12
Go꞉no꞉n ge Godemo꞉ dimia꞉lubi
1 A꞉la꞉fo꞉ko꞉lo꞉ nao nado i gimo꞉lo꞉ dimidama꞉kilo꞉ sa꞉ma꞉nigo꞉lo꞉ we. Gode eyo꞉ nimo꞉wo꞉ mada nofolaki asuwa꞉ta꞉sen ko꞉lo꞉, boba Godemo꞉lo꞉ so꞉mea꞉sen o꞉leaumbo꞉, go꞉no꞉no꞉lo꞉ Godemo꞉ dimia꞉lubi. Gio꞉ mela꞉no꞉wo꞉ o꞉silikiyo꞉, malilo꞉ nafale dowaki, Gode elo꞉ asulab aumbo꞉ go꞉no꞉no꞉ dimia꞉lubi. Man a꞉no꞉ Godemo꞉lo꞉ wabulu sa꞉lakilo꞉ dimidan hendeleyo꞉ o꞉m.
2 Henfelo꞉ man we o꞉lia꞉yo꞉ mada ege dowa꞉so꞉bo. Gode eyo꞉ gi asulo꞉wo꞉ nodola꞉sa꞉ga꞉, ho꞉gi a꞉fa꞉la꞉doma꞉ki ta꞉ta꞉lubi. A꞉la꞉dimidalikiyo꞉ Godeya꞉lo꞉ asulab man a꞉no꞉ giliyo꞉ alobana asuluma꞉ib. Man a꞉no꞉ nafa digalo꞉le dowaki, Godeyo꞉ ko꞉lo꞉ sagale alitakigab.
Gode eyo꞉ nimo꞉wo꞉ ha꞉fo꞉ disa꞉lakiyo꞉, bobayo꞉ dimia꞉sen ko꞉lo꞉lab
3 Gode eyo꞉ ne o꞉lia꞉ ha꞉fo꞉ disa꞉laki, enedo꞉ iliga꞉felo꞉ kalu nowo꞉ ne da꞉feyo꞉ ko꞉lo꞉, a꞉no꞉ asulakiyo꞉ gimo꞉wo꞉ tambo a꞉la꞉so꞉lo꞉l. Giliyo꞉ ge kaluwo꞉ nafale a꞉la꞉bo꞉ asula꞉so꞉bo. Godeya꞉lo꞉ tilidabu ko꞉lo꞉ gemo꞉lo꞉ dimi a꞉na ilikiyo꞉, go꞉no꞉no꞉ dinafa aloba꞉da꞉bi.
4 Niyo꞉ da꞉fe sa꞉ma꞉nigo꞉l. Kaluwa꞉ do꞉mo꞉ amio꞉ heb ko꞉li ko꞉lilo꞉ a꞉lab kolo꞉, heb ko꞉li ko꞉lilo꞉ a꞉ma꞉ nanog enedo꞉wo꞉ da꞉lab.
5 A꞉la꞉do꞉ go꞉ o꞉leaumbo꞉, tilidabu kaluka꞉isale nio꞉ modo꞉ ko꞉li ko꞉lilo꞉ sab ko꞉sega, nio꞉ Ya꞉su Kelisowa dowalikiyo꞉, do꞉mo꞉wo꞉ imilise fa꞉la꞉dowaki, nio꞉ ua kudu alifelo꞉ ko꞉lo꞉ nol o꞉lia꞉yo꞉ mada ege doma꞉no꞉ ko꞉lo꞉lab.
6 Gode eyo꞉ nimo꞉wo꞉ ha꞉fo꞉wo꞉ alan disa꞉laki, nio꞉ nanogo꞉ dimidama꞉kiyo꞉, boba kelego꞉ ko꞉li ko꞉lilo꞉ a꞉no꞉ nimo꞉wo꞉ dimi. Ge Godeya꞉ tolo꞉ dinali sa꞉lan kalu doma꞉kiyo꞉, halaido꞉wo꞉ gemo꞉ dimilalega, gilo꞉ Gode amilo꞉ tilidabu a꞉naka ilikiyo꞉, nanogo꞉ a꞉na dia꞉li ha꞉na꞉lubi.
7 Ge sa꞉s kaluka꞉isale nolo꞉ ko꞉lo꞉ asuwa꞉fa꞉no꞉wo꞉ gemo꞉wo꞉ dimilalega, i a꞉no꞉ asuwa꞉ta꞉lubi. Ge widan kalu doma꞉no꞉ dimilalega, i a꞉no꞉ wida꞉lubi.
8 Giyo꞉ kaluka꞉isale nolba꞉ asulo꞉wo꞉ halalema꞉ki sa꞉ma꞉no꞉wo꞉ dimilalega, asulo꞉ ililo꞉wo꞉ halalema꞉ki sa꞉la꞉lubi. Giyo꞉ kelego꞉wo꞉ aundo꞉ma dowo꞉ kaluka꞉isalemo꞉lo꞉ asuwa꞉fa꞉no꞉wo꞉ dimilalega, gio꞉ modo꞉ dimia꞉lubi. Ge kalu nolo꞉ ko꞉lo꞉ tili dofo꞉liki bo꞉fo꞉lowan kalu doma꞉no꞉ dimilalega, ge i a꞉no꞉ dinafa bo꞉fo꞉lubi. Ge nolo꞉ nofolakilo꞉ tili doma꞉no꞉ kalu doma꞉no꞉wo꞉ dimilalega, ge i a꞉no꞉ sagala꞉li tili dofo꞉lubi.
