Bafut 2 BaTesalonika 1

Àŋwàꞌànə̀ Paul yî àyòŋtə̀ a mbô ŋ̀ghòtə̂

BaTESALONIKA

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Paul. Kaa àghaꞌa a lɛ ŋwaꞌà sàꞌàtə̀ a ajàŋ mə à lɛ ŋŋwàꞌànə a yi ntsyambìì ya a mbo baTesalonika aà. À lɛ ŋŋwàꞌànə̀ aa a ntsisə ɨ̀fɔrɨnə ɨnnù jìi mə ɨ lɛ mbù ǹzi ŋkuu mbuurə nɨ̂ ɨ̀nnù jìi mə à lɛ ndɨ̀ꞌɨ̀ a mbo baTesalonika a nɨ̂ ŋ̀wàꞌànə̀ yî ǹtsyàmbìì ya aa.

BaTesalonika lɛ sɨ foonsə nɨ̂ ànnù ya yìi mə Paul yumbɔŋ à lɛ ndɨ̀ꞌɨ̀ ǹloŋ ànnǔ ajàŋ mə Kristo à ka yǐ bǔ bɨ̀ɨ̀ aa, bo bɨ̀ ɨ̀nnù jî mɔꞌɔ̀ (2.5,15; 3.6-10). A bə tsǒ bo lɛ ŋkwɛrə aŋwàꞌànə̀ yî mɔꞌɔ, ŋwaꞌatə nɨ mə a lɛ nlò aa a mbo Paul, la a bə̂ m̀bweꞌesə̀ (2.2). Àŋwàꞌànə̀ ma yû a ghɨrə̀ bo waꞌatə̀ nɨ mə nòò ǹzi Kristo wa mə Paul à lɛ sɨ swoŋə aa, à kùꞌù mə̂. Ma mùu ajàŋ, bo bî mɔꞌɔ bɨ maꞌàtə̀ mɨfàꞌâ myaa ntɨgə nləgɨlə ŋkarə tsǒ mə bo lɛ ntɨgə ŋwaꞌatə nɨ mə nòò ǹlwìꞌî m̀bi à kùꞌù mə̂ aà (3.6,11)! Ma yû a burə̀ ǹtsanə! Paul a ŋwaꞌanə̀ ǹnaŋsə waꞌasə waa (3.6,14,15), ǹdɨꞌɨtə waa mə tâ bo lwiꞌi a mûm ɨ̀nnù jya jìi mə yu lɛ ndɨ̀ꞌɨ̀ a mbo bo aà, ŋ̀ka ŋeꞌesə nɨ̂ waa (2.15; 3.7-10). Ŋ̀waꞌatə nɨ a mbo bo annù ya yìi mə à lɛ ntɛꞌɛ mfoo nswoŋ nloŋ ajàŋ yìi mə a kuꞌunə a ŋka mfàꞌà nɨ̂tɨ̀ɨ̀ aà, bɛɛ ŋù a tuu mfàꞌa a tsuu kɨ jɨ (3.10)!

Paul à lɛ ntɨgə ntɔꞌɔtə a mbo bo a ajàŋ mə mbə bɨ zî noò ǹlwìꞌìnjɨ̀m wa aà. Ŋ̀ghɨrə mə tâ bo zi ɨnnù jìi ɨ ka yǐ kɨ dɨ̀ꞌɨ̀ mə Ǹjwî M̀màꞌàmbi yâ ɨ̀ ka mə̂ aa koontə̀ aà (2.1-12). Ŋù m̀buꞌu ɨnnù jî bɨ wa à ka yǐ fòo zì yaꞌa, ɨ kɨ bweꞌesə nɨ̂ m̀bi nɨ̂ ɨ̀nnù jî yɛ̌yɛrə bo bɨ̀ ɨ̀nnǔtsyâmbo jì bɨ̂ (2.9-2).

