3
यीशु मूसा ते महान्
1 तो ओ साथी विश्वासियो! तुसे जो स्वर्गिय बुलाहटा रे इस्सेदार ए, तेस प्रेरित और प्रदान पुरोईत यीशुए पाँदे, जेसखे आसे अंगीकार करूँए, त्यान करो।
2 यीशु आपणे नियुक्त करने वाल़े परमेशरो खे विश्वासो जोगा था, जेड़ा मूसा बी परमेशरो रे सारे कअरो रे था।
3 पर यीशु मूसे ते इतणे बढ़ी की महिमा जोगे समजे, जितणा कि कअर बनाणे वाल़ा कअरो ते बढ़ी की आदर राखोआ।
4 कऊँकि हर एक कअरो खे कोई ना कोई बनाणे वाल़ा ओआ, पर जिने सब कुछ बणाई राखेया से परमेशर ए।
5 मूसा तो परमेशरो रे सारे कअरे सेवको जेड़ा विश्वासो जोगा रया, ताकि जो गल्ला ऊणे वाल़िया थिया, तिना री गवाई देओ।
6 पर मसीह पुत्रो जेड़ा परमेशरो रे कअरो रा अक्कदार ए और तेसरा कअर आसे ए, जे आसे आपणी इम्मता साथे और आपणी उम्मीदा रे विश्वास बणाई की राखूँए तो आसे ई तेसरा कराना ए।
अविश्वासो रे प्रति चेतावणी
7 तो जेड़ा पवित्र आत्मा बोलोआ,
“जे आज तुसे परमेशरो रा शब्द सुणो,
8 तो तिजी खे मानणे ते ना नि करो,
जेड़ा कि रोष दलाणे रे बखते
और परीक्षा रे दिने सुणसाण जगा रे कित्तेया था।
9 जेती तुसा रे बाप-दादे आऊँ परखेया
और चाल़ी साल तक मेरे काम देखे।
10 इजी बजअ ते आऊँ तेस बखतो रे लोका ते नराज रया
और बोलेया, ‘इना रे मन सदा पटकदे रओए,
और इने मेरिया बाटा नि पछयाणिया।’
11 तेबे मैं रोषो रे आयी की कसम खाई,
‘सेयो मेरे आरामो रे आई नि सकदे।’ ”
12 ओ साथी विश्वासियो, चौकस रओ कि तुसा रे एड़ा बुरा मन और अविश्वासिया रा मन नि ओ, जो जिऊँदे परमेशरो ते दूर टाई की लयी जाओ।
13 हर दिन एकी-दूजे खे समजयांदे रओ; जदुओ तक तुसा गे मौका ए, एड़ा नि ओ कि तुसा बीचा ते कोई जणा पापो रे छल़ो रे आयी की जठर ऊई जाओ।
14 जे आसे आपणे पईले परोसे रे आखरी तक मजबूतिया दे बणे रे रये तो आसे मसीह रे इस्सेदार बणे रे रणे।
15 जेड़ा पवित्र शास्त्रो रे बोलेया जाओआ,
“जे आज तुसे तेसरा शब्द सुणो,
तो आपणे मनो खे जठर नि करो,
जेड़ा कि रोष दलाणे रे बखते कित्तेया था।”
16 पला किने लोके परमेशरो रा शब्द सुणी की तिना रा बरोद कित्तेया? क्या सेयो इस्राएली लोक नि जो मूसे रे जरिए मिस्रो ते निकल़े थे?
17 और से चाल़ी साल तक केस ते नराज रया? क्या तिना तेई नि, जिने पाप कित्तेया और तिना रिया लोथा सुणसाण जगा रेई पड़ी रिया रईया?
18 तिने किना लोका रे बारे रे कसम खाई की बोलेया था कि तुसे मेरे आरामो रे आई नि सकदे? क्या ये सिर्फ सेयो ई लोक नि थे जिने आज्ञा नि मानी थी?
19 ईंयां आसे देखूँए कि सेयो अविश्वासो री बजअ ते आरामो री जगा रे आई नि सके।