4
Ya꞉suwo꞉ da꞉fe ba꞉ba꞉
1 Ya꞉suwo꞉ ho꞉n Yodan a꞉na to꞉lola꞉sa꞉ga꞉ a꞉ma꞉la꞉ mio꞉ amio꞉, Mama Malilo꞉wo꞉ e amio꞉ wa꞉lifo꞉ ko꞉lo꞉, Mama Malilo꞉ a꞉ma꞉ tililia꞉ga꞉ kalaleli hena ane.
2 Ya꞉su e ho꞉len do꞉la꞉fo꞉ fa꞉la꞉da꞉in a꞉no꞉ kalaleli hen a꞉na sabiki, Sa꞉da꞉na꞉ eyo꞉ Ya꞉suwo꞉ a꞉na da꞉fe ba꞉da꞉len. Ho꞉len a꞉namio꞉ Ya꞉suwo꞉ ma꞉no꞉wo꞉ mada mo꞉nabikiyo꞉, maiyo꞉wo꞉ alan dowo꞉.
3 A꞉la꞉go꞉ko꞉lo꞉ Sa꞉da꞉na꞉ eyo꞉ Ya꞉sumo꞉wo꞉ a꞉la꞉sio꞉, “Ge Godeya꞉ so꞉walelalega, u we ma꞉n fa꞉la꞉doma꞉ki sama.”
4 Ya꞉su eyo꞉ emo꞉ a꞉ma꞉la꞉ sa꞉laki, “Godeya꞉ bugo꞉ amio꞉ towo꞉ a꞉la꞉sa꞉sa꞉lo꞉ ko꞉lo꞉lab, ‘Ma꞉no꞉leko꞉ na꞉lab a꞉ma꞉yo꞉, mela꞉no꞉ hendeleyo꞉ mo꞉dimia꞉sen.’ ”
5 A꞉la꞉sa꞉la꞉sa꞉ga꞉ Sa꞉da꞉na꞉ eyo꞉ Ya꞉suwo꞉ iwalu tililia꞉ga꞉ fa꞉la꞉dowakiyo꞉, wigibole a꞉naka henfelo꞉ amilo꞉ amisa꞉n dila꞉ we tambo emo꞉ widabi ba꞉ba꞉.
6 Ba꞉da꞉sa꞉ga꞉ Sa꞉da꞉na꞉ eyo꞉ Ya꞉sumo꞉wo꞉ a꞉la꞉sio꞉, “Henfelo꞉ amilo꞉ amisa꞉n we tambo ge misa꞉ kalu iliki bo꞉fo꞉melea꞉ki, niyo꞉ halaido꞉wo꞉ gemo꞉ dimia꞉no꞉ ko꞉lo꞉, ge wabulun kalu doma꞉ib. Halaido꞉ a꞉no꞉ nemo꞉ dimi ko꞉lo꞉, kalu o꞉bmo꞉wa꞉le dimia꞉no꞉ dowalega, niyo꞉ o꞉lika dimia꞉no꞉.
7 A꞉la꞉fo꞉ko꞉lo꞉ ge ni ha꞉ga dowaki, ne dulugu sa꞉lalega, niyo꞉ kelego꞉ we tambo gemo꞉ dimia꞉no꞉.”
8 A꞉la꞉sa꞉labiki Ya꞉su eyo꞉ a꞉ma꞉la꞉bo꞉ a꞉la꞉sio꞉, “Godeya꞉ bugo꞉ amio꞉ towo꞉ a꞉la꞉sa꞉sa꞉lo꞉ ko꞉lo꞉ da꞉lab, ‘Giyo꞉ go꞉no꞉ Gode, Kalu Alan a꞉ma꞉ ha꞉ga dowakiyo꞉, imilig eko꞉ wabudaki dulugu sa꞉la꞉bi.’ ”
9 A꞉la꞉ta꞉ga꞉ Sa꞉da꞉na꞉ eyo꞉ Ya꞉suwo꞉ tililia꞉sa꞉ga꞉ Ya꞉lusalem a꞉na ha꞉nakiyo꞉, Godeya꞉ Malilo꞉ a doga꞉ wa꞉la fa꞉la꞉ ha꞉na꞉sa꞉ga꞉ kagayaki, emo꞉wo꞉ a꞉la꞉sio꞉. “Ge Godeya꞉ so꞉walelalega, hen holona ho꞉lufoma.