Ka mə bɨ lɛ mbweꞌesə baTesalonika aa, ŋ̀ghòtə ya ɨ lɛ mburə ka kɨ yòŋə̀ nɨ̂ Kristo nɨ̂ ǹtɨɨ̀ waa tsɨ̀mə̀. Paul a burə̀ ka kɨ dorɨtə nloŋ ŋgaà yàà. Àbìintɨɨ̀ yaa a lɛ sɨ naŋsə ŋkwe, bo burə̀ ka kɨ kɔ̀ŋə̀ nɨ̂ waa bo nɨ bo (1.3,4). Paul a swoŋə̀ nɨ a mbo bo mə tâ bo ka ntsaꞌatə nɨ̂ Nwî ŋ̀waꞌatə nii ŋkɨɨ nlɔɔ nɨ mə tâ Nwì à ghɨrə tâ nɨ̀ghàâ ni nɨ̀ kɨɨ ŋwaŋsə nsɛ̀ɛ̀nə̀ ŋ̀ghɛɛ tsǒ ajàŋ yìi mə nɨ lɛ ŋghɛ̀ɛ̀ a tɨtɨ̀ɨ bo aà (3.1-2). Paul à lɛ sɨ tɨgə ŋkɨɨ ntsaꞌatə nɨ̂ Nwî a atû ŋ̀ghotə ya mə tâ Nwì yìi mə a lə̀ə ŋkàꞌâ yì aaa, tâ à ka mbɛ nɨ̂ waa, m̀fa nɨ̂ ǹjoò tsɨ̀m jìi mə ɨ ka ghɨ̀rə bo ka ŋkwe ŋghɛɛ nɨ̂ m̀bìì a mûm àbìintɨɨ bo bɨ̀ a nɨ̂ àfàꞌà Nwî aà (1.11-12; 2.16-17; 3.3,16).

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1.1-2.

2. Àjàŋ mə Paul à lɛ mbeentə waa ntɨgə ŋghaꞌasə nɨ̂ Nwì aà 1.3-12

3. Àdɨꞌɨtə̀ ǹloŋ annǔ ajaŋ mə Mmàꞌàmbî à ka yǐ bǔ zì aà 2.1-17

4. Àdɨꞌɨtə̀ mə bɨ ka nzi akòrə̀ nɨzî yaa a mum Kristo 3.1-16

5. Ɨ̀nnù jìi mə Paul à lɛ nswoŋə a nlwìꞌìsə 3.17-18

1 Àŋwàꞌànə̀ yìi mə a lo a mbo Paul nɨ Silas nɨ Timoti ŋ̀ghɛɛ nɨ mbo bə̀ bɨ Nwî Taà yìinə̀ nɨ Mmàꞌàmbî Yesu Kristo mə bɨ tswe a ndânwì a Tesalonika aà.

2 Tâ ɨ̀bɔ̀ŋ nɨ̂ m̀bɔɔnə̀ yìi mə ɨ lo mbo Taà yìꞌinə̀ Nwì bo bɨ̀ M̀màꞌàmbî kristo aa, tâ ɨ̀ tswe a mbo bù.

Ànnǔ ntsɔꞌɔtə mɨ̀saꞌa a noò yìi mə Yesu Kristo à ka yǐ bǔ zì aà

3 Bɨ̀lɨ̂m bâ, a kuꞌunə boŋ biꞌi fa mbɨꞌɨkə a mbo Nwì a ŋgɔ̀ŋ bɨ̀nòò bɨtsɨ̀m ǹloŋ ŋkwitû ghuu, ŋ̀loŋ mə àbìintɨɨ̀ yuu a naŋsə ŋkwe tsiꞌì sɨgɨ̀nə̀, àkɔ̀ŋnə̀ yìi mə nɨ kɔ̀ŋnə̀ ghuu bu nɨ bù ghu aa, a kɨɨ̀ ŋghɛɛ nɨ̂ m̀bìì. 4 Ma mùu ajàŋ, bìꞌi tɨgə ntərə nɨ̂ yiꞌi nloŋ ŋgaa yùù a mbô ŋ̀ghòtə Nwî jî mɔꞌɔ nloŋ mə nɨ̀ tswâ àbìintɨɨ̀ yuu a tɨɨ̀, ǹtswe a mûm ŋ̀gɨꞌɨ yìi mə nɨ yə, bo bɨ̀ ajàŋ yìi mə bɨ tsɔꞌɔ nɨ̂ àkòrə̀ yuu aà.

