Wáraga bɨ Páwulo eké zɨ́
Felemúna
ní
Ledre gɨ ro bụ́kụ bɨ Felemúna ní
ꞌYịmɨkása Páwulo eké ledre ba zɨ́ Felemúna ngúru ꞌyị ꞌbɨ Kɨ́résịto bɨ kɨ́ tụ́ꞌdụ́ éyị́ e zɨ́ne ní. Ngúru ꞌyị ꞌbɨ moko ꞌbɨ Felemúna maꞌdáa ịrịa Onésịmo ngasáoyó kóo roné gɨ do bi moko. Nda gɨ do kacɨ́ a née zɨ́a ṇgúṇgu ledre Kɨ́résịto, zɨ́a ndị́sịné sáká Páwulo kɨ́ngaya sɨmɨ bɨ otonɨ́ Páwulo sɨmɨ sị́gịnị ní. Née ní, zɨ́ Páwulo éké ledre ba kása Onésịmo kɨ́e zɨ́ Felemúna, ndúꞌyú Felemúna idí ótoómo ledre zɨ́ Onésịmo abú lorụ ꞌbɨ Róma uku kɨ́dí owụ́kụlụ́ bɨ ngasá go gɨ do bi moko ní mongụ́ ꞌyị ené idí úfu wo ꞌdáꞌba. Páwulo ya Felemúna idí ꞌdíꞌbi Onésịmo sɨmɨ sụmụ tɨ́ káa zɨ́ ꞌyị bɨ ꞌdiꞌbi mbigí lúnduné ní.
1
Wáraga bɨ Páwulo eké zɨ́ Felemúna ní
1 Áko Felemúna lúndu ꞌbɨ ené e, máa Páwulo bɨ otonɨ́ máa sɨmɨ sị́gịnị gɨ zɨ́a bɨ mándị́sị ꞌdódo ledre ꞌbɨ Kɨ́résịto Yésụ zɨ́ ꞌyị e ní.
Máéké ledre ba máa zɨ́yị Felemúna, azé kɨ́ lúnduzé Timatíyo bɨ nɨ kpá eze ꞌyị mokozé ní.
2 Ledre bɨ ekézé ba ndaá kpá lá dụụ́ zɨ́yị ngúcuyị́ wá, kpá zɨ́ Afíya bɨ nɨ zɨ́ze káa zɨ́ mbigí lémịzé ní, kpá zɨ́ Arakípo bɨ ndịsịzé méngị moko ꞌbɨ Ngére Yésụ ndro kéye ní.
3 ꞌBụzé Lomo kɨ́ Kɨ́résịto Yésụ Ngére ezé idínɨ́ lúrú bi kacɨ́se gɨ do bɨ zɨ́se ndị́sịsé bɨlámáse.
Páwulo iꞌbí mbófo éyị́ zɨ́ Lomo gɨ ro Felemúna
4 Felemúna, kacɨ́ kadra za mbá, ịrịyị́ ꞌdecị gɨ taramá wá. Kɨ́ꞌdí bɨ mááyí go íni ini zɨ́ ꞌBụzé Lomo ní, mándị́sị fú lá óto yị́ị kóꞌdụ́ a, idí ndị́sị lúrú bi kacɨ́yị.
5 Ndaá gbékpị́e wá, gɨ zɨ́a, máúwú ledre bɨlámá ledre ga bɨ ndị́sị méngị yée zɨ́ ꞌyị e ní go mbá. Tụ́ꞌdụ́ ꞌyị e ndịsịnɨ́ go úku ledreyị́ zɨ́ma kɨ́dí, ṇgúṇgu ledre Ngére Yésụ go cụ́ kɨ́ sɨmɨyị́, zɨ́ ꞌbú ꞌyị e kpá ídíne doyị́ kɨ́ngaya.
