Bafut 3 Jɔn 1

Àŋwàꞌànə̀

JƆN

yìi a yweꞌe ji tarə aà

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Jɔn ǹdɨ̀ɨ̂ ǹdânwì yìi mə à lɛ ŋkɨ ŋwaꞌanə 2 Jɔn aà. À lɛ Ŋŋwàꞌànə̀ aa a mbô ǹsûkàꞌâ yì Gaius. À lɛ ŋŋwàꞌànə a ntsisə ɨnnù jìi mə ɨ lɛ mfɛ̀ꞌɛ̀ ǹloŋ ŋgǎŋswoŋ ntoo yì ǹsɨgɨ̀nə̀ jìi ɨ lɛ sɨ təə ŋkarə ndɨꞌɨ nɨ̂ ànnù Nwî a ŋghotə jìi mə ɨ lɛ ntswe a ɨdɨgə ɨdɨgə aà. Bə̀ tsiꞌì tsǒ ma bû, bɨ̀Krisèn lɛ ntswe nɨ̂ ŋ̀kwɛ̀rə̂ waa a mɨlaꞌa bo, ɨ kɨɨ kɨ kwɛtə a waa (6-8). La Diotrephes, ǹtsyàsə̀ yìi mə à lɛ ntswe maa ŋghotə aa, à lɛ ntuu ŋkwɛrə̀ waa, m̀fiꞌisə nɨ̂ bɨ̀Krisèn bìi mə bɨ kwɛrə nɨ̂ waa laa a ŋghotə̂. Ma yû a ghɨrə̀ mə tâ Jɔn à ŋwaꞌanə a mbo ǹsûkàꞌâ yì Gaius mə tâ à ka ŋkwɛtə ŋgǎŋtoo Nwî ma jû jìi mə ɨ fàꞌà ǹloŋ aa ŋkwîtu Kristo aà (9-11). Jɔn a swoŋ mə yumbɔŋ yu ka zi lèntə annǔ Diotrephes yìi mə a tuu adaꞌâ yi, m̀fa nɨ̂ ŋ̀gɨꞌɨ a mûm ghòtə aà (10).

Àŋwàꞌànə̀ ma yû a dɨ̀ꞌɨ̀ nɨ mə a bɔŋ ŋkɨ mbə annù yî tɨ̀nsə̀ a ŋkwɛtə bə̀ bìi mə bɨ ghɛ̀ɛ ntoò Nwì aà. A kuꞌunə mə bǎŋghotə bɨ̀tsɨ̀m ka ŋkwɛtə a nsɛ̀ɛ̀nsə̂ ǹtoo yì ǹsɨgɨ̀nə̀. Ŋù yìi mə a fa njoo ŋkwɛtə nɨ̂ ŋ̀gǎŋtoo ghu aa, bo kɨɨ mfaꞌa aa bo bɨ̀ ŋgǎŋntoo mà jyâ, m̀bə aa ŋgàŋakòrə̂ jyaa (7-8).

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1-4

2. Jɔn a beentə Gaius 5-8

3. Jɔn à fâ àfɨ̀rə Diotrephes 9-10

4. Jɔn à beentə Demetrius 11-12

5. Ɨ̀nnù jìi mə Jɔn à lɛ nswoŋ a nlwìꞌìsə aà 13-15

Àtsàꞌàtə̀

1 Àŋwàꞌànə̀ yû a lo aa a mbo mə̀ ǹdɨ̀ɨ̂ ǹdânwì, ŋghɛɛ nɨ a mbo ǹsûkàꞌâ ghà, Gaius yìi mə mə̀ kɔ̀ŋ tsiꞌǐ annù nɨ̂ŋkoŋə aà.

2 Nsûkàꞌâ ghà, mə tsàꞌàtə̀ Nwî mə tâ ɨ̀nnù tsɨ̀m ɨ̀ ka ŋghɛɛ ɨ sɨgɨ̀nə̀ a mbo wò tâ ò kɨ ŋka ntɨnsə; ǹloŋ mə mə̀ zi mə ǹtɨɨ̀ gho ɨ tswê ǹtɨ̀ɨ̀. 3 Mə̀ kɨ̀ nàŋsə dorɨtə a nyuꞌu a mbo bɨ̀lɨ̂m bìꞌinə̀ bî mɔꞌɔ bìi mə bɨ kɨ̀ zi nswoŋ ajàŋ yìi mə o naŋsə ntswe nɨ̂ ǹtswêntɨ̀ɨ̀ yò ɨ yoŋə̀ nɨ̀ mâŋjì Nwì yî ànnù nɨ̂ŋkôŋ a ajàŋ yìi mə o gaansə mɨtɨ̀ɨ̂ mo nyoŋə nɨ̂ ànnù nɨ̂ŋkoŋ aà. 4 Kaa annû tsu sɨ̀ ghu tswê mə mbə a ghɨrə̀ mə̀ tswe nɨ̀ nɨ̀dorə ntsyàtə̀ nìi mə mə̀ tswe nɨ nu a nyuꞌu mə bɔɔ ba yòŋə annù nɨ̂ŋkoŋə aà.

