ଯୋହନଙ୍କ ଲିଖିତ ଦ୍ୱିତୀୟ ପତ୍ର
ଜହନ୍ ଲେକ୍ଲା ଦୁୟ୍ ଲଃମର୍ ଚିଟି
୨ ଜହନ୍ ଚିଟି ବିସୟେ ହଃଦେକ୍
ଜହନ୍ ଲେକ୍ଲା ଆରେକ୍ ଗଟେକ୍ ଚିଟି ଜିସୁ କ୍ରିସ୍ଟର୍ ଜଃଲମାର୍ ୫୦-୧୦୦ ମଃସିଆ ବିତ୍ରେ ପେରିତ୍ ଜହନ୍ ଲେକି ରିଲା । ଜହନ୍ ନିଜ୍କେ ଲେକ୍ଲା ଲକ୍ ବଃଲି ଜାଣାୟ୍ ନଃଉଁଲା, ତାର୍ ବାଦୁଲେ ସେ ନିଜ୍କେ ପାର୍ଚିନ୍ ବଃଲି ଜାଣାୟ୍ ଅଃଉଁଲା । ଜହନାର୍ ଆରେକ୍ ଗଟେକ୍ ଚିଟିର୍ ବିସୟ୍ ସଃଙ୍ଗ୍ ଜହନ୍ ଲେକ୍ଲା ନିକ କବୁରେ ରିଲା ବିସୟ୍ ସଃଙ୍ଗ୍ ସଃମାନ୍ । ଇରି ମୁଳ୍କଃରି ଜିସୁକେ ଜୁୟ୍ ବାଟ୍ଦଃୟ୍ ସେ ଏକ୍ଆରେକ୍କେ ଲାଡ୍ କଃର୍ତା ବିସୟେ ଜିସୁର୍ ବଲ୍କେ ଦିଆନ୍ ଦେଉଁଲା, ସେରଃକମ୍ ଜିସୁର୍ ବଲ୍ ମାନ୍ତାର୍ ଅଃଉଁଲି, ତାକ୍ ଲାଡ୍ କଃର୍ତାର୍ ୧:୫-୬ଜହ ୧୫:୯-୧୦ ।
ଇରି ବିସ୍ୱାସ୍ ଜାଣାହଃଳୁଲି ଜେ, ଜହନ୍ ଜଃଡେବଃଳ୍ ଏପିସିଏ ବାସା କଃର୍ତିରିଲା, ଜହନ୍ ନିକ କବୁର୍ ସଃଙ୍ଗ୍ ତିନିଗଟ୍ ଜହନ୍ ଚିଟି ହେଁ ଲେକିରିଲା ଜୁୟ୍ସଃବୁ ୧ ଜହନ୍, ୨ ଜହନ୍ ଆର୍ ୩ ଜହନ୍ ।
ଜହନ୍ ଇ ଚିଟି ତଃୟ୍ ବାଚ୍ଲା ଆୟା ଆର୍ ତାର୍ ହିଲାମଃନ୍ ବଃଲି କୟ୍କଃରି ମଣ୍ଡ୍ଳିକେ ଚିଟି ଲେକୁଲା । ଜହନାର୍ ଇ ଚିଟି ସେତାର୍ ଉଦେସ୍ ଅଃଉଁଲି ବିସ୍ୱାସିମଃନ୍କେ ସାସ୍ ଦେଉଁକେ ଆର୍ ମିଚ୍ ଗୁରୁମଃନାର୍ ତଃୟ୍ହୁଣି ଜାଗ୍ରତ୍ ରେଉଁକେ ଅୟ୍ଦ୍ ।
ଇ ବଇ ବିତ୍ରେ ରିଲା ମୁଳ୍ ବିସୟ୍ମଃନ୍
୧. ଜହନ୍ ଇ ଚିଟି କାର୍ ହାକ୍ ଲେକୁଲା ଇରି କୟ୍, ହାଉତା ଲକ୍ମଃନ୍କେ ଜୁଆର୍ ଜାଣାଉଁଲା । ୧:୧-୩
୨. ଜହନ୍ ମଣ୍ଡ୍ଳିକେ ସାସ୍ ଦଃୟ୍ କଃରି ବଃଡ୍ ଆଦେସ୍ ବିସୟେ ଏତୁ କଃରାୟ୍ ଦେଉଁଲା । ୧:୪-୬
