28
Fidima:ne Sia:ne Gadosu
1 Hina Gode! Na gaga:su dunu!
Na da Dima wele sia:sa! Na Dima dini ianebe nabima!
Dia da nama dabe hame adole iasea, na da dunu ilia bogosu sogebi
amoga dabe, ilima madelamu agoai galebe ba:mu.
2 Na da Dia fidima:ne wele sia:sea,
amola Dia hadigi Debolo diasu amoga ba:le gusuli, na lobo gaguia gadosea,
na wele sia:be nabima.
3 Di da wadela:i hamosu dunuma fofada:nanu, se dabe iasea,
nama amola se dabe mae ima.
Wadela:i hamosu dunu ilia da da:i aheagini sia:sa,
be dogo ganodini higale ba:sa.
4 Amo dunu ilia wadela:i hou hamobeba:le, ilima se dabe ima.
Ilia da wadela:le bagade hamobeba:le se dabe lamu da defea.
Amaiba:le, Di se dabe ilima ima.
5 Ilia da Hina Gode Ea hamoi amola osobo bagade liligi hahamoi amo ba:sa,
be hame dawa:digisa.
Amaiba:le, E da ilima se bidi iawane, ili dafawanedafa wadela:lesimu.
6 Hina Godema nodoma! E da na fidima:ne, na dini iabe amo nabi dagoi.
7 Hina Gode da na ouligisa amola na gaga:sa.
Na da E dafawaneyale dawa:sa.
E da na fidisa amola na nodoma:ne hamosa.
Na da hahawane gesami hea:su amoga Ema nodosa.
8 Hina Gode da Ea fi dunu gaga:lala.
Amola E da Ea ilegei hina bagade amo gaga:sa.
9 Hina Gode! Dia fi dunu gaga:ma!
Amola Dia: dunu ilima hahawane hou ima!
Di sibi ouligisu ea hou defele, ilima ouligima.
Amola eso huluane ili noga:le gagagulama!