Jɔŋ à bììntə Gaius

5 Ǹsûkàꞌâ ghà, wa o naŋsə mfaꞌa nɨ̂ ǹtɨɨ̀ ghô tsɨ̀m a ajàŋ yìi mə o fàꞌa a mbo bɨ̀lɨ̂m bìꞌinə̀, ka mə bo bə aa bɨ̀gɨ̀ɨ̀ aà. 6 Àa bo bìi mə bɨ kɛꞌɛnə àkɔ̀ŋnə̀ yìi mə ò dɨ̀ꞌɨ a mbo bo aa a nsî ŋ̀ghòtə̂. A kuꞌunə mə tâ ò ghɛɛ nɨ̂ mbìì ŋ̀kwɛtə waa, mfa njoo jìi mə bo lɔ̀ɔ̀ a ŋghɛ̀ɛ nɨ̀ m̀bìì nɨ̂ àkòrə̀ nɨtəə̀ yaa a nɨ mânjì yìi mə à kùꞌùnə a mûm àfàꞌà Nwì aà. 7 Ǹloŋ mə bɨ ghɛ̀ɛ̀ a nɨghaa mà nû aa a nloŋ ɨkum Kristo, kaa waꞌà bii mə mbə bo kwɛrə ayoò tsu a mbo bɨ̀tɨ̀biì Nwî. 8 Maa ajàŋ, a kuꞌùnə̀ mə tâ bìꞌinə̀ ka ŋkwɛtə ɨjàŋ bə̂ ma bû tǎ kɨɨ bə bə̂ bî mɔꞌɔ a tɨtɨ̀ɨ bo ma mùu mûm àfàꞌa annù nɨ̂ŋkoŋ aà.

Diotrephes bo Demetrius

9 Mə̀ ŋwàꞌànə̀ mə annù yî mɔꞌɔ a mbô ŋ̀ghòtə̂; lâ Dotrephes, yìi mə a kɔ̀ŋə̀ aa tsìꞌì ŋ̀ka ntəə a mbìì, ǹlɔɔ naa mə bɨ̀ ka ŋkwɛrə aa tsiꞌì a mbo yu aa, a tsaꞌa annù yìi mə mə̀ ŋwàꞌànə aà. 10 Ma mùu ajàŋ, nòò yìi mə mə̀ aa zì aa, mə̀ aa fiꞌisə ɨnnù ma jû mə a ghɨ̀rə̀ aà, ǹtswɛɛ nɨ̂ ɨ̀bǎŋnənnù ŋkɨɨ ŋghaa nɨ̂ ɨbɨ atu mə. Kaa ma juù ɨnnù mə à ghɨ̀rə̀ aa kaa ɨ waꞌà ghu mbo kùꞌù, a kɨɨ ntuu nɨ̂ ŋ̀kwɛrə bɨ̀lɨ̂m biꞌinə̀ a nda yu, ŋkɨɨ ŋkɨŋə nɨ bə̀ bìi mə bɨ lɔ̀ɔ̀ ŋ̀kwɛrə nɨ̂ waa a nda bo aa, mfiꞌisə nɨ̂ waa a mûm ŋ̀ghòtə̂.

11 Ɨ̀kàꞌâ jâ, nɨ̀ tsuu ɨnnù jî bɨ kɨ ŋèꞌèsə̀, m̀baŋnə ŋka ŋŋeꞌesə bə̂ ɨ̀nnù jî sɨgɨ̀nə̀. Ŋù yìi mə a ghɨ̀rə ɨnnù jî sɨgɨ̀nə̀ aa, à lò aa a mbo Nwì; ŋù yìi mə a ghɨ̀rə ɨbɨ aa, kaa à lɛɛ̀ ŋ̀kɨꞌɨ̀ a Nwî yə̂. 12 Lâ ŋ̀ghɛɛ nɨ ŋgaa Demetrius, bə̀ bɨ̀tsɨ̀m bɨ beentə annù yi, annù nɨ̂ŋkoŋ yìi mə a ghɨ̀rə̀ aa a kɨ̂ m̀fɛꞌɛ nlaa; bìꞌì bɨ̂mbɔŋ, bìꞌì kɨ̂ m̀beentə annû yi ǹloŋ mə nɨ̀ zi mə ànnù yìi mə bìꞌi swoŋ aa à nɨ̂ ànnù nɨ̂ŋkoŋə̀.

Àtsàꞌàtə nlwìꞌìsə̂

13 Mə̀ kɨ̀ tswe nɨ̀ ɨ̀nnù jî ghàꞌàtə̀ a ŋŋwàꞌànə a mbo wò, la kaa waꞌà kɔ̀ŋ mə mə ŋwàꞌànə nɨ̂ ŋ̀kɔ̀ŋəŋwàꞌànə̀. 14 Mə yə̀ꞌə̀tə̀ a ŋwàŋsə nzǐ yə ghô tǎ tâ sɨ̀ ghaa ɨnnù jî ghàꞌàtə̀ nɨ̂ ǹsi nɨ̀ ǹsî.

15 Tâ Nwì à bɔrɨsə ghô. Ɨ̀kàꞌâ jiꞌò tsɨ̀m ɨ tsàꞌàtə̀ noò. Kɨ ntsàꞌàtə ɨkàꞌâ jiꞌò tsɨ̀m fyaa yî mɔ̀ꞌɔ yî mɔ̀ꞌɔ̂.