no꞉ ko꞉lo꞉ sio꞉. A꞉la꞉ta꞉ga꞉ Keliso eyo꞉ Godeya꞉ ene man hendeleyo꞉ ko꞉lo꞉ nimo꞉ kalaba wido꞉.
Mo꞉fo꞉s sa꞉sa꞉lo꞉ wenamio꞉ nimo꞉wo꞉ to otaleno꞉ mada dinafa fanda sa꞉ma꞉nigab. To agelo꞉ we, Ya꞉su Keliso e Godeya꞉ ene so꞉wa hendele ko꞉lo꞉ a꞉lab. Keliso e henfelo꞉ wena mio꞉ amio꞉, eyo꞉ hida꞉yo꞉wo꞉ alan dia꞉li ha꞉na꞉la꞉ga꞉yo꞉, nagalo꞉wo꞉ alan ba꞉ba꞉. A꞉la꞉do꞉ dimido꞉ a꞉ma꞉yo꞉ Gode eyo꞉ kaluka꞉isalelo꞉ asuwa꞉fa꞉no꞉wo꞉ kalu hendeleyo꞉ e ko꞉lo꞉ kalaba fa꞉la꞉dowab a꞉la꞉liki widaki go꞉ (2.10.) A꞉la꞉go꞉ko꞉lo꞉ Ya꞉su eyo꞉ dinali sa꞉lan kaluwo꞉lo꞉, ma꞉mula꞉ kaluwo꞉lo꞉, a꞉la꞉ta꞉ga꞉ Mo꞉sa꞉so꞉lo꞉ e mada tinio꞉ ko꞉lo꞉ a꞉lab.
To andebo꞉ we, Gode eyo꞉ so꞉wa Ya꞉suwo꞉ bobalo꞉ so꞉mea꞉sen misa꞉ kalu alan ho꞉leno꞉ tambo dofo꞉melea꞉ki da꞉feyo꞉. Yuda hen a꞉namilo꞉ bobalo꞉ so꞉mea꞉sen kalu i a꞉no꞉ e mada tininila꞉sa꞉ga꞉ ilili alifa꞉ ko꞉lo꞉ a꞉lab.
To asolo꞉ we, Ya꞉suwo꞉ Hebene hen a꞉nami bobalo꞉ so꞉mea꞉sen misa꞉ kalu alan ilikiyo꞉, kaluka꞉isale e amilo꞉ tilida꞉dabo꞉ tambo a꞉ma꞉la꞉yo꞉ o꞉li gasilia꞉ib. Tamin amio꞉ Hibulu kaluka꞉isale iliyo꞉ Mo꞉sa꞉sa꞉ ele kudu ha꞉nakiyo꞉, mogago꞉ dimido꞉ a꞉no꞉ hama꞉kiyo꞉, no꞉wo꞉ sa꞉nda꞉sa꞉ga꞉ so꞉kugulu mia꞉sen. Ko꞉sega man ililo꞉ dimida꞉len a꞉no꞉ Ya꞉su Keliso elo꞉ nanog dimidama꞉nigab a꞉no꞉ ko꞉lo꞉ dede dimidaki go꞉.
Mo꞉fo꞉s sa꞉sa꞉lo꞉ wema꞉yo꞉ kaluka꞉isaleya꞉ tilidabuwo꞉ ko꞉lo꞉ halale alitaki go꞉. Mo꞉luwo꞉ Isolael hen a꞉namio꞉ kaluka꞉isale nolo꞉ tilidabu amio꞉ mada halaido꞉ kagayo꞉. Hida꞉yo꞉ ko꞉li ko꞉lilo꞉wo꞉ ilo꞉ amio꞉ fa꞉la꞉dowo꞉, ko꞉sega tilidabuwo꞉ halale ta꞉li dofo꞉ko꞉ aneyo꞉ ilo꞉ sowaba edo꞉. Man ililo꞉ dimida꞉len a꞉no꞉ asulakiyo꞉, niliyo꞉lo꞉ Ya꞉su e ko꞉lo꞉ sikudu ba꞉da꞉sa꞉ga꞉, man elo꞉ a꞉no꞉ ko꞉lo꞉ kudu ha꞉na꞉niki. A꞉la꞉ta꞉ga꞉ hida꞉yo꞉ nilo꞉ amilo꞉ fa꞉la꞉dowab a꞉no꞉ disugulufo꞉ko꞉ ha꞉na꞉mela꞉niki.
