Mo꞉fo꞉s Agel We Fo꞉l Eyo꞉
Timoti
Emo꞉ Sa꞉sa꞉liga꞉fo꞉
Asuluma꞉no꞉ towo꞉ we
Mo꞉fo꞉s we Fo꞉l eyo꞉ Timoti emo꞉ sa꞉sa꞉liga꞉fo꞉. Timoti e Keliso kaluwo꞉ ho꞉gi dowakiyo꞉, Fo꞉l o꞉lia꞉ nanog dia꞉li sia꞉len. (Iliga꞉felo꞉ Kalu 16.1-3) Timoti e A꞉fesa꞉s sa꞉s a꞉na dowo꞉ ko꞉lo꞉, Fo꞉l eyo꞉ sa꞉s a꞉no꞉ dinafa bo꞉fo꞉melea꞉ki, to we a꞉na sa꞉sa꞉liga꞉fo꞉.
Mo꞉fo꞉s us a꞉namio꞉, to otalen da꞉labiki sa꞉sa꞉lo꞉. Nowo꞉, ho꞉len a꞉namio꞉ kalu nolba꞉yo꞉ man ko꞉li ko꞉lilo꞉ widakiyo꞉ sa꞉s kaluka꞉isaleya꞉ tilidabuwo꞉ mogagilab ko꞉lo꞉, Timoti eyo꞉ man a꞉no꞉ dinafa bo꞉fo꞉melea꞉ki, to we hagugaki sa꞉sa꞉lo꞉.
Nowo꞉ sa꞉sdo꞉ dinafa bo꞉fo꞉mela꞉no꞉ man a꞉no꞉ ko꞉lo꞉ wido꞉. A꞉la꞉ta꞉ga꞉ sa꞉s amilo꞉ misa꞉ kaluka꞉isale dibebea꞉sa꞉ga꞉ da꞉feakiyo꞉, man ililo꞉ dimidama꞉no꞉ a꞉no꞉ ko꞉lo꞉ wido꞉.
Nowo꞉ Timoti e Ya꞉su Kelisowa꞉ nanog dian kalu nafale doma꞉ki sa꞉sa꞉lo꞉. A꞉la꞉ta꞉ga꞉ sa꞉s kaluka꞉isaleyo꞉ elo꞉ tili dofo꞉likilo꞉ bo꞉fo꞉mela꞉no꞉ man a꞉no꞉ ko꞉lo꞉ sa꞉sa꞉lo꞉.
1
1 Ne Fo꞉l, Ya꞉su Keliso elo꞉ iliga꞉felo꞉ kalu nowo꞉ ne. Gode nilo꞉ asuwa꞉takilo꞉ gasili a꞉no꞉lia꞉, nililo꞉ tilida꞉da꞉sa꞉ga꞉lo꞉ yasiso꞉l Ya꞉su Keliso, a꞉la꞉ma꞉yo꞉ ne da꞉feyo꞉.
2 Timoti, ge hendele tilidabu ko꞉lo꞉ ni so꞉wale o꞉ngo꞉ fa꞉la꞉dowo꞉. A꞉la꞉fo꞉ko꞉lo꞉ niyo꞉ mo꞉fo꞉s we gemo꞉ sa꞉sa꞉liga꞉to꞉l. Do Gode o꞉lia꞉ nili Misa꞉ Ya꞉su Keliso o꞉lia꞉ma꞉yo꞉ ini kanulo꞉ o꞉lia꞉ nofolan o꞉lia꞉ ha꞉salo꞉ mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, to we a꞉na sa꞉sa꞉lo꞉l.
To halabo꞉ walama꞉ib a꞉la꞉liki hagugu sio꞉
3 Ne Masedonia hena ha꞉nakiyo꞉, ge A꞉fesa꞉s a꞉naka o꞉melea꞉ki, gemo꞉wo꞉ towo꞉ salifo꞉gane ko꞉lo꞉ o꞉go꞉ niyo꞉ to a꞉no꞉ wa꞉ka sa꞉ma꞉nigo꞉l. Ge A꞉fesa꞉s a꞉na silikiyo꞉, kalu nolba꞉lo꞉ Godeya꞉ man kaluka꞉isalemo꞉lo꞉ hala wida꞉lab a꞉no꞉ ta꞉foma꞉ki, giyo꞉ towo꞉ halaido꞉ sa꞉la꞉lubi.
