ⅩⅬⅨ
Yakoba Ose Kpa Bo Zi Kole Abo Ga
Ⅰ Yakoba ïdëkï kole abo ga pili kako zi bo, bo iya te, “Otɔtɔke rɔye kakoke gɔ miya wa ame ga pili këdï kömö ziye kada mɔtɔ ndɔ yayi ne ziye.” Kina bo koloma ŋgï toba ŋgala nime zïnnï.
Ⅱ “Kole ꞌba Yakoba ga ako kojeke mbili ye.
Ako kuwöke lende kiya ꞌba ꞌbu ye Yisarele.
Ⅲ Rubënï kole dɔndende ma, nï na rɔ tigɔ ma.
Nï na möyö yi dɔgba gba ti tigɔ ma ame ꞌba dɔ yɔbi ma.
Nï na mbiri di dɔ kole ma ama ga pili, tigɔ ꞌbï iteli ꞌbënnï.
Ⅳ Tigɔ ꞌbï kɔzɔ dölölö ꞌba mini koso tara.
Tine inza këddï kpe mbiri kiteli ya ama ga.
Römöyï ebe köꞌdö ti ꞌja ꞌba ꞌbu yï kodɔ rɔ kaya rɔ ꞌbu yï.
Ⅴ Simona kpe ti Lëwë, kpe rɔ löndö dökïꞌdï ye kɔtɔ.
Indaꞌbake mbele ꞌbe ga ŋgï koꞌdɔke ya.
Ⅵ Minza modɔꞌbɔ rɔma tiye mï kpa kususu ꞌbe.
Minza moloma tiye ɔdɔ kotɔtɔke kpeye.
Eꞌbe rɔ ya kupöke bilaka.
Okeke ndï ŋgulö sa ŋgï bërï rɔ ma sari.
Ⅶ Ya kënyë ꞌbe nima ti dökïꞌdï kënyë ꞌbe nima ti koꞌdɔ ye nduwë rɔ kpa sönö.
Ti mïyëyï ye rɔ kɔtɔkɔtɔ mï dɔyayi ꞌba Yisarele.
Ti moza mï kpa roba ꞌbe ga titititi.
Ⅷ Yuda, löndö yï ga pili ti kïlëlu yi.
Ti kaꞌda bɔ ya ꞌbï ga.
Löndö yï ga ti kolɔdɔ bërï zïyï.
Ⅸ Nï kɔzɔ tabïyö ꞌbɔꞌbi ame kindaꞌba yida.
Bo ileki kako timo liŋɔ na bo köꞌdö ŋgï bërï.
Yë na ti kilaŋa rönï kari koŋbeŋbe kpa bo?
Yë na ti kilaŋa rönï kari koŋbeŋbe kpëyï?
Ⅹ Yuda, përï ꞌba ŋere ti köꞌbö közïyï.
Kupö yï na ti köꞌbö ŋburu rɔ ŋere ŋbö bɔ dɔ ŋere mo kako.
Bilaka pili ti koro bo.
Ⅺ Bo ti këdï rɔ bɔ mɔri ma löbu.
Mɔwɔ këdï koꞌdɔ rɔ layi ti këdï zi bo rɔ mbëmbë.
Bo ti kosi dɔ akaca abo yɔki mɔtɔ ga.
Layi mo ti këdï rɔ mbëmbë.
Bo ti kurögö bɔŋgɔ abo ga timo.
Ⅻ Kɔmɔ bo öꞌbö ŋgï rɔ ma kasi di zi layi.
Kiliŋba kpa bo aŋmi ŋgï ŋböwö di bi tuwë wï.
ⅩⅢ Zebolona, ti koloma köꞌbö kpa mini löbu.
Sorope ti köꞌbö tusuru kpa götö abo.
Dɔ maga abo ti këdï rɔ ma kɔwɔ ŋbö kömö Sidona.
ⅩⅣ Yisakara ŋgï kɔzɔ akaca ma kitigɔ ame köꞌdö mï löŋgö akombi abo ga.
ⅩⅤ Tine ɔdɔ bo koŋgɔ bi ꞌba rɔ kindawo mo kele, dɔyayi mo kele
na bo kodi gɔ bo tombi akombi.
Öꞌbö tutörï bo mï ndɔbɔ kɔzɔ atɔli.
ⅩⅥ Dana ti këdï rɔ ŋere dɔ bilaka abo ga.
Lïjë roba kɔtɔ ꞌba Yisarele naga na.
ⅩⅦ Bo kɔzɔ murë ame köꞌdö kpa kɔri ne.
Bo oga ndï kosani bɔ dɔmo kilaꞌba bërï.