1
Godeya꞉ So꞉waya꞉ tinio꞉ ko꞉lo꞉lab
1 Mo꞉luwo꞉ ho꞉leno꞉ tambo Gode eyo꞉ nili ma꞉mu imo꞉ to sa꞉ma꞉nikiyo꞉, togo꞉ ko꞉li ko꞉lilo꞉ a꞉na iliki, dinali sa꞉lan kalu a꞉na a꞉la꞉ta꞉ga꞉ sa꞉la꞉len.
2 Ko꞉sega o꞉g ho꞉len elema꞉no꞉lo꞉ dowab wenamio꞉, Gode eyo꞉ ene So꞉waya a꞉la꞉ta꞉ga꞉yo꞉, towo꞉ nimo꞉wo꞉ a꞉na sa꞉la꞉li mio꞉. Gode eyo꞉ kelego꞉wo꞉ tambo ene so꞉wa wemo꞉ bo꞉fo꞉melea꞉ki da꞉fe alifa꞉. A꞉la꞉ta꞉ga꞉ henfelo꞉ o꞉lia꞉ akin o꞉lia꞉yo꞉ Gode eyo꞉ dimidakiyo꞉, ene So꞉waya꞉ dagiya a꞉la꞉ta꞉ga꞉ dimido꞉.
3 Godeya꞉ ho꞉len malilo꞉ nafa a꞉no꞉ ene So꞉wa a꞉na a꞉la꞉ta꞉ga꞉ so꞉so꞉lelia꞉ga꞉ handalowa꞉sen ko꞉lo꞉lab. A꞉la꞉ta꞉ga꞉ So꞉wa a꞉no꞉ Godeyo꞉ o꞉ngo꞉le a꞉lab. To halaido꞉ enedo꞉ a꞉ma꞉yo꞉ kelego꞉wo꞉ tambo halale alifo꞉lab. Ene mela꞉no꞉wo꞉ wala꞉takiyo꞉, kaluka꞉isaleya꞉ mogago꞉wo꞉ e hala꞉sa꞉ga꞉ malilo꞉ ta꞉ta꞉ga꞉yo꞉, e wabulun dowaki Gode Iwalulo꞉ A꞉lab a꞉ma꞉ dagi ililiba mesa꞉ni ane.
4 So꞉wa a꞉ma꞉yo꞉ ma꞉mula꞉ kaluwo꞉ mada tinio꞉. A꞉la꞉ta꞉ga꞉ Godeya꞉lo꞉ wi emo꞉lo꞉ dimi a꞉ma꞉yo꞉ ma꞉mula꞉ kaluwa꞉ wiyo꞉ tinio꞉ ko꞉lo꞉lab.
5 To we Gode eyo꞉ ene So꞉wamo꞉wo꞉ a꞉la꞉sio꞉,
“Ge ni So꞉wa dowab.
O꞉go꞉ ne gi go꞉l dowo꞉l.”
A꞉la꞉ta꞉ga꞉ to nowo꞉ we,
“Ne ene iya doma꞉no꞉, a꞉la꞉ta꞉ga꞉
E ni So꞉wa doma꞉ib.”
Ko꞉sega Gode eyo꞉ ma꞉mula꞉ kalu imilig nowo꞉mbo꞉wo꞉ towo꞉ a꞉la꞉bo꞉ mo꞉sio꞉.
6 Gode eyo꞉ kalu so꞉wa wa꞉la꞉b a꞉no꞉ henfelo꞉ wena tililia꞉ yakiyo꞉ a꞉la꞉sio꞉,
“Ma꞉mula꞉ kalu nilo꞉ gio꞉ tambo gulalu siliki, emo꞉ wabulu sama.”