10 Mo꞉wo꞉ Godeya꞉ bugo꞉ amio꞉ towo꞉ a꞉la꞉sa꞉sa꞉lo꞉ ko꞉lo꞉ da꞉lab,
“ ‘Gode eyo꞉ ene ma꞉mula꞉ kalumo꞉wo꞉
ge asuwa꞉foma꞉ki sa꞉ma꞉ib.
11 Gi gibo꞉ u amio꞉ walalabena꞉ki,
ili dagi wa꞉la talulia꞉ib.’ ”
12 A꞉la꞉sa꞉labiki, Ya꞉su eyo꞉ a꞉ma꞉la꞉bo꞉ a꞉la꞉sio꞉, “Godeya꞉ to sa꞉sa꞉lo꞉ a꞉namio꞉ a꞉la꞉sio꞉ ko꞉lo꞉lab, ‘Giyo꞉ go꞉no꞉n Gode, Kalu Alan a꞉no꞉ da꞉feakiyo꞉ nodo ba꞉da꞉so꞉bo.’ ”
13 Sa꞉da꞉na꞉ eyo꞉ Ya꞉suwo꞉ da꞉fe ba꞉da꞉i ha꞉na꞉len a꞉no꞉ eda꞉sa꞉ga꞉yo꞉, ho꞉len nafa nowo꞉ fa꞉la꞉dowalikilo꞉ da꞉fema꞉no꞉ a꞉no꞉ ko꞉lo꞉ yasilakiyo꞉, Ya꞉suwo꞉ ta꞉fo꞉gane.
Ya꞉suwo꞉ nanogo꞉ Ga꞉lili a꞉na mo꞉mo꞉do꞉
Madi 4.12-17, Mak 1.14,15
14 Mama Malilo꞉wa꞉ halaido꞉wo꞉ Ya꞉su e o꞉lia꞉ iliki, e Ga꞉lili a꞉ma꞉la꞉ ane. Ya꞉sulo꞉ doba꞉da꞉lo꞉ malolo꞉ a꞉no꞉ amisa꞉n us a꞉namilo꞉ ta꞉i ane a꞉no꞉ tambo da꞉da꞉i ane.
15 Ho꞉len a꞉namio꞉ Ya꞉su eyo꞉ tolo꞉ wida꞉sen a usa ha꞉na꞉sa꞉ga꞉, mano꞉ a꞉na widabiyo꞉, kaluka꞉isale iliyo꞉ e a꞉na wabuda꞉len.
Nasala꞉t kaluka꞉isaleya꞉yo꞉ Ya꞉suwo꞉ o꞉luga꞉fo꞉
Madi 13.53-58, Mak 6.1-6
16-17 A꞉la꞉ga꞉sa꞉ga꞉yo꞉ Ya꞉su e, elo꞉ anayo꞉ hen Nasala꞉t amisa꞉n a꞉na a꞉ma꞉la꞉ ane. Ha꞉fo꞉lo꞉ Dowan ho꞉leno꞉ dowabiki, Ya꞉su e enedo꞉ dimida꞉sen au dimidaki, tolo꞉ wida꞉sen a a꞉na tiane. E Godeya꞉ to sa꞉sa꞉lo꞉ a꞉na agelema꞉no꞉ a꞉la꞉ta꞉ga꞉ dasiliabikiyo꞉, iliyo꞉ dinali sa꞉lan kalu Aisaya elo꞉ sa꞉sa꞉lo꞉ kombo꞉ a꞉no꞉ emo꞉ dimi. Eyo꞉ kombo꞉ a꞉no꞉ a꞉ma꞉la꞉ fagela꞉sa꞉ga꞉, to sa꞉sa꞉lo꞉ we ba꞉da꞉sa꞉ga꞉ a꞉na agelo꞉.
18 “Godeya꞉ Mamayo꞉ neya sab.
Ne to nafa a꞉no꞉ wa꞉feyo꞉ kalumo꞉wo꞉ walama꞉ki,
eyo꞉ ne a꞉na da꞉feyo꞉.