୩. ସେ ମିଚ୍ ଗୁରୁମଃନାର୍ ବିସୟେ ଜାଗ୍ରତ୍ କଃରାଉଁଲା । ୧:୭-୧୧
୪. ସେ ଜୁୟ୍ତି ବାସା କଃରୁଲା ସେତିରେତା ବିସ୍ୱାସିମଃନ୍କେ ଜୁଆର୍ ଜାଣାୟ୍ ଲେକା ସେସ୍ କଃରୁଲା । ୧:୧୨-୧୩
1
ଜହନାର୍ ଦୁୟ୍ଲଃମ୍ବର୍ ଚିଟି
1 ପାରାଚିନ୍ ଜେ ମୁଁୟ୍, ମୁଁୟ୍ ମାପ୍ରୁ ବାଚ୍ଲା ମାୟ୍ଜିଟକି, ଆର୍ ଇସ୍ୱରାର୍ ହିଲାମଃନାର୍ ହାକ୍ ଇ ଚିଟି ଲେକୁଲେ । ସେମଃନ୍କେ ମୁଁୟ୍ ସଃତ୍କଃରି ଲାଡ୍ କଃରୁଲେ, ଆର୍ ଅଃକାୟ୍ ମୁଁୟ୍ ନାୟ୍ ମଃତର୍ ସଃତ୍ ଜାଣି ରେତା ସଃବୁ ଲକ୍ ହେଁ ଲାଡ୍ କଃର୍ତି ।
2 ଜୁୟ୍ ସଃତ୍ ଅଃମିମଃନାର୍ ମଃନ୍ବିତ୍ରେ ଆଚେ ଆର୍ ସଃବୁବଃଳ୍ ଅଃମାର୍ ସଃଙ୍ଗ୍ ରଃୟ୍ଦ୍, ସେ ସଃତାର୍ ଗିନେ ସେମଃନ୍କେ ଲାଡ୍ କଃରୁଲୁ ।
3 ଉବା ଇସ୍ୱର୍ ଆର୍ ସେ ଉବାର୍ ହୟ୍ସି ଜିସୁ କ୍ରିସ୍ଟର୍ ତଃୟ୍ ହୁଣି ଉହ୍କାର୍, ଦଃୟା ଆର୍ ସୁସ୍ତା ଅଃମାର୍ ସଃଙ୍ଗ୍ ସଃତ୍ ଆର୍ ଲାଡେ ରଃୟ୍ଦ୍ ।
ସଃତ୍ ଆର୍ ଲାଡ୍
4 ତୁମାର୍ ହିଲାମଃନାର୍ ବିତ୍ରେ କଃତେକ୍ ଉବାର୍ ତଃୟ୍ହୁଣି ହାୟ୍ରିଲା ବିଦି ହଃର୍କାରେ ସଃତେ ଚାଲ୍ଚାଲ୍ତି ଜାଣି ମୁଁୟ୍ ବଃଡେ ସଃର୍ଦା ।
5 ଲାଡାର୍ ଆୟା ଅଃବେ ମୁଁୟ୍ ଜେ ତର୍ ହାକ୍ ନଃଉଆଁ ବିଦି ଲେକୁଲେ ସେରି ନାୟ୍, ମଃତର୍ ଆରୁମେ ହୁଣି ହାୟ୍ଲା ବଲ୍କେ ଲେକି ଗଃଉଆରି କଃରୁଲେ ଜେ, ଅଃମିମଃନ୍ ସଃବ୍କେ ଅଃହ୍ଣା ଅଃହ୍ଣା ମଃନ୍କାର୍ ବିତ୍ରେ କଃରୁନ୍ଦ୍ ।
6 ଆର୍ ଅଃମିମଃନ୍ ଜେ, ତାର୍ ବିଦି ହଃର୍କାରେ ଚାଲ୍ଚାଲ୍ତି କଃରୁଆଁ, ଇରି ହଃକା ଲାଡାର୍ ଅଃର୍ତ୍ । ତୁମିମଃନ୍ ଆରୁମେ ହୁଣି ଜାୟ୍ରି ସୁଣି ଆଚାସ୍, ସେ ହଃର୍କାରେ ଚାଲ୍ଚାଲ୍ତି କଃରା ଇରି ସେ ବଲ୍ ।