Kelisowa꞉ mandeyo꞉ we
9 Ge nol o꞉lia꞉lo꞉ ha꞉fo꞉ disa꞉lab man a꞉no꞉ madaliyo꞉ mo꞉dowaki, hendele ha꞉fo꞉ disa꞉la꞉bi. Man mogago꞉ a꞉no꞉ mo꞉beaki, man nafa a꞉no꞉ ko꞉lo꞉ halale ta꞉li dofo꞉lubi.
10 Gegelebo꞉ ha꞉fo꞉wo꞉ disa꞉la꞉lubi. Giliyo꞉ nolo꞉ ko꞉lo꞉ alan wabudaki sagale alita꞉lubi.
11 Alana꞉ nanogo꞉ dimidakiyo꞉, gio꞉ mo꞉beakiyo꞉ bo꞉sula꞉so꞉bo. Mamaya꞉ halaido꞉ a꞉na dowakiyo꞉, nanog a꞉no꞉ iligi dimida꞉lubi.
12 Gio꞉ Godeya꞉lo꞉ dinali sio꞉ a꞉no꞉ hendele dimidama꞉ib a꞉la꞉bo꞉ tilida꞉da꞉sa꞉ga꞉ yasilakiyo꞉, gio꞉ sagala꞉lubi. Hida꞉yo꞉wo꞉ ge amio꞉ fa꞉la꞉dowalikiyo꞉, ge ha꞉sa dowaki halale kagama. Godemo꞉wo꞉ dulugu safo꞉ko꞉ ha꞉na꞉lubi.
13 Keliso kaluka꞉isale kelego꞉lo꞉ma dowab i a꞉no꞉ giliyo꞉ asuwa꞉ta꞉bi. A꞉la꞉ta꞉ga꞉ mageso꞉ kaluka꞉isaleyo꞉ yalega, tilidowa꞉bi.
14 Kaluwa꞉yo꞉ gio꞉ migi kudaki, hida꞉yo꞉wo꞉ gimo꞉ dimialikiyo꞉, i a꞉no꞉ nafa doma꞉kiyo꞉, Godemo꞉ dulugu sa꞉la꞉bi. I a꞉no꞉ mogagima꞉kiyo꞉ dulugu sa꞉la꞉so꞉bo.
15 Kaluka꞉isale sagalo꞉lo꞉ dowab i o꞉lia꞉yo꞉ sagalo꞉ dowa꞉bi. Kaluka꞉isale nofolo꞉lo꞉ dowab i o꞉lia꞉ dowaki nofolo꞉wo꞉ dia꞉bi.
16 Gegelebo꞉ ego꞉le dowa꞉bi. Ge kailakiyo꞉, iwaluwo꞉ dowa꞉so꞉bo. Wilo꞉ma kalu o꞉lia꞉ ege dowa꞉bi. Ge asulo꞉wo꞉ di kalu a꞉la꞉bo꞉ asula꞉so꞉bo.
17 Kalu abeyo꞉ gimo꞉wo꞉ mogago꞉ nowo꞉ dimidalega, giliyo꞉ mada wa꞉lo꞉ wa꞉dea꞉so꞉bo. Giliyo꞉ kaluka꞉isale nolba꞉ siwa꞉l amio꞉ mano꞉ mada nafale bo꞉ba꞉ki dinafa dowa꞉bi.
18 Giliyo꞉ kaluka꞉isale nol o꞉lia꞉yo꞉ ha꞉sa dowa꞉bi. Iliyo꞉ gimo꞉wo꞉ gadio꞉wo꞉ dowalega, go꞉no꞉no꞉ tilidowaki imo꞉wo꞉ gadio꞉wo꞉ dowa꞉so꞉bo.
19 Ni mili, mogago꞉ gemo꞉lo꞉ dimidab a꞉no꞉ wa꞉lo꞉ go꞉no꞉no꞉ wa꞉dea꞉so꞉bo. Godeya꞉ ene kulufa꞉yo꞉wa꞉ ka wa꞉dema꞉ki ta꞉foma. Mo꞉wo꞉ Godeya꞉ ene bugo꞉ amio꞉ a꞉la꞉sa꞉sa꞉lo꞉, “Wa꞉dema꞉no꞉ man a꞉no꞉ na꞉no꞉ ko꞉lo꞉, no꞉no꞉n dimidama꞉no꞉” Kalu Alana꞉yo꞉ a꞉la꞉sio꞉.
20 Giliyo꞉ mo꞉wa꞉deaki ko꞉sega,
Gis kaluwo꞉ maiyo꞉wo꞉ alan dowalega, ma꞉no꞉wo꞉ dimea꞉bi.
E ho꞉no꞉ maiyalega, ho꞉no꞉ dimia꞉bi.
Giliyo꞉ a꞉la꞉dimidalikiyo꞉, ene hala dimido꞉ a꞉no꞉ dinafa fanda asula꞉sa꞉ga꞉,
gilo꞉ man nafa dimidab a꞉ma꞉yo꞉ e sendelo alifa꞉ib.
21 A꞉la꞉fo꞉ko꞉lo꞉ man mogago꞉ a꞉ma꞉yo꞉ gio꞉ tiniaki go꞉lula꞉ma꞉kiyo꞉ ta꞉ta꞉so꞉bo. Ko꞉sega man mogago꞉ a꞉no꞉ gililo꞉ man nafale dimidab a꞉ma꞉ tininima꞉ki ta꞉ta꞉bi.