13
Antiokia enehe ang naung ini Barnabas bot Saulus oleve ing gahing
1 Bendar Antiokia mi angu, nehe toang iomi Mutu Yesus vengaanamang iila. Nehe aaedeng Lahatala ing gahing metma Ehurvala ening, bot aaedeng angu di Ana ing gahing nehe avomung-apahang.
Ing angu, benang ba:
Barnabas,
Simeon, ba nehe biasa earut hula, ꞌKaanaꞌ,
Lukius, bendar Kirene mi angu,
Menahem, ba kiki sehimi ini nehe raja Herodes oleve ing gariang hama-hama angu, bot Saulus.
2 Ooras nu, nehe ba omi Mutu Yesus vengaanamang ang naung, ini kanempel, bot ini taing vengkumpul senge Lahatala Aing tajaning. Angmuse Lahatala ERoh Hamulang iat hubait hula, “Iini Barnabas bot Saulus oleve ing vengtalail senge, Nekarajang ba Na vengpiling metma ma inang angu ini vengkarajang.”
3 Ini kanempel bot sambajang sengmuse, ini iatang metma Barnabas bot Saulus oleve ing taang mea senge ing gahing. Angmuse oleve ila Lahatala Ekarajang angu at lamal.
Barnabas bot Saulus oleve Siprus por taang ila
4-5 Uanguveng angu Lahatala ERoh Hamulang Barnabas bot Saulus oleve ing gahing lamal ila mana kanap, ehalomang angu ini bendar Seleukia mi. Yohanis (nehe ba ini earu hula, Markus) angu di iamulung hama-hama. Ila angmi muse, ini kampal hila aalarit Siprus por taang ila, angmuse ini hela bendar nu mi, ene Salamis. Angumi, ini ila nehe Yahudi ang naung ihava hamulang mi maso senge Lahatala Ehur aaung-hama angu metma nehe ang naung iavomung-iapahang.
6-8 Barnabas bot Saulus oleve lamal ila Siprus por taang angu, ini lamal aabang ba por angu taang ang naung migoleng. Angmuse ini hoa bendar nu ue por angu edenaveng ene Pafos angu di mi. Gubernur angu ue bendar angu mi mihi. Ene Sergius Paulus. Aing angu, nehe hur adang. Ana vengmee se hula, Barnabas iimal ebendar mi hoa iila muse, ana nehe gahing ila iaru, se Lahatala Evomung-pahang angu omi midadanang hula vengmee hengi angu ebele.
Aarunge ang mi angu di, Yahudi enehe nu ue, ene Bar Yesus (bot ene aabeung Yunani ehur mi se hula, ꞌElimasꞌ). Aing angu tani enehe eele. Ana biasat nehe ajajalat hula, andi Lahatala Ehurvala. Ana gubernur angu at serang. Base Barnabas iimal hoa angmuse, Elimas ana gubernur omi taang senge ekang ing tarima ekang. Bot Elimas ana omi taang senge ekang omi metma Yesus vengaanamang ekang.
9 Aarunge Lahatala ERoh Hamulang angu Saulus aing veng (Saulus ene eabeung angu Paulus), base ana eng metma tani enehe eele angu etatabit euuling. Angmuse ana mateng hula,
10 “Ee, Elimas! Aaing setang oal! Aaing sukat nehe ajajala! Aana nehe ajajalat alolang niang! Emangpi ba aaung angu aana malavang. Aulang angu ebele, na ateing se aana setang enehe eele angu eamulung. Aana ekang bot ening aulang ekang. Lahatala Evia ba molo angu aana bot ekang hula vengtering ekang.
11 Aana vengmee hengi! Eningse Lahatala Ana aaing hukung. Eeng angu ening se kete, bot aana bae uuling na iiba ateing niang, ila ved aaedeng.”
Paulus mateng aulang sengmuse, Elimas eng angu kete tila. Angmuse ana bir panahing lamal, senge nehe panahing iot atang pina, sengila ba atang tedot lamal.
12 Gubernur angu uuling eng taang ateing aulang, bot ana vengmeet Barnabas iimal Yesus ehur aaung-hama angu vengmaring muse, ana mijonga, angmuse ana bot omi metma Yesus vengaanamang.
Ini Yesus Ehur aaung-hama baning ila bendar Antiokia ba propinsi Pisidia mi angu mi
13 Bendar Pafos ba Siprus por taang angu mi muse, Paulus bot eserang ang naung imangpi kampal hila senge aalarit iila bendar nu propinsi Pamfilia mi ene Perga angu mi. Angu mi, ini kampal taang hela, angmuse Yohanis Markus ana lamal iahalang senge bale Yerusalem mi ila.
