Ⅷ
Ⅰ na Bɔkoꞌba kënyï kilende zi Musa iya te, “Ari zi bɔ dɔliŋɔ kiya zi bo te, ‘Ŋere Bɔkoꞌba iya te, “Ola bilaka ma ga kari ꞌdɔ lïjë kumötu ma.
Ⅱ Ɔdɔ kilagi mëdï modɔ karama dɔ dɔliŋɔ ꞌbï nime pili ti nyɔꞌdɔ koso lɔ yïmo.
Ⅲ Nyɔꞌdɔ ti koso lɔ mï yöpö kpaki kebe mï liŋɔ ꞌbï pili kebe rö ꞌbï kebe dɔ a töꞌdö ꞌbï ga kote mï liŋɔ ꞌba turu ꞌbï naga nima rɔ gɔ bilaka ꞌbï ga pili kpaki kebe mï akirisi wa ꞌba ꞌja ꞌbï kebe mï sele ni kpaki.
Ⅳ Lïjë ti köꞌbö töpu röyï rɔ bilaka ꞌbï ga ti turu ꞌbï ga pili.” ’ ”
Ⅴ Kina Bɔkoꞌba kilende zi Musa iya te, “Iya zi Arona kombi përï abo tɔrɔ dɔ yöpö ni ti gbögbö ti putï mo ga pili koja nyɔꞌdɔ mï dɔyayi ꞌba Ezipeto.”
Ⅵ Kina Arona koja kɔnyɔ bo ŋgï kombi tɔrɔ dɔ mini pili ꞌba mï Ezipeto. Kina nyɔꞌdɔ ŋgï setiyi kote mï dɔyayi nima.
Ⅶ Tine bɔ kata ni ako gbï koꞌdɔ dɔŋgala ma ꞌbënnï ga lïjë koja nyɔꞌdɔ gbï tara.
Ⅷ Bɔ dɔliŋɔ ïdëkï Musa ni ti Arona kilende teyi, iya te, “Ilendeke zi ŋere Bɔkoꞌba kogba nyɔꞌdɔ naga nime yaga di rɔma ti bilaka ma ga. Kina ti mola bilaka ꞌbe ga ŋgï kari tumu roma zi bo Bɔkoꞌba.”
Ⅸ Musa ileki zi bɔ dɔliŋɔ, iya te, “Ma ti mï këyï ꞌdɔ tititi Bɔkoꞌba gɔ lende ꞌbï gbï ti turu ꞌbï ga kpaki ti bilaka ꞌbï ga. Tine kada mo na koza zö. Nyɔꞌdɔ naga nima ti kölu ŋgï pili liwo yaga kola ŋge rɔ ma mï yöpö.”
Ⅹ Bɔ dɔliŋɔ ileki dɔmo, iya te, “Ilende zi Bɔkoꞌba tïlëndö.”
Musa iya te, “Ti moꞌdɔ ŋgï tara kɔzɔ ame kititi ne kina nï ti kikali ŋgï rɔ ma laka Bɔkoꞌba ꞌberi mɔtɔ inza kɔzɔ ŋere Bɔkoꞌba ze ꞌba Yisarele.
Ⅺ Nï, kpe ti turu ꞌbï ga ti bilaka ꞌbï ga pili inza koꞌjake kïnë a mɔtɔ rɔ nyɔꞌdɔ kpe ŋgila ye, tine ŋge rɔ ame ga mɔlo mï yöpö ne.”
Ⅻ Kina Musa ni ti Arona kënyï ŋgï di yayi. Tine na Musa kari kilende ŋgï zi Bɔkoꞌba ꞌdɔ kona nyɔꞌdɔ tönë ga bo koꞌde dɔ bɔ dɔliŋɔ ne yaga.
ⅩⅢ Kina Bɔkoꞌba koꞌdɔ ŋgï kɔzɔ ame Musa kititi ne tara. Nyɔꞌdɔ tönë ga ma kebe rö ti ma kpa liŋɔ ni ti ma mï nyaka naga ölë ŋgï me yaga.
ⅩⅣ Kina bilaka koloma ŋgï rɔ tulu dɔmo kɔzɔ kurugumu tara kato kogba mï dɔyayi.
ⅩⅤ Tine ɔdɔ bɔ dɔliŋɔ koŋgɔ nyɔꞌdɔ tönë ga kölë ꞌdeni tara tine dökïꞌdï bo ileki këddï ŋgï ꞌböwu yaga kɔzɔ lende tönë Bɔkoꞌba kiya mɔlo zi Musa ne tara.
Duru Gɔ Banya
ⅩⅥ Ŋere Bɔkoꞌba iya zi Musa te, “Iya zi Arona kombi përï abo tɔrɔ komba lupu timo. Kina lupu ꞌba mï dɔyayi ꞌba Ezipeto nime pili ti kuyï rönï ŋgï rɔ duru gɔ banya.”
ⅩⅦ Musa ni ti Arona oꞌdɔ kɔzɔ a nime te. Arona ombi közï bo tɔrɔ komba lupu ti përï kina duru gɔ banya kɔdɔ ŋgï setiyi tonyo bilaka kpaki ti yërï mo ga. Lupu ꞌba mï dɔyayi ꞌba Ezipeto nima pili ënyï kuyï rönï ŋgï yaga rɔ duru gɔ banya.