5 Ma yû a dɨ̀ꞌɨ̀ nɨ mə ajàŋ yìi mə Nwì a tsɔꞌɔtə mɨsaꞌa aa, a tsinə̂, ma mùu ajàŋ, nɨ̀ ka yǐ kɨɨ kùꞌùnə a ŋkuu a mûm ànnù nɨfɔ̀ Nwî yìi mə nɨ yə nɨ̂ ŋ̀gɨꞌɨ ghu aà. 6 À nɨ aa tsiꞌì ànnù yìi mə a kuꞌunə a ŋghɨ̀rə aà, ajàŋ mə Nwì à kàꞌa mə yu ka yǐ nɨŋ ŋgɨꞌɨ a nu bə̀ bìi mə bɨ ghɨ̀rə̀ nɨ̀ yə̂ nɨ̀ ŋ̀gɨꞌɨ aà, 7 ɨ bàŋnə ghɨrə tâ bù bìi nɨ yə ŋgɨꞌɨ aa, nɨ bìꞌì, tâ bìꞌinə̀ fwɛtə wâ noò mə Mmàꞌàmbə̂ Yesu à ka yǐ lǒ aburə ɨ sɨgə bo bɨ̀ baangel bi bî wè a mûm ǹlwà mɔꞌɔ tâ bɨ̀ yə aà. 8 À ka yǐ sɨgə aa, aŋkwiꞌinə̂ ànnu, a ŋnɨŋ ŋgɨꞌɨ a nu bə̀ bya mə kaa bɨ sɨ̀ Nwî zi, bo bɨ̀ a nu bya bìi kaa bɨ sɨ ntoò M̀màꞌàmbî Yesu ya yuꞌunə aà. 9 Ŋ̀gɨꞌɨ yìi mə Nwì à ka yǐ nɨŋ a nu bo aa, ɨ̀ ka yǐ bə aa ajàŋ mə à ka yǐ bwɛsə waa ŋgaa yî mɔ̀ꞌɔ, ɨ kɨ̀ŋə̀ waa mə tâ bɨ yi ŋwaꞌa a mbɛɛ Mmàꞌàmbi bo bɨ̀ a mum nɨ̀ghaꞌà ni nî wè koòntə̀, 10 wa njwi mə à ka yǐ zǐ a ŋkwɛrə nɨ̀ghaꞌà ni bo bɨ̀ àghuꞌusə̀ a mbo bə̀ bi, a mbo bə̀ bɨ̀tsɨ̀m bìi mə bɨ bii yi aà. Nɨ̀ ka yǐ kɨɨ bə bə̂ bî mɔꞌɔ a tɨ̀ɨ bo maa njwî nloŋ mə nɨ̀ lɛ mbii ntoò ya mə bìꞌi lɛ nzi nɨ yu a mbo bù aà. 11 A bə̂ ǹjiꞌì ànnù yìi mə bìꞌi tsàꞌàtə̀ nɨ̂ Nwî a ŋgɔ̀ŋ bɨ̀nòò bɨ̂tsɨ̀m ŋ̀waꞌatə nɨ̂ ghuu ghu aà, mə tâ Nwìŋgɔ̀ŋ yiꞌinə̀ à ghɨrə ghuu tâ nɨ̀ kuꞌunə nɨ bə̀ bìi mə à twǒŋ aa, ŋkɨ ŋghɨrə mə ɨ̀nnù jî sɨgɨ̀nə̀ jìi mə nɨ̀ kàꞌa mə nɨ ka kɨ ghɨ̀rə a mûm àbìintɨɨ̀ aa, tâ à fa a mbo bù a njɨm mɨ̀dàꞌa mi. 12 Ma mùu ajàŋ tǎ ghɨ̀rə mə tâ Ɨ̀kum Yesu Kristo tâ ɨ̀ tswe nɨ nɨ̀ghaꞌa a mbo bù, tâ nɨ̀ kɨ ŋkwɛrə nɨghaꞌa ghu mbo, a njɨ̌m àbɔ̀ŋəntɨɨ Nwîŋgɔ̀ŋ yìꞌinə abɔ̀ꞌɔ Mmàꞌàmbî Yesu Kristo.