Eyo꞉ ne kaluka꞉isalelo꞉wa iliga꞉takiyo꞉,
dibolo amilo꞉ sab kalu a꞉no꞉ sili alifoma꞉kiyo꞉, a꞉la꞉ta꞉ga꞉
siyo꞉ ko꞉n kalu sab a꞉no꞉ fagela꞉sa꞉ga꞉ a꞉bo꞉ba꞉kiyo꞉, a꞉la꞉ta꞉ga꞉
kaluka꞉isale nolba꞉lo꞉ wa꞉la꞉ sa꞉ndakilo꞉ sab a꞉no꞉ ga꞉li mesea꞉ki,
Ne a꞉na iliga꞉fo꞉.
19 A꞉la꞉ta꞉ga꞉ o꞉go꞉ Godeya꞉lo꞉ nimo꞉lo꞉ ha꞉fo꞉ disa꞉ma꞉no꞉ ho꞉len a꞉no꞉ fa꞉la꞉dowab a꞉la꞉liki,
nemo꞉ sama꞉ki iliga꞉fo꞉.”
20 Ya꞉su eyo꞉ to a꞉no꞉ agela꞉sa꞉ga꞉, kombo꞉wo꞉ a꞉ma꞉la꞉ kambola꞉sa꞉ga꞉yo꞉, o꞉lo꞉ dia꞉fo꞉len kalu o꞉mo꞉ dimia꞉sa꞉ga꞉, e mesa꞉ni ane. E asitabiki kaluka꞉isale tolo꞉ wida꞉sen ayamilo꞉ sen a꞉no꞉ tambo eko꞉ sikudu ba꞉dabikiyo꞉,
21 Ya꞉su eyo꞉ imo꞉wo꞉ mo꞉mo꞉da widakiyo꞉ a꞉la꞉sio꞉, “Godeya꞉ to ko꞉lo꞉ gilo꞉ da꞉dab a꞉no꞉ o꞉go꞉ hendele fa꞉la꞉dowab” a꞉la꞉sio꞉.
22 Iliyo꞉ to nafale elo꞉ sa꞉lab a꞉no꞉ da꞉da꞉sa꞉ga꞉, molo asulaki, “E nafaka꞉” a꞉la꞉duludakiyo꞉, iliyo꞉ “Wai! Kalu we Yosa꞉ba꞉ inso꞉wa꞉le?” a꞉la꞉sio꞉.
23 Eyo꞉ imo꞉wo꞉ a꞉la꞉sio꞉ “Gio꞉ nemo꞉wo꞉ mada a꞉la꞉sa꞉ma꞉ib, ‘Falela꞉sen kaluwo꞉ ge ko꞉lo꞉ go꞉no꞉na꞉ma꞉la꞉yo꞉ mada falele alifoma!’ Giliyo꞉ nemo꞉ bale sa꞉lakiyo꞉ a꞉la꞉sa꞉ma꞉ib, ‘Kabaniom amisa꞉n amilo꞉ gilo꞉ dimido꞉ a꞉no꞉ nio꞉ dabu ko꞉lo꞉, giyo꞉ go꞉no꞉n amisa꞉n wenamio꞉lo꞉ a꞉la꞉dimidama.’
24 Niyo꞉ mada hendele gimo꞉ so꞉lo꞉l. Dinali sa꞉lan kaluwa꞉yo꞉ towo꞉ ene amisa꞉na widab amio꞉, kaluka꞉isale iliyo꞉ e mo꞉wabuda꞉sen.
25 Niyo꞉ to a꞉no꞉ wa꞉ka kudu sa꞉ma꞉nigo꞉l. Dinali sa꞉lan kalu Elaiyalo꞉ elen ho꞉len a꞉namio꞉ dona otalen a꞉la꞉ta꞉ga꞉ ele do꞉go꞉fela꞉fo꞉ us a꞉namio꞉ ho꞉no꞉ mada mo꞉tinda꞉len ko꞉lo꞉, ma꞉n ma꞉no꞉wo꞉ mo꞉fa꞉la꞉ndaki, iyo꞉ maiyo꞉wo꞉ alan dowo꞉. Ho꞉len a꞉namio꞉ ga sa꞉ba꞉lo꞉ modo꞉ nolo꞉ Isolael hen a꞉na sen.