ⅩⅧ Tine ɔdɔ bɔ kata ni kako gbï kiyɔzɔ toꞌdɔ mo ti dɔŋgala ma ꞌbënnï ga tine pele lïjë ɔꞌbɔ dë. Kina duru gɔ banya koloma ŋgï rɔ tonyo bilaka kpaki ti yërï mo ga.
ⅩⅨ Bɔ kata naga nima ileki kiya zi bɔ dɔliŋɔ te, “Akoꞌdɔ ꞌba Bɔkoꞌba na.” Tine bɔ dɔliŋɔ dökïꞌdï mo ëddï ŋgï kuwö dɔ Musa ni dë kɔzɔ lende tönë Bɔkoꞌba kiya mɔlo zi Musa ne tara.
Kɔŋɔ
ⅩⅩ Kina Bɔkoꞌba kënyï kilende zi Musa, iya te, “Ënyï mɔlo mï dɔŋbɔ kurë dɔ bɔ dɔliŋɔ kɔri mini kiya zi bo te, ‘Bɔkoꞌba iya te, “Ola bilaka ma ga kari ꞌdɔ lïjë kumötu ma.
ⅩⅪ Ɔdɔ kope közïyï dë di gönnï kola lïjë kari mëdï moja kɔŋɔ döyï nï kpe ti turu ꞌbï naga nima ti bilaka ꞌbï ga pili. Mï liŋɔ ꞌbe ga ꞌba Ezipeto ti koso lɔ rɔ kɔŋɔ meꞌde kote dɔyayi.
ⅩⅫ Tine minza miꞌdi lïjë kömö Gosene gɔ bi ꞌba bilaka ma ga Yisarele ꞌdɔ kikali ŋgï omba ma ŋere Bɔkoꞌba mëdï ŋgï mï dɔyayi nime.
ⅩⅩⅢ Ti moꞌdɔ geli löŋgö ye ti bilaka ma ga. Kɔŋɔ nime miya ne ëdï kodowe bi tïlëndö.” ’ ”
ⅩⅩⅣ Kina Bɔkoꞌba koja sëyï ꞌba kɔŋɔ ma kinza kiya ŋgï mï dɔyayi ꞌba Ezipeto koso kebe mï liŋɔ ꞌba bɔ dɔliŋɔ mo ti ꞌba turu abo ga kɔŋɔ kirasi mï dɔyayi nima ŋgï.
ⅩⅩⅤ Kina bɔ dɔliŋɔ kïdëkï Musa ni ti Arona ŋgï kilende teyi, iya te, “Ari kumuke roma zi Bɔkoꞌba ꞌbe tɔ nima mï dɔyayi ꞌba Ezipeto bine.”
ⅩⅩⅥ Tine Musa ileki zi bo, iya te, “Tara inza kako römöyï yërï ame dëdï dumu rɔ roma zi Bɔkoꞌba ze ne inza koꞌdɔ dökïꞌdï bilaka ꞌbï ga ꞌba Ezipeto laka. Ɔdɔ lïjë kari koꞌja ze dëdï toꞌdɔ wa ame koꞌdɔ dökïꞌdï nnï dë laka kɔzɔ a nime te mɔtɔga lïjë ti kuꞌdu ze gɔmo ti döku kupö ze yaga.
ⅩⅩⅦ Toꞌdɔ mo oꞌdɔkɔ gɔ dari ŋbö mï zana mökö rɔ liŋgere ꞌba kada dɔ mota na gɔ dari dumu roma zi ŋere Bɔkoꞌba ze di yayi kɔzɔ ame mo bo kose zize ne tara.”
ⅩⅩⅧ Bɔ dɔliŋɔ iya te, “Ti miꞌdi ye karike tumu roma zi Bɔkoꞌba ꞌbe nima yï mökö yayi. Tine kinza karike dë kɔwɔ. Kina ititi Bɔkoꞌba ti gɔma.”
ⅩⅩⅨ Musa iya te, “Tari ma di bine na ti mititi ŋere Bɔkoꞌba göyï ꞌdɔ kɔŋɔ kitaꞌba yaga tïlëndö di röyï gbï di rɔ turu ꞌbï ga ti bilaka ꞌbï ga pili. Tine kinza kebe kïndëndë dɔze dë kpe gbï rɔ tïndëndë kebe ꞌböwu kota gɔ bilaka ze ga di bi tari tumu roma zi ŋere Bɔkoꞌba ze.”
ⅩⅩⅩ Kina Musa kënyï ŋgï di yayi kari kititi Bɔkoꞌba.
ⅩⅩⅪ Kina Bɔkoꞌba koꞌdɔ ŋgï zi bo kɔzɔ a ma bo kititi. Kɔŋɔ tönë ga itaꞌba ŋgï di rɔ bɔ dɔliŋɔ ni ti turu abo ga ti bilaka abo ga pili. Kïnë kɔŋɔ ma gɔkɔ ꞌdɔ koꞌja te, ari kinza kpe.
ⅩⅩⅫ Tine bɔ dɔliŋɔ ebe kogbɔ dökïꞌdï bo ꞌböwu gbï kebe kilagi tola ya naga nima kari.