14 Perga mi ini aadang taang lamal bendar Antiokia ba propinsi Pisidia mi angu mi ila.
Ini ila bendar angu mi, angmuse, uanguveng angu nehe Yahudi ang naung ived hamulang adana, base ini ila nehe Yahudi ang naung ihava hamulang mi Lahatala Aing tajaning eamulung.
15 Uanguveng angu, Lahatala Ehurvala Musa esurat, bot Lahatala Ehurvala aabeung ang naung isurat ba ini basa. Angmuse, hava hamulang angu enehe eele ang naung, Paulus iimal iabanang hula, “Nimang iimal, iivomung-pahang iiba ue se, ni banang iini vengbanang senge ning emangpi ba anga mi anga niomi ening aanamang.”
Paulus ana nehe Yahudi Antiokia mi ang naung iat mateng
16 Angmuse Paulus ana aloming tahi bot ana atang ohit iot taimang. Angmuse ana mateng hula, “Nekaku naung, iing ba bangsa Israel enehe. Bot niva-nimang aabeung ba agama Yahudi maso tila ang naung, iing di iiomi Lahatala midadanang. Angu ebele na banang iini naing vengmee!
17 Lahatala Ana turang mi ping ba bangsa Israel tidat-timang ang naung ing vengtalail medi tila. Ini ila Masir por taang mihi angu, bae iaabang mamolo niang, aarunge Lahatala Ana aaung-hama metma ma inang ini mihit sanang, anguba itabaning angu taang toang maveng. Seng angmuse Lahatala bot Ekavasa eele angu metma iat Mesir mi kaluar.
18 Angmuse, ini aabetat por osing eele ba nehe bae ue mi niang angu mi lamal ila mitung ari buta. Ini iong aanamang, aarunge Lahatala Ana mang kilang iat lamal alolang niang.
19 Angmuse, Lahatala Ana bot bangsa bititu Kanaan por taang angu ening atarahak. Angmuse Ana ipor angu paul, metma tidat-timang ang naung inang, senge metma ipor pasaka ening.
20 Tidat-timang ang naung ini por angu taang aabetat ilelang kanap sampe mitung ratu buta ari iising.
Ini por angu toang aabetat mitung ratu bura ari iising sengmuse, Lahatala Ana nehe ba parkara vengpaputus ang naung songgar metma ma inang senge iapang pina, sampe Lahatala Ana bot Ehurvala nu songgar, ene Semuel angu venghili.
21 Semuel metma Lahatala Ehurvala ening sehi angmuse, tidat-timang ang naung ini banang hula raja ba nu songgar hengi. Angmuse Lahatala Ana Saul angu aing songgar metma raja ening. Saul angu, Kis oal, Benyamin elelang omi. Saul parenta pinat ila mitung ari buta.
22 Angmuse Lahatala Ana at hela aing metma raja angu eahalang. Senge Lahatala Ana bot Isai oal, ene Daud angu aing songgar, metma Saul etelul ening. Lahatala etatabit Daud omi angu ateing bot Ana mateng hula, ꞌIsai oal Daud anga, elamal-etahi angu Nomi adang baa. Base eningse emangpi angu ana ening Nenomi eamulung.
23 Uanguveng angu, Lahatala Ana palait hula Daud etabaning angu nu panatu, senge Israel enehe ang naung ing ening lohit metma iahalang-iavali ang naung eola. Nekaku naung na iing emangpi iiat hubait hula, Daud etabaning ba Lahatala Ana vengpalai tila benang ba Yesus angu.”
Paulus mateng hula Yesus angu Nehe ba Lahatala vengpalait se panatut hoa
24 Paulus ana emateng angu taang hamuat hula, “Mutu Yesus bae ekarajang at lamal jedung angu, nehe nu ene Yohanis, ana Israel enehe ang naung iat hubait hula, ini malekang iava vengbaroti senge iava metma ijasi-iahala angu iola, bot bale Lahatala angu ba eamulung. Sengila ba malekang ing sarani senge matubing hula, ini Lahatala At aaung-hama bot At aabeta tila.
25 Aarunge Yohanis ekarajang angu hula evengtahi muse, ana nehe ang naung iat hubait hula, ꞌIini ekang veng iiomit hula naing anga, Nehe ba turang mi Lahatala vengpalait hula, panatut hoa angu ekang. Venganit aaung-aaung! Nehe nu eningse hula hoa angu iini malekang ading. Aing angu mieele-mibalolu minataang oa. Metma Egahingvala ening di, naing anga bae gahingvala angu at hama niang.ꞌ
26 Nekaku naung! Iing ba boma Abraham etabaning, bot iing aabeung ba iiomi Lahatala midadanang sehi angu, naing venghele hengi! Lahatala Ana Ehur aaung-hama angu metma piat hubai tilat hula, Ana ping ening lohit metma piahalang-piavali ang naung eola bot aabetang ejajehing angu Ana metma ma pinang.