26 Ko꞉sega Gode eyo꞉ Isolael ga sa꞉ba꞉la꞉lo꞉ a꞉namio꞉ Elaiya e mo꞉iliga꞉fo꞉. A꞉la꞉ba. Gode eyo꞉ Elaiya e Saido꞉n hen a꞉na iliga꞉taki, ga sa꞉ba꞉lo꞉ nowo꞉ Salefat amisa꞉n amilo꞉ sabdo꞉ a꞉na iliga꞉fo꞉.
27 O꞉leau ka, dinali sa꞉lan kalu Elaisalo꞉ elen ho꞉len amio꞉lo꞉, aintalo꞉ sen kalu modo꞉wo꞉ Isolael hen a꞉na sen ko꞉sega, i amio꞉ imilig noma꞉lo꞉wo꞉ mo꞉falele alifa꞉. A꞉la꞉ba, Silia kalu, Naman eko꞉ falele alifa꞉.”
28 Ya꞉suwa꞉yo꞉ a꞉la꞉sa꞉labiki, kaluka꞉isale tolo꞉ wida꞉sen ayamilo꞉ sen a꞉no꞉ tambo da꞉da꞉sa꞉ga꞉yo꞉, Ya꞉sumo꞉wo꞉ gadio꞉ alan dowo꞉.
29 Iyo꞉ dasila꞉sa꞉ga꞉ Ya꞉suwo꞉ amisa꞉n ha꞉la꞉ya hamana꞉ki o꞉luga꞉fo꞉. Iliyo꞉ e susululia꞉ga꞉, hen misio꞉lo꞉ buluso꞉no꞉ a꞉na kani to꞉loma꞉no꞉ a꞉la꞉liki tililia꞉gane.
30 Ko꞉sega eyo꞉ iyo꞉ ka ta꞉takiyo꞉, kaluka꞉isale noldo꞉ a꞉lab us a꞉namio꞉ ga꞉li ane.
Mama mogago꞉ sen a꞉no꞉ Ya꞉suwa꞉yo꞉ o꞉luso꞉no꞉
Mak 2.21-28
31 Ya꞉su e Ga꞉lili hen Kabaniom amisa꞉n a꞉na tina꞉sa꞉gayo꞉, Ha꞉fo꞉lo꞉ Dowan ho꞉leno꞉ dowabiki, eyo꞉ kaluka꞉isalemo꞉wo꞉ Godeya꞉ towo꞉ a꞉na mo꞉mo꞉da wido꞉.
32 Ya꞉su eyo꞉ towo꞉ halaido꞉ wido꞉ ko꞉lo꞉ iliyo꞉ to a꞉no꞉ molo dabu.
33 Kalu nowo꞉ mama mogago꞉lo꞉ dowo꞉ a꞉no꞉ tolo꞉ wida꞉sen ayami sen ko꞉lo꞉ eyo꞉ halale sa꞉laki a꞉la꞉sio꞉,
34 “A! Ya꞉su Nasala꞉t kalu ge, nilo꞉ wiyo꞉ wagama꞉ni mio꞉wo꞉? Ge nio꞉ ko꞉lo꞉ mogaila꞉ma꞉ni mio꞉wo꞉? Ne ge asulab. Godeya꞉ ene Malilo꞉ kaluwo꞉ ge.”
35 A꞉la꞉sa꞉labiki Ya꞉su eyo꞉ emo꞉ halaido꞉ sa꞉laki, “Ge tola꞉so꞉bo! Kalu ko ta꞉ta꞉ga꞉, ha꞉la꞉ya handaloma!” A꞉la꞉sa꞉labiki mama mogago꞉wa꞉yo꞉ kalu a꞉no꞉ ta꞉uliaki, ilo꞉ elen milif a꞉na besea꞉sa꞉ga꞉, mama mogago꞉ a꞉no꞉ kaluwo꞉ mo꞉mogagaki ta꞉fo꞉gane.
36 Kaluka꞉isale tambo molo asula꞉sa꞉ga꞉ egelebo꞉ a꞉la꞉sio꞉, “Wai! Kalu wema꞉lo꞉ to sa꞉lab we waga widakigaba꞉le? E halaido꞉wo꞉ iliki, mama mogago꞉mo꞉wo꞉ towo꞉ halaido꞉ sa꞉labikiyo꞉, iyo꞉ a꞉no꞉ ko꞉lo꞉ kudu ha꞉naki, ha꞉la꞉ya handalota꞉ga꞉ ha꞉na꞉sio꞉.”