6 Mándị́sị íni ini zɨ́ Lomo, idí sáká yị́ị, gɨ ro zɨ́yị ndị́sịyị́ méngị bɨlámá ledre zɨ́ ꞌyị e nda za kɨ́ngaya rómoné mɨrómo, gɨ do bɨ zɨ́ye ndị́sịyé mbófo Kɨ́résịto.
7 ꞌBú ꞌyị e bɨ óto doyị́ kɨ́ngaya née, oto máa go zɨ́ma ídíma kɨ́ mongụ́ rokinyi. Gɨ zɨ́a óto ꞌyị ga bɨ ꞌbɨ Kɨ́résịto ní go zɨ́ye ṇgúṇgu ledrea nda za kɨ́ngaya.
Páwulo ṇguṇgú roné gɨ ro Onésịmo
8 Gɨ zɨ́ kéyị née ní, zɨ́ma ṇgúṇgú romá zɨ́yị kɨ́ rokoꞌbụ bɨ Kɨ́résịto iꞌbí zɨ́ma ní, ídí méngịtátá bɨlámá ledre née kenée ndéré kɨ́e ꞌdáꞌdá kɨ́ngaya.
9 Káa zɨ́ bɨ mááyí ꞌyịmɨkása ꞌbɨ Yésụ ní, mááyí kóo úku ledre née zɨ́yị kenée za kɨ́ rokoꞌbụ bɨ ꞌbɨ moko ní, ɨ́ꞌɨ, utúasá zɨ́ma íꞌbí lorụ zɨ́yị kenée wá, gɨ zɨ́a máówo bú, óto ꞌbú lafúyị e, ꞌyị ga bɨ ꞌbɨ Kɨ́résịto ní go doyị́, mááyí lá ndúꞌyú yị́ị gɨ ro zɨ́yị méngị ledre maꞌdáa.
10 Máṇgúṇgú romá zɨ́yị, gɨ ro Onésịmo. Sɨmɨ bɨ mááyí sɨmɨ sị́gịnị yáa ní, mándị́sị ꞌdódo ledre gɨ ro Ngére Yésụ zɨ́a. Bɨ ba ní, ṇguṇgu ledre Yésụ go káa do Ngére ené. Gɨ zɨ́ kéyị née ní, nɨ zɨ́ma go owụ́ ꞌbɨ amá sɨmɨ moko ꞌbɨ Ngére Yésụ.
11 Togụ́ mɨméngị ledre ꞌbɨ Onésịmo ndaá kóo zɨ́yị bɨlámáne wá, káa zɨ́ bɨ ṇguṇgu nda ledre ꞌbɨ Lomo go ní, ídí nda kpá ówo a kɨ́dí, nɨ nda ídí go ꞌyị méngị yéme ledre zɨ́ze kéyị gbrengárá.
12 Abú ꞌbúa nɨ domá kɨ́ngaya ndaá kóo mɨútúásáne zɨ́a ndéréóyó roné gɨ cigíma wá yá, málúrú kenée, máyá ɨ́ꞌɨ, utúasá mɨútúásá zɨ́ma kása wo zɨ́yị íri.
13 Nɨ kóo ídí bɨlámáne zɨ́ Onésịmo ndị́sịné zɨ́ma yáa kɨ́ sáká máa do bi kacɨ́yị káa zɨ́ bɨ mááyí aka fú sɨmɨ sị́gịnị gɨ zɨ́ bɨlámá ledre ꞌbɨ Ngére Yésụ bɨ mándị́sị ꞌdódo a zɨ́ ꞌyị e ní.
14 Ɨ́ꞌɨ, máíli méngị kéyị kenée wá, káa bɨ nɨ nda ídí káa zɨ́ éyị́ bɨ mágága yị́ị mɨgága gɨ ro méngị bɨlámá ledre zɨ́ma ní ke, ꞌbúó togụ́ ledre bɨ ṇgúṇgu go yị́ị ní.