27 Nehe ba Lahatala vengpalai tila angu, turangmi Lahatala Ehurvala ang naung ini hurak metma nehe angu adana tila. Pi agama enehe eele ang naung, bot nehe aabeung ba Yerusalem mi ang naung di, naba ba hurvala ang naung hurak iila angu basat alolang-niang. Ved hamulang kakanap angse, ini hava hamulang mi maso, senge Lahatala Esurat hamulang angu basa. Aarunge nehe ba Lahatala vengpalai tilat hula panatut hoa benang ba Yesus angu, ini bae Ateing niang. Angmuse ini akal aalaping Aing hukung ameang. Aarunge ini ening aulang senge naba ba Lahatala Ehurvala ang naung hurak iila angu eamulung.
28 Ini parkara ening metma Yesus adana senge hula Aing ening abaang, aarunge ini bae Eahalang iiba harak niang. Aulang aarunge ini ila gubernur Pilatus abanang senge Yesus Aing ening Ana aamina.
29 Gubernur angu vengjali, angmuse ini Yesus Aing metma leut vengpakut ahele, ila vengaamina. Aarunge emangpi anga di, ening aulang senge nababa Lahatala Ehurvala ang naung hurak iila angu eamulung. Seng angmuse, Ebaring angu ini leut taang at hela, sengila ba At ila metma daang omi mi mea.
30 Aarunge Yesus Eaamina omimi angu, Lahatala Ana Ekavasa metma Yesus Aing ening Ana bale aabeta tila.
31 Yesus Ana bale aabeta tila muse, Ana Ava metma nehe toang etubing mitoang-mirae. Ing angu ba At hama-hamat propinsi Galilea mi hoa, ila Yerusalem mi angu. Ing ba Yesus Eaamina bot Eaabeta angu uuling ieng taang ateing anguba ini metma Israel enehe ang naung emangpi veng iat hubai.”
Paulus ana iat hubait hula, Lahatala Ehurvala ang naung vengbanang hula eningse Yesus Ana hoa
32-33 Paulus ana emateng angu taang hamuat hula, “Alang! Naing bot Barnabas, noleve anga, ni hoja aaung-hama anga metma iiat hubai hula, naba ba Lahatala metma tidat-timang ang naung iat palai tila angu, angase emangpi jadi tila. Lahatala Ana Yesus Aing ening Eaamina angu omimi bale aabeta tila. Mazmur buku tajaning e eela aaru omi mi angu, Yesus Nehe ba Lahatala Ana vengpalait hula panatut hoa angu hurak vengbanang iilat hula:
ꞌAaing anga Noal.
Naing ba Iimang. Vede ved anga, Na Aaing ohi senge Aana parenta pina.ꞌ
34 Turang mi Lahatala palai tilat hula, Neheba Ana vengpalai tilat hula panatu hoa angu eningse Ana ening bale aabeta, senge Nehe angu bot bae taang aamina niang iila. Angu ebele, Lahatala Ehurvala hurak hula,
ꞌTurangmi Nepalai angu Na metma raja Daud at hubai tila senge hula aaung-hama metma ma enang.
Ba angase, Na hula palai angu bot metma aandi aat hubai, se aaingba Daud etabaning angu ebele.
35 Mazmur buku tajaning aabeung di Daud hurak hula,
ꞌLahatala Ana bae Emalea ba Hamulang ebaring angu vengkilang,
Edaang omimi musi niang.ꞌ
36-37 Hur kokal ba Daud ana metma Mazmur buku tajaning mihurak anga Daud bae ava vengbanang niang! Pi ateing aulang, se raja Daud ana Lahatala Eomi eamulung aaung-hama toang ening iila angu ebele, seng angmuse ana aamina. Ana aamina, angmuse ini aing taloul. Bot ebaring angu musit seng iila. Base pi ateing hula, Daud bae ava vengbanang niang, aarunge Nehe aabeung ba ana vengbanang, benang ba Yesus angu. Yesus angu eningse Ana aamina aarunge Lahatala Ana Aing ening bale aabeta. Angu ebele Ebaring angu bae kabingdena musi di niang.
38-39 Base, kaku naung, iini vengmeet aaung-aaung! Nehe benang ba, Yesus angu! Angu ebele pi malekang tomi metma Aing vengaanamang, senge pijasi-piahala emangpi ba pi ening iila ang naung Lahatala Ana vengahi. Pi ateing iilat hula, boma Musa eparenta evia-via emangpi angu pi eamulung di, angu enangkolang se bae bisat ping ening Lahatala apangaadang mi molo niang. Aarunge pi tomi metma Yesus vengaanamang se, Lahatala Ana pijasi-piahala ang naung vengahi.
