18
1 Bilida:de da amane sia:i,
2 Yoube! Dunu di agoai da ouiya:mu hame dawa:bela:?
Di da fonobahadi ouiya:le esala ganiaba, ninia da dima sia:mu dawa:la:loba.
3 Dia da abuliba:le, ninia bulamagau defele,
dawa: hamedei, abuliba:le dawa:sala:?
4 Dia ougi hou da dima fawane se iaha.
Di da ougiba:le, osobo bagade da dunu hame esalebe ba:ma:bela:?
Gode da di fidima:ne, goumi fadegale, eno sogega ligisima:bela:?
5 Wadela:i hamosu dunu ea gamali da ha:ba:doi dagoi ba:mu.
Amo gamali ea lalu gona:su da bu hame ulagimu.
6 Gamali ea abula diasu ganodini da gasi agoai ba:mu.
7 Ea musa: gasa fili ahoasu, be wali da gogaeane ahoa.
Ea da hisu fada:i sia: amoga fa:no bobogebeba:le, dafasa.
8 Ea da gasa:su esa ganodini ahoabeba:le, ea emo lala:gi dagoi ba:sa.
9 Sani da ea emo gufiga gagusa.
10 Osobo da:iya efegei da wamolegei diala.
Ea logo ahoabe amoga sanisu diala.
11 Fedege agoane, beda:su liligi da ema eale disisa.
Beda:su liligi da ea emo osa:le bobogesa.
12 Ea da bagade gagui galu, be wali ea da ha:aligi.
Gugunufinisisu hou da e dafulili oulela.
13 Uhimu hamedei olo da ea da:iba:le madelasa.
Amoga ea emo amola lobo dasasa.
14 Ea da hahawane ea abula diasu ganodini esalu.
Be ea ha lai dunu da amoga e gasawane hiouginanu,
fedege agoane hina bagade Bogosu, amoga fofada:musa: hiouginana ahoa.
15 Wali eno dunu da udigili ea abula diasuga esalumu da defea.
Be hidadea, fioso medoma:ne, salafa gufagagala:mu da defea.
16 Ea difi amola amoda da biole hafoga:sa.
17 Ea da musa: mimogo dunu galu.
Be wali ea fidafa dunu amola ga fi dunu da e gogolei dagoi.
18 Gode da e, esalebe sogega fisili masa:ne, sefasimu.
E da hadigi soge amoga fisili masa:ne sefasili, ea da gasi sogega masunu.
19 Ea da ega fifi manebe dunu hame ba:mu,
amola dunu afae hame bogoi esalebe da hame ba:mu.
20 Gusudili amola guma:dini, dunu huluane da ema doaga:i hou nabasea,
bagadewane beda:iba:le, yagugumu.
21 Wadela:le hamosu dunu amo da Godema hame dawa:sa, ilia da amo hou ilima
doaga:i dagoi ba:mu.