7 Gode eyo꞉ ma꞉mula꞉ kalu ko꞉lo꞉ doma꞉no꞉wo꞉ a꞉la꞉sio꞉,
“Niyo꞉ no꞉no꞉n ma꞉mula꞉ kalu i a꞉no꞉ fa꞉fa꞉s o꞉ngo꞉ ta꞉takiyo꞉,
No꞉no꞉n nanogdo꞉ dian kalu i a꞉no꞉ de wa꞉sowa o꞉ngo꞉ ta꞉felo꞉.”
8 Ko꞉sega Gode eyo꞉ ene So꞉wamo꞉wo꞉ a꞉la꞉sio꞉,
“Gode, ge misa꞉ dowo꞉ ko꞉lo꞉, gilo꞉ bo꞉fo꞉lab a꞉no꞉ ko꞉ngo꞉ mela꞉ib.
Man nafa digalo꞉ gilo꞉ a꞉na ilikiyo꞉, kaluka꞉isale go꞉no꞉ndo꞉ a꞉no꞉ a꞉ma꞉ bo꞉fo꞉mela꞉ib.
9 Ge man digalo꞉wo꞉ ko꞉lo꞉ asulaki, man mogago꞉wo꞉ mada mo꞉bea꞉sen.
A꞉la꞉fo꞉ko꞉lo꞉ gi Gode niyo꞉ ge da꞉feaki, wa ho꞉n ko꞉lo꞉ tulu alifa꞉ a꞉na ilikiyo꞉,
ge sagalo꞉le dowaki, go꞉no꞉n miliyo꞉ tambo gi tininila꞉sa꞉ga꞉, iwalu ta꞉fo꞉.”
10 Gode eyo꞉ wa꞉ka ene So꞉wa o꞉mo꞉wo꞉ a꞉la꞉sio꞉,
“Alan, taminde amio꞉ henfelo꞉ we gi dimido꞉ ko꞉lo꞉,
Kelego꞉ akin amilo꞉ da꞉lab a꞉no꞉lo꞉ gi dagiya꞉ dimido꞉.
11 Akin o꞉lia꞉ henfelo꞉ o꞉lia꞉yo꞉ kelegema꞉ib ko꞉sega, ge ko꞉ngo꞉ mela꞉ib.
Kelego꞉ a꞉la꞉ a꞉no꞉ helebeso꞉g mo꞉luwo꞉ ko꞉lo꞉ fefele ha꞉nakilo꞉ salibido꞉ o꞉ngo꞉ doma꞉ib.
12 Giyo꞉ henfelo꞉ o꞉lia꞉ akin o꞉lia꞉yo꞉ so꞉g ko꞉lo꞉ kambolan auma꞉ib.
Kelego꞉ a꞉la꞉ a꞉no꞉ helebeso꞉g ko꞉lo꞉ ko꞉li a꞉ta꞉tan aumbo꞉ o꞉li dimidama꞉ib.
Ko꞉sega ge dowo꞉ ko꞉ngo꞉ dofo꞉mela꞉ib.
A꞉la꞉ta꞉ga꞉ ho꞉leno꞉ tambo ge mela꞉no꞉ mela꞉ib.”
13 Gode eyo꞉ ene So꞉wamo꞉wo꞉ towo꞉ a꞉la꞉sio꞉,
“Niyo꞉ gis kalu gilo꞉wo꞉ gi ha꞉g amio꞉ semo꞉ difa꞉ a꞉namio꞉,
ge ni dagi ililiba siliki, ne o꞉lia꞉ bo꞉fo꞉lubi.”
Gode eyo꞉ to wengo꞉wo꞉ ma꞉mula꞉ kalu imilig nowo꞉mbo꞉wo꞉ mo꞉sio꞉.
14 A꞉la꞉fo꞉ko꞉lo꞉ ma꞉mula꞉ kalu iyo꞉ o꞉ba꞉le? Iyo꞉ mama ko꞉lo꞉, Godeya꞉ nanogdo꞉ dia꞉seno꞉ o꞉m. Gode eyo꞉ kaluka꞉isale enedo꞉ a꞉ma꞉la꞉ gasilia꞉no꞉ a꞉no꞉ ko꞉lo꞉ asuwa꞉foma꞉ki iliga꞉ta꞉sen.