40-41 Angu ebele iini malekang veng iiomit aaung-aaung. Misavaka, naba ba turangmi Lahatala Ehurvala ang naung vengbanang iila angu iing vengbaa. Ini hurak iilat hula,
ꞌVengani, iing ba sukat nehe ehura, bot nehe paduli niang ang naung! Eningse Lahatala Ana na emangpi angu ening metma idana base iini jonga-baroti,
bot eningse iini aamina.
Iini jedung aabeta sehi se Na na nu ening, aarunge iini bae iiat tarima niang.
Nehe metma iiat hubait tila di
iini bae iiat manggarati niang”.
42 Paulus ana mateng sengmuse, Paulus bot Barnabas oleve tahit hula lamal hava hamulang angu eahalang. Aarunge nehe angmi ang naung iabanang hula ved hamulang eabeung se bot bale hoa, senge naba ba ini vede vengbanang iila angu, bot taang vengbanang maveng.
43 Ini hava hamulang mi kaluar hela muse, nehe toang angmi ang naung ini Paulus bot Barnabas oleve iamulung. Angmuse oleve iavomung-iapahang hula, “Pi ateing hula, Lahatala Omi etatabit aaung metma mapinang. Angu ebele iini malekang iiomi metma Aing vengaanamang.”
Yahudi enehe eele ang naung Paulus bot Barnabas oleve iatobang
44 Minggu eminu, nehe Yahudi eved hamulang veng muse, nehe bendar angu mi angu emangpi hoa senge hula Lahatala Ehur Aaung-hama angu venghele.
45 Aarunge nehe Yahudi enehe eele ang naung uuling nehe toang ba hoa Paulus bot Barnabas oleve ing venghele angu ateing muse, ini iomi alil etatabi. Angu ebele Paulus ana mateng sehise, ini aing lavang, bot mateng ehura-emananti.
46 Aarunge Paulus bot Bernabas oleve etatabit taang baranit mateng bot bae iuangmari niang. Ini mateng hula, “Etabit Lahatala ematurat via bukat metma pingba Yahudi enehe ang naung ma pinang, bot Ana Hur Aaung-hama angu di metma ma pinang iila. Aarunge iini bae iiat metma iomimi niang. Iini ening aulang base, iingba matubing hula, iini bae Lahatala At aabetat ejajehing niang. Ba angase, ni hula Hur Aaung-hama angu baning ila metma bangsa aabeung ang naung ba iat hubai, se iini bae iiat tarima niang iila angu ebele.
47 Se angaba Lahatala Ana metma veng ning gahing iila, emenghula boma Yesaya ana hurak iila angu edadenang hula,
ꞌNa iing matubing iila metma jara ening, senge jara angu iini baning metma bangsa aabeung ba bae Yahudi enehe niang ang naung inang,
aulange via ba hoa Naing mi tahi angu iini ening ana jara, senge ini uuling Nateing,
aulange Na ing vengaahit metma iahalang-iavali ang naung eahalang, senge ini aabetang ejajehing angu harak.
Bot iini malekang via angu matubing por alolang anga taang, etupa dena ila etupa dena mi.”
48 Nehe bangsa aabeung ba bae Yahudi enehe niang ang naung vengmeet aulang muse, ini navera. Angmuse ini Lahatala Aing tajaning hula, “Lahatala tajaning! Lahatala EHur Aaung-hama angu, etatabit aaung!” Bot nehe ba turangmi Lahatala vengtalail iila senge At aabetat ejajehing angu ing di ue ang mi. Angmuse ing emangpi angu iomi metma Mutu Yesus vengaanamang.
49 Lahatala EHur Aaung-hama angu aalilit taang-taangmi ila bendar angu mi iipi.
50 Aarunge bendar angu enehe eele, bot nehe jangu ba eele-balolu ang naung di ue angmi. Iiba angu iomi metma Lahatala midadanang. Aarunge Yahudi enehe ang naung hoa nehe eele ang naung iomi taang, angu ebele nehe ba bendar angu mi ang naung ini Paulus bot Barnabas oleve ing bue sengila ba iaterit bendar angu eahalang.
51 Bendar angu mi kaluar hela muse, Paulus bot Barnabas oleve moro ia veng angu teret bia senge matubing hula, nehe bendar angu mi ang naung iiat bae oleve ing venghele niang. Angmuse ini bale tahi lamal bendar angu eahalang. Ini bot bendar nu ene Ikonium, angu mi ila.
52 Aarunge nehe iomi metma Mutu Yesus vengaanamang iila Antiokia mi ang naung, iomi navera etatabi, se Lahatala ERoh Hamulang iomi ening aanamang angu ebele.