ⅩⅧ Bɔkoꞌba, mëdï molɔꞌbɔ ꞌbama ŋgï gɔ nï na kɔmɔ ma.
ⅩⅨ Gada, bɔ akolɔ ti kota kpëyï,
tine ti kuyï kpëyï koga lïjë.
ⅩⅩ Asera, akonyo ꞌbï ti köꞌbö rɔ a ma laka.
Akonyo ꞌbï ti köꞌbö rɔ ma koŋmi kɔzɔ akonyo ꞌba ŋere.
ⅩⅪ Napatali, nï ꞌbëyï kɔzɔ gole riŋa mbëmbë,
ame köyö kole ma kele ne.
ⅩⅫ Yesepa, nï ꞌbëyï kɔzɔ ŋgërï ame kötu kpa daa ne.
Dɔŋgila mo ga aꞌba kari dɔ reki.
Bo ana rɔ mbëmbë.
ⅩⅩⅢ Bɔ ya ꞌbï ga ti kota kpëyï.
Lïjë ti koga göyï ti kanya.
ⅩⅩⅣ Tine ti kindaꞌba kanya ꞌbëyï kitigɔ.
Közïyï inza kïlëꞌdï.
Tigɔ abo ꞌba Bɔkoꞌba ti kiꞌdi kɔnyɔ yï köꞌbö rɔ ma kitigɔ.
Bo na rɔ Bɔkoꞌba ame koloma toŋgɔ gɔ Yakoba bine ti tigɔ abo,
kɔzɔ bɔ koda kamölö tara ne.
Bo na rɔ döku ꞌba kɔnyi zi Yisarele.
ⅩⅩⅤ Bɔkoꞌba ꞌba ꞌbu yï na kokɔnyi yi.
Bo na ti tigɔ dɔ kiteli.
Bo koꞌdɔ yëyï zïyï.
Bo kiꞌdi tɔrɔ kaꞌdi zïyï.
Bo kiꞌdi mini kulöwu zïyï di mï yayi.
Bo koja gɔ löyö zi ꞌja ꞌbï ga.
Bo kiꞌdi mba mo ga kïlërï.
ⅩⅩⅥ Yëyï ma ꞌba ꞌbu yï ele kiteli yëyï ꞌba mini këyï ma kɔlɔ di mï döku löbu.
Lïjë döku naga nime ëdï mɔlo bine di bi tisaki ꞌba dɔliŋɔ nime.
Yëyï naga nime kotɔŋi rönnï pili ti dɔ Yesepa.
Oza bo ꞌdeni di mï löŋgö löndö bo ga.
ⅩⅩⅦ Benyimona ꞌba bo rɔ bïlö wölïwölï ma kembe.
Bo öꞌbö ꞌba bo tupö yida tonyo mo ŋgï rɔ kɔmɔ kada pili.”
ⅩⅩⅧ Ŋgala ma Yakoba koꞌdɔ lömu timo dɔ kole ꞌbutë dɔmorïyö abo ga na me. Ya naga nime lïjë na rɔ yï lïŋgï ꞌba kpa roba ꞌbutë dɔmorïyö ꞌba Yisarele. Bo oꞌdɔ lömu pili zïnnï rɔ kɔtɔkɔtɔ gɔ wa ame ga koriya tïnnï.
Tölë ꞌBa Yakoba
ⅩⅩⅨ-ⅩⅩⅩ Kina Yakoba kose kpa bo ma ŋburuŋburu mo ŋgï zi kole abo ga, bo iya te, “Mëdï mozi ꞌdeni gɔ töku ne baba ni. Tine moꞌdɔkɔ ꞌdɔ kombike töku ma kilekike timo mï dɔyayi ꞌba Kanana. Ari kusuke ma bi kɔtɔ ti baba ni mï tïꞌbörö ma tönë mï nyaka ꞌba Makapela ne. Ëdï kebe kapa Mamore ma kari yïbï. Gɔ bi nima pa mɔlo bine rɔ bi ꞌba Eporona eꞌbe Ete. Tine Abarayama ugö ꞌdeni di zïnï tusu bilaka abo ga yïmo.
ⅩⅩⅪ Bi nima na kusu Abarayama ni ti ꞌja abo Sara teyi, gbï ti Yisika ni ti ꞌja abo Rebeka. Kina musu ꞌja ma Leya gbï yayi.
ⅩⅩⅫ Nyaka nima ꞌbu ze löbu ugö ꞌdeni di zi eꞌbe Ete kpaki ti tïꞌbörö mo.”
ⅩⅩⅩⅢ Kina ɔdɔ Yakoba kote tose gɔ lende naga nime ꞌdeni zi kole abo ga kɔzɔ a nime te tine, bo öꞌdö ŋgï bërï yɔ na bo kulöku ŋgï.