4 Iliyo꞉ kandayo꞉ malola꞉sen o꞉lia꞉ e ma꞉mu i mio꞉ agela꞉sen a꞉no꞉lia꞉yo꞉ nenela꞉sa꞉ga꞉ widalikiyo꞉, ho꞉leno꞉ wala꞉so꞉boka꞉ a꞉la꞉liki, imo꞉wo꞉ halale sa꞉la꞉lubi. Mo꞉wo꞉ iyo꞉ to a꞉no꞉ ko꞉lo꞉ malola꞉lalikiyo꞉, gadiaki kega꞉mela꞉ib ko꞉lo꞉, Godeya꞉ nanog diab a꞉no꞉ mo꞉asuwa꞉fa꞉ib. Kaluwa꞉lo꞉ tilidabu a꞉ma꞉ ilikiyo꞉, Godeya꞉ ene nanogo꞉ a꞉na fa꞉la꞉doma꞉ib.
5 Nilo꞉ gemo꞉lo꞉ dimidama꞉kilo꞉ to so꞉lo꞉lo꞉ we. Kaluka꞉isaleyo꞉ egelebo꞉ ha꞉fo꞉ disa꞉ma꞉no꞉ man a꞉no꞉ wida꞉bi. Man a꞉no꞉ fa꞉la꞉doma꞉kiyo꞉, asulo꞉wo꞉ go꞉go꞉do꞉ dowa꞉sa꞉ga꞉, hala dimido꞉wo꞉ mo꞉asulaki, a꞉la꞉ta꞉ga꞉ tilidabu hendele dowalikiyo꞉, ha꞉fo꞉ disa꞉lan man a꞉no꞉, a꞉na a꞉la꞉ta꞉ga꞉ fa꞉la꞉doma꞉ib.
6 Kalu nolo꞉ man wida꞉lab a꞉no꞉ ta꞉fo꞉ ha꞉nakiyo꞉, madali to sa꞉la꞉lab.
7 Iyo꞉ Mo꞉sa꞉sa꞉ elelo꞉ widan kalu doma꞉no꞉ asulaki wida꞉lab ko꞉sega, to inido꞉ o꞉lia꞉ to ililo꞉ halale widab o꞉lia꞉yo꞉ inino꞉lo꞉ mo꞉wo꞉ mo꞉fanda asulo꞉.
8 Ko꞉sega kaluka꞉isaleyo꞉ Mo꞉sa꞉sa꞉ ele difa꞉ a꞉no꞉ digalo꞉le widalega, nio꞉ ele a꞉no꞉ nafa dowab a꞉la꞉asulo꞉l.
9-10 A꞉la꞉ta꞉ga꞉ ele a꞉no꞉, digalo꞉ kalu a꞉lab a꞉no꞉ bo꞉fo꞉melea꞉kiyo꞉, mo꞉saefa꞉. Ko꞉sega ele difa꞉lo꞉ o꞉go꞉sa꞉lab kalu a꞉no꞉lia꞉yo꞉, a꞉la꞉iyabo꞉, Godeyo꞉ gola ba꞉dabo꞉, mogago꞉lo꞉ dimida꞉seno꞉, Godeya꞉lo꞉ asulab aumbo꞉ mo꞉kudu ha꞉na꞉sen a꞉no꞉, henfelo꞉ mando꞉ kudu ha꞉na꞉labo꞉, ene iya anolo꞉ sana sowabo꞉, kalu noldo꞉ sana sowa꞉labo꞉, uwo꞉lo꞉ dia꞉labo꞉, da꞉lo꞉ dimia꞉labo꞉, kalu nolo꞉ afale tilili ha꞉na꞉sa꞉ga꞉lo꞉ madali nanog dian kalu ta꞉felabo꞉, do꞉lo꞉le sa꞉lakilo꞉ dikili sa꞉labo꞉, mo꞉walilab amio꞉ towa꞉lo꞉ a꞉la꞉sa꞉lano꞉, kaluka꞉isaleyo꞉ man digalo꞉wo꞉ mo꞉kudu ha꞉na꞉lab a꞉no꞉, ele saefa꞉ we i a꞉ma꞉no꞉ ko꞉lo꞉ da꞉lab.
11 Man digalo꞉ a꞉no꞉, Godeya꞉ to nafale a꞉no꞉lia꞉yo꞉ imilo꞉ dowo꞉ ko꞉lo꞉, Godeya꞉ to nafa a꞉no꞉ nemo꞉ walama꞉ki wido꞉. To nafa a꞉no꞉, kaluka꞉isaleya꞉lo꞉ Gode Alan ko꞉lo꞉ wabulu sa꞉la꞉lab a꞉na a꞉la꞉ta꞉ga꞉ fa꞉la꞉dowo꞉.
Gode eyo꞉ Fo꞉l e nofolo꞉ alifa꞉ ko꞉lo꞉ mada o꞉m a꞉la꞉sio꞉
12 Nili Alan, Ya꞉su Kelisowa꞉yo꞉ nemo꞉wo꞉ halaido꞉wo꞉ dimi ko꞉lo꞉ niyo꞉ emo꞉wo꞉ mada o꞉m a꞉la꞉so꞉lo꞉l. Eyo꞉ ne dibebea꞉sa꞉ga꞉, niyo꞉ nanog a꞉no꞉ o꞉li ditandalema꞉ib a꞉la꞉asulaki, ene nanog dima꞉ki da꞉fe alifa꞉ ko꞉lo꞉, niyo꞉ emo꞉wo꞉ mada o꞉m a꞉la꞉so꞉lo꞉l.