7 ବଃଲେକ୍ ଜୁୟ୍ ଲକ୍ମଃନ୍ ଜିସୁ କ୍ରିସ୍ଟ ନଃର୍ ଗଃଗାଳ୍ ଦଃରି ଆସି ଆଚେ ବଃଲି ବିସ୍ୱାସ୍ ନଃକେର୍ତି, ଇରଃକମ୍ ଗାଦେକ୍ ଟକୁମଃନ୍ ଜଃଗତେ ବାରାୟ୍ ଆସି ଆଚ୍ତି । ଇବାନ୍ୟା ଲକ୍ ଅଃଉଁଲାୟ୍ ଟକୁମଃନ୍ ଆର୍ କ୍ରିସ୍ଟର୍ ସଃତ୍ରୁ ।
8 ତୁମିମଃନ୍ ଜଃନ୍କଃରି ଅଃମିମଃନାର୍ କଃଲା କାମାର୍ ହଃଳ୍ ଆରାୟ୍ ନଃକେରି ଜଃନ୍କଃରି ସେତିର୍ ହୁର୍ନ୍ କଃରି ପୁରିସ୍କାର୍ ହାଉଆସ୍; ସେତାର୍ ଗିନେ ନିଜାର୍ ନିଜାର୍ ବିସୟେ ଜଃଗ୍ରାତ୍ ରିଆ ।
9 ଜୁୟ୍ଲକ୍ କ୍ରିସ୍ଟର୍ ସିକ୍ୟାର୍, ବିତ୍ରେ ନଃରେୟ୍ ଜଦି ବିନେ ଜାୟ୍ଦ୍, ସେ ଇସ୍ୱର୍କେ ନଃହାୟ୍; ସିକ୍ୟାର୍ ବିତ୍ରେ ରଃୟ୍ଦ୍, ସେ ଉବାକ୍ ଆର୍ ହୟ୍ସିକ୍ ଦୁୟ୍ଲକେ ହାୟ୍ ଆଚେ ।
10 କେ ଜଦି ଇ ସିକ୍ୟା ନଃୟ୍ ତୁମିମଃନାର୍ ହାକ୍ ଆସେଦ୍, ତଃବେ ତାକ୍ ତୁମାର୍ ଗଃରେ କୁଦାନାୟ୍ କଃରାନାୟ୍, ଆର୍ ତର୍ ସୁସ୍ତା ଅଃଉଅ ବଃଲି କୟ୍କଃରି ତାକେ ଜୁଆର୍ କଃରାନାୟ୍ ।
11 ବଃଲେକ୍ ଜୁୟ୍ଲକ୍ ତାର୍ ସୁସ୍ତା ଅଃଉଅ ବଃଲି କୟ୍ଦ୍, ସେ ତାର୍ କଃରାବ୍ କାମାର୍ ବାଗିଦାରି ସଃଇନ୍ ।
ସଃରାସଃରି କଃତା
12 ତୁମିମଃନାର୍ ହାକ୍ ଗାଦେକ୍ କଃତା ଲେକ୍ତାର୍ ଆଚେ, ମଃତର୍ କାଗଜେ ଆର୍ ପେନେ ସେରି ଲେକୁକେ ମଃନ୍ ନଃକେରୁଲେ ମର୍ ଆସା ଜେ, ତୁମାର୍ ଲଃଗେ ଆସି ନିଜେ ମୁକାମୁକି କଃତାବାର୍ତା କଃରିନ୍ଦ୍, ଜଃନ୍କଃରି ଅଃମିମଃନାର୍ ସଃର୍ଦା ହୁର୍ନ୍ ଅୟ୍ଦ୍ ।
13 ଇସ୍ୱର୍ କୁଦ୍ଲାର୍ ତୁମାର୍ ବେଣିର୍ ହିଲାମଃନ୍ ତୁମିକେ ଜୁଆର୍ ଜାଣାଉଁଲାୟ୍ ।