37 A꞉la꞉fo꞉ko꞉lo꞉ Ya꞉su elo꞉ dimido꞉ a꞉no꞉ malolabikiyo꞉, kaluka꞉isale us a꞉namilo꞉ ta꞉i ane a꞉no꞉ tambo da꞉da꞉i ane.
Ya꞉suwa꞉yo꞉ kalu modo꞉wo꞉ falele alifelo꞉
Madi 8.14-17, Mak 1.29-34
38 Ya꞉su e tolo꞉ wida꞉sen ayo꞉ ta꞉ta꞉sa꞉ga꞉, Saimon Bidaya꞉ ene aya ane. Saimona꞉ ingaya꞉ anowo꞉ ofo꞉ walafo꞉ alan bo꞉lo꞉ ko꞉lo꞉, iliyo꞉ Ya꞉sumo꞉ asuwa꞉foma꞉ki dabu ba꞉ba꞉.
39 A꞉la꞉gabiki Ya꞉su e ga elo꞉ alifo꞉lab anib a꞉na kagayakiyo꞉, walafdo꞉ delen o꞉mo꞉wo꞉ halaido꞉ sio꞉ ko꞉lo꞉, walaf a꞉no꞉ a꞉na bulufo꞉. Wigibo a꞉naka, ga a꞉no꞉ dasilia꞉ga꞉, egeledo꞉ ma꞉n ma꞉no꞉ a꞉no꞉ a꞉na mo꞉mo꞉da so꞉fa꞉.
40 Ofo꞉ tinaki Ha꞉fo꞉lo꞉ Dowan ho꞉len a꞉no꞉ elema꞉no꞉ dowabiki, kaluka꞉isale walaf ko꞉li ko꞉lilo꞉lo꞉ dosdo꞉ a꞉no꞉ Ya꞉sulo꞉wa tililia꞉mio꞉. Ya꞉su e dagiyo꞉ kaluka꞉isale ina꞉li ina꞉lilo꞉wa꞉ wa꞉la golabikiyo꞉, iyo꞉ falele alifelo꞉.
41 A꞉la꞉ta꞉ga꞉ mama mogago꞉wo꞉ kaluka꞉isale modo꞉ a꞉namilo꞉ sen a꞉no꞉ tambo ha꞉na꞉sia꞉likiyo꞉, halale sa꞉laki, “Ge Godeya꞉ ene so꞉waleka꞉” a꞉la꞉sio꞉. Ko꞉sega iyo꞉ towo꞉ mo꞉sama꞉ki, Ya꞉su eyo꞉ imo꞉wo꞉ halaido꞉ sio꞉. Mo꞉wo꞉ iliyo꞉ e Godeya꞉ Da꞉feyo꞉ kalu a꞉labo꞉ asulo꞉.
Ya꞉suwo꞉ amisa꞉n nola sia꞉mela꞉ni ane
Mak 1.34-39
42 Kea꞉fo nulu amio꞉ Ya꞉suwo꞉ ina꞉li mesa꞉niki, kalaleli hen doba꞉da꞉ ane. Kaluka꞉isale iliyo꞉ e keda꞉li ha꞉na꞉sa꞉ga꞉ ba꞉dakiyo꞉, iliyo꞉ Ya꞉su e iyo꞉ mo꞉ta꞉fo꞉ hamana꞉ki susio꞉.
43 Ko꞉sega eyo꞉ imo꞉wo꞉ a꞉la꞉sio꞉, “Niyo꞉ Godeya꞉lo꞉ bo꞉fo꞉mela꞉nigab to nafa a꞉no꞉ amisa꞉n nol amio꞉ wida꞉li sia꞉mela꞉no꞉. Mo꞉wo꞉ Gode eyo꞉ ne nanog a꞉no꞉ ko꞉lo꞉ dimidama꞉ki iliga꞉fo꞉,” a꞉la꞉sio꞉.
44 A꞉la꞉fo꞉ko꞉lo꞉ e Yudia hen a꞉naka sia꞉likiyo꞉, tolo꞉ wida꞉sen aya mano꞉ a꞉na wida꞉len.