13 Tamin amio꞉ Ya꞉suwa꞉ wiyo꞉ dio꞉ge sa꞉laki, e o꞉lia꞉yo꞉ gis dowa꞉liki, e niyo꞉ mogagila꞉len. Ko꞉sega ne e mo꞉fanda asulaki mo꞉ tilidabu iliki, a꞉na dimido꞉ ko꞉lo꞉ eyo꞉ ne nofolo꞉ alifa꞉.
14 Nili Alan Ya꞉su Kelisowa꞉yo꞉, ene kanulan man a꞉no꞉ ne amio꞉ mada modo꞉ ko꞉go꞉laki, ene tilidabu o꞉lia꞉ ha꞉fo꞉ disa꞉lan man a꞉no꞉ nemo꞉ dimi.
15 To we hendele sa꞉ma꞉nigo꞉l ko꞉lo꞉ gio꞉ tilida꞉da꞉bi. “Ya꞉su Kelisowo꞉ mogago꞉lo꞉ dimida꞉lab kaluka꞉isale a꞉no꞉ ko꞉lo꞉ gasilia꞉niki, henfelo꞉ wena mio꞉,” niyo꞉ a꞉la꞉sa꞉sa꞉lo꞉l. A꞉la꞉ta꞉ga꞉ ne mada mogago꞉lelo꞉ dimida꞉len kaluwo꞉ ne.
16 Ko꞉sega Gode eyo꞉ ne nofola꞉sa꞉ga꞉yo꞉, Ya꞉su Kelisowa꞉yo꞉ ha꞉salo꞉ doma꞉no꞉ man a꞉no꞉ nemo꞉ ko꞉le wido꞉ ko꞉lo꞉, kaluka꞉isaleyo꞉ tambo a꞉no꞉ asula꞉sa꞉ga꞉, iyo꞉lo꞉ Ya꞉su Keliso amio꞉ tilida꞉daki, ko꞉ngo꞉ mela꞉no꞉ dima꞉kiyo꞉, mogago꞉le kalu nemo꞉ ko꞉le wido꞉.
17 Gode mada o꞉m,
Ko꞉ngo꞉ mela꞉no꞉ misa꞉yo꞉ E.
Mo꞉sowano꞉ E.
Siya꞉lo꞉ mo꞉ba꞉dano꞉ E.
Godeyo꞉ imilise E ko꞉lo꞉ a꞉lab.
A꞉la꞉fo꞉ko꞉lo꞉ kaluka꞉isaleya꞉yo꞉ E mada nafale a꞉la꞉liki,
Ene wiyo꞉ ho꞉leno꞉ tambo wabulu sa꞉la꞉i ha꞉na꞉mela꞉ib.
Hendele.
18 Ni so꞉wa Timoti, tamin amilo꞉ sa꞉s misa꞉ kaluwa꞉lo꞉ gemo꞉lo꞉ dinali sio꞉ a꞉no꞉, niyo꞉lo꞉ o꞉go꞉ to o꞉ngo꞉ ko꞉ wala sa꞉ma꞉nigo꞉l. To a꞉no꞉ ge asulufo꞉liki kudu ha꞉naki, ge halaledo꞉ buban kaluwo꞉ o꞉ngo꞉ dota꞉ga꞉, nanogo꞉ a꞉na halale dimida꞉bi.
19 Go꞉no꞉n tilidabuwo꞉ halale ta꞉li siliki, man digalo꞉ o꞉lia꞉ man mogago꞉ o꞉lia꞉yo꞉ dinafa aloba꞉daki, nanogo꞉ a꞉na dimida꞉bi. Mo꞉wo꞉ kalu nolba꞉yo꞉ a꞉la꞉bo꞉ mo꞉dimido꞉ ko꞉lo꞉, inin tilidabuwo꞉ ho꞉n ko꞉su ko꞉lo꞉ u nowa basayakilo꞉ mogagan o꞉ngo꞉ dowa꞉lab.
20 Kalu a꞉la꞉ nowo꞉, Himeneus o꞉lia꞉ Alegsanda o꞉lia꞉yo꞉ o꞉leo꞉ngo꞉ ko꞉lo꞉, a꞉la꞉ma꞉yo꞉ Godeya꞉ wiyo꞉ mo꞉mogagima꞉no꞉ a꞉la꞉asulaki, niyo꞉ a꞉la꞉yo꞉ Sa꞉da꞉na꞉ya꞉ dagiya difa꞉.