15 Ambí owone, ngíti géyị yá, Lomo yeme kóo ne kenée kɨ́dí, Onésịmo idí aka kóo ị́nyị gɨ cigíyị cúkuꞌdée, sɨmɨ bɨ nɨ ndáꞌbaógụ ní, zɨ́se ndị́sịsé kéne bɨlámáne za fí.
16 Tónóne cakaba ndéréne ꞌdáꞌdá, ndá lolụ lúrú Onésịmo maꞌdáa zɨ́yị fú káa do owụ́kụlụ́ wá, idí nda ídí zɨ́yị cé káa zɨ́ lúnduyị́ owụ́ ꞌbɨ ꞌbụyị́ ní, gɨ zɨ́a ṇguṇgu ledre Ngére Yésụ go.
17 Felemúna, káa zɨ́ bɨ ꞌdíꞌbi máa sɨmɨ sụmụ káa do bɨlámá eze ꞌyị mokoyị́ ní, mándúꞌyú yị́ị, ídí mu ꞌdíꞌbilúgu Onésịmo zɨ́yị sɨmɨ sụmụ káa do bɨlámá eze ꞌyị mokoyị́.
18 Togụ́ Onésịmo maꞌdáa mengị kóo bɨsinyí ledre zɨ́yị, togụ́ ꞌdiꞌbi kóo mbú késị́ gɨ zɨ́yị, iꞌbílugu wá yá, ídí úku ledre a zɨ́ma gɨ ro zɨ́ma íꞌbílúgu a zɨ́yị.
19 Máúku zɨ́yị maꞌdíi, togụ́ éyị́ nɨ bo Onésịmo ꞌdiꞌbi gɨ zɨ́yị iꞌbílugu wá, ídí úku a zɨ́ma mááyí íꞌbílúgu a zɨ́yị. Kpá káa zɨ́ bɨlámá ledre kóo máméngị, zɨ́ma ꞌdódo ledre ꞌbɨ Ngére Yésụ zɨ́yị ní, éyị́ bɨ méngịlúgu zɨ́ma kacɨ́ a ní ndaá.
20 Lúndu ꞌbɨ ené e, káa zɨ́ bɨ azé kɨ́yị ꞌyị lódụ́ kacɨ́ Kɨ́résịto Yésụ Ngére ezé ní, ídí mu ꞌdíꞌbilúgu Onésịmo zɨ́yị, gɨ ro zɨ́ma ídíma kɨ́ rokinyi.
21 Abú mándúꞌyú yị́ị mɨndúꞌyú wá, máówo bú kɨ́dí, áyí tɨ́ méngị ledre née zɨ́ma kenée.
22 Ídí óto komoyị́ kacɨ́ma, mááyí yáa kɨ́ mɨsómụ́ ledre togụ́ Lomo likpí mɨsiꞌdi zɨ́ma, zɨ́ye ꞌdíꞌbiógụ máa gɨ sɨmɨ sị́gịnị yá, mááyí ógụ zɨ́yị íri.
Mandá gɨ zɨ́ tụ́ꞌdụ́ ꞌyị e zɨ́ Felemúna
23 Epáfura ezemá bɨ azé kéne sɨmɨ sị́gịnị yáa gɨ zɨ́a bɨ ndịsị kpá ꞌdódo ledre ꞌbɨ Kɨ́résịto Yésụ zɨ́ ꞌyị e ní, iꞌbí mandá zɨ́se íri za mbá kɨ́ngaya.
24 Márɨko e kɨ́ Arisitáka e kɨ́ Démasi e kɨ́ Lúka e bɨ ndịsịnɨ́ sáká máa kɨ́ moko ꞌbɨ Kɨ́résịto yáa ní, iꞌbínɨ́ kpá mandá zɨ́se íri za mbá.
25 Kɨ́résịto Yésụ Ngére ezé idí íꞌbí úndru zɨ́se íri za mbá, gɨ ro zɨ́se ndị́sịsé bɨlámáne.