39
1 Di da goumia esalebe goudi ilia lalelegesu eso dawa:sala:?
Di da sigua ‘dia’ gebo ilia mano lalelegei hou ba:bela:?
2 Di da ilia eso habodayane galuiyale dawa:bela:.
Di da ilia lalelegemu eso ilegei dawa:sala:?
3 Ilia habogala mano lamusa: beguduli lobo gaguladabe, amo di dawa:bela:?
4 Ilia da iwiladafa amo ganodini gasa lale, alesa.
Ilia da ga asili, hame buhagisa.
5 Sigua dougi halegale masa:ne, nowa ilia logo doasibala:?
6 Na da ili amogai esaloma:ne, hafoga:i soge ilima i.
Ilia da hafoga:i deme (sali) dialebe umiga esaloma:ne, Na logo doasi.
7 Ilia sia: gulubagebe moilai bai bagade gadenene hame esala.
Amola dunu ilia da ili fofole amola ilia hawa: hamoma:ne sia:mu hamedei ba:sa.
8 Ilia goumia mola:iya:i ha:i manu hogosa.
9 Sigua bulamagau gawali da digili hawa: hamonesima:bela:?
E da dia bulamagau diasuga gasi afae esaloma:bela:?
10 Di da sigua bulamagau gawali afaema efe gomenesili,
osobo gidinama:ne sia:mu dawa:bela:?
Di da e gomenesili, osobo gisuga gima:ne sia:mu dawa:bela:?
11 Di da ea gasa bagade amoga
e da dia hawa: hamosu fawane hamoma:ne dafawaneyale dawa:bela:?
12 E da dia bugi gamisu dima gaguli misa:bela:?
E da gagoma dia dabasu faia dialebe, amo gagadole lidima:bela:?
13 ‘Osadaligi’ (wida agoai) ea ougia da hedolodafa dada ahoa.
Be ‘osadaligi’ afae da ‘sidoge’ ea hagili ahoabe defele hame dawa:.
14 ‘Osadaligi’ da ea oso da osobo da:iya dogoloma:ne legesa.
15 Be e da asigi dawa:su hame dawa:beba:le,
amo oso da emoga hasalasimu o sigua ohe amoga goudanisimu,
amo e da hame dawa:.
16 E da amo oso da ea: hameyale defele, e da hamosa.
E da ea oso udigili legebayale dawa:beba:le, hame da:i diosa.
17 Be Ni fawane da e gagaoulisi, amola ema bagade dawa:su hame i.
18 Be e da muni hehenane ahoasea,
e da hosi amola hosi fila heda:i dunu amoba:le ousa.
19 Yoube! Di fawane da hosi ilima gasa ibala:?
Di fawane da ilima ilia mugi hinabo sedade ibala:?
20 Di da ili danuba: defele soagagala:ma:ne ilima ibala:?
Amola ili dunu beda:ma:ne hagogala:ma:ne hamobela:?
21 Hosi da nimiwane osobo fagoa gudu gigila:sa.
Ilia da ilia gasa huluane defele, gegemusa: hehenasa.
22 Ilia da beda:su hamedafa dawa:.
Amola gegesu gobihei afae da ili sinidigima:ne hamomu hame dawa:.
23 Ilima fila heda:i dunu ilia gegesu liligi da ginina:ginina:sa,
amola esoga baba gaga:la:sa.
24 Fofogadigili yaguguli, ilia misosogane hehenasa.
Gegesu dalabede da wesea, ilia da nimi agoane fofoga:sa.
25 Dalabede da afae wele gasea, hosi da hagogala:sa.
Ilia da gegesua hame gadeneawane, nimi gaha naba.
Ilia dadi gagui ouligisu dunu ilia hamoma:ne wele sia:su naba.
26 Buhiba da ea ougia ga (south) amodili da:legasea,
di da hagili ahoabe amo ema olelebela:?
27 Sia sio da goumi gadodafa amo da:iya bibimusa: dawa:sea,
e da hidadea dia hamoma:ne sia: nabimusa: ouesaloma:bela:?
28 E da igi gadodafa da:iya bibisa.
Amola goumi agesone fisiagagadoi, da ea gagili sali diasu agoai gala.
29 Amogainini, e da ga amola gadenene huluane liligi medoma:ne
amola moma:ne hogosa.
30 Sia sio ilia da bogoi da:i manusa: beba:le sisiga:sa.
Waha debe sia da maga:me nososa.