रोमियों
रोम देशो रे विश्वासी मण्डल़िया खे चिट्ठी
भूमिका
रोमियों रे नाओं पौलुस प्रेरितों री चिट्ठिया रा मकसद था रोमो रे बणी री मण्डल़िया री खातर बाट त्यार करना, जेतेरी योजना पौलुसे बणाई थी। तेसरी योजना थी कि थोड़े बखतो तक से तेथो रे मसीहिया बीचे काम करो, तेबे तिना री मतादा ते स्पेनो तक जाओ। मसीही विश्वासो रे आपणे ज्ञान और मसीह री जिन्दगिया रे एसरे व्यावहारिक गल्ला खे समजयाणे रिया तंईं पौलुसे ये चिट्ठी लिखी। एते कताबा रे आसा खे पौलुसो रे संदेशो रा सबी ते पूरा खुलासा मिलोआ।
रोमो री मण्डल़िया रा आदर-सत्कार करने और तिना रिया खातर आपणी प्रार्थना रे बारे रे बताणे ते बाद, पौलुस एते चिट्ठिया रे मूल़ विषय रा वर्णन करोआ “कऊँकि तिदे (सुसमाचारो रे) परमेशरो री धार्मिकता विश्वासो ते और विश्वासो री खातर प्रगट ओई” 1:17।
पौलुस आगे एस मूल़ विषय खे विस्तारो रे समजयाओआ। सारी मानव जाति, यहूदी और दूजी जाति दूँईं खेई परमेशरो साथे मेल-मलाप करने री जरूरत ए, कऊँकि सारे समान रूपो ते पापो रे अक्को रे ए। यीशु मसीह पाँदे विश्वास करने रे जरिए ई लोका रा परमेशरो साथे मेल-मलाप ओआ। तेबे पौलुस मसीह साथे नयी जिन्दगिया रा वर्णन करोआ, जो परमेशरो साथे एस नये रिश्ते रा नतीजा ओआ। विश्वासिये रा परमेशरो साथे मेल-मलाप ओआ और परमेशरो रा पवित्र आत्मा पाप और मौता रे अक्को ते तेसखे आजाद करी देओआ। पाठ 5-8 रे पौलुस विश्वासिया री जिन्दगिया रे परमेशरो रे बिधानो रा मकसद और परमेशरो री पवित्र आत्मा री सामर्था पाँदे बी बिचार करोआ। तेबे प्रेरित एस सवालो ते चूजदा रओआ कि सारी मानव जातिया री खातर परमेशरो री योजना रे यहूदी और दूजी जाति किंयाँ खरी-खरी बैठोई। से एते निचोड़ो रे पऊँछोआ कि यहूदिया रे जरिए यीशुए खे ना मानणा बी परमेशरो री तेसा योजना रा एक पाअग ए, जो सारी मानव जातिया खे यीशु मसीह रे परमेशरो री कृपा रे दायरे रे ल्याऊणे रिया खातर बणाई राखी और तेसरा विश्वास ए कि यहूदिया सदा तेसखे ना नि करदे रणा। अंतो रे पौलुस लिखोआ कि मसीही जीवन किंयाँ जिऊणा चाईयो, खास करी की ओरी साथे प्यारो रा रिश्ता राखदे ऊए। से इना विषय-चीजा खे परमेशरो री सेवा, राज्य और एकी-दूजे रिया तंईं मसीहिया रा फर्ज और विवेको रे सवाला रे रूपो रे लओआ। से चिट्ठिया रा समापन (लिखणा बन्द करना) आपणे संदेश और परमेशरो री स्तुतिया साथे करोआ।
रूप-रेखा
भूमिका और मूल़ विषय 1:1-17
मांणूआ रे उद्धारो री जरूरत 1:18-3:20
उद्धारो री परमेशरो री बाट 3:21-4:25
मसीह रे नया जीवन 5:1-8:39
परमेशरो री योजना रे इस्राएल 9:1-11:36
मसीही चाल-चलण 12:1-15:13
निचोड़ और व्यक्तिगत आदर-सत्कार 15:14-16:27
1
अभिवादन
1 आँऊ पौलुस एसा चिट्ठिया खे लिखणे लगी रा जो यीशु मसीह रा दास ए। परमेशरे आँऊ प्रेरित ऊणे खे चुणी राखेया। तिने आँऊ सुसमाचारो रा प्रचार करने खे लग करी राखेया।
2 परमेशरे पईले तेई आपणे भविष्यबक्ताओं रे जरिए पवित्र शास्त्रो रे एस सुसमाचारो री प्रतिज्ञा कित्ती थी।
3 ये सुसमाचार आपणे पुत्र आसा रे प्रभु यीशु मसीह रे बारे रे था। से शरीरो रे मुताबिक तो राजा दाऊदो रे वंशो ते जम्मेया,
4 और पवित्र आत्मा री सामर्था ते से मरे रेया बीचा ते जिऊँदा ऊआ। इजी ते ये साबित ऊआ कि से परमेशरो रा पुत्र ए और सेई यीशु मसीह आसा रा प्रभु ए।
5 यीशु मसीह रे जरिए माखे कृपा और प्रेरिताईया रा काम मिलेया, ताकि तेसरे नाओं री बजअ ते सब जातिया रे लोक सुसमाचारो पाँदे विश्वास करो और तेसरी आज्ञा मानो।
6 जिना बीचा ते तुसे बी ओ, जिना खे परमेशरे प्रभु यीशु मसीह रे लोक ऊणे खे बुलाई राखेया।
7 आँऊ ये चिट्ठी तुसा सबी लोका खे लिखणे लगी रा जो रोम नगरो रे परमेशरो रे प्यारे ए और आपणे पवित्र लोक ऊणे खे बुलाई राखे, आसा रे पिता परमेशर और प्रभु यीशु मसीह री तरफा ते तुसा खे कृपा और शान्ति मिलदी रओ।
धन्यवादो री प्रार्थना
8 पईले आऊँ तुसा सबी खे प्रभु यीशु मसीह रे जरिए आपणे परमेशरो रा धन्यवाद करूँआ, कऊँकि यीशु मसीह रे तुसा रे विश्वासो री चर्चा सारी दुनिया रे ऊणे लगी रिया।
9 परमेशर, जेसरी सेवा आऊँ आपणे पूरे मनो ते तेसरे पुत्रो रे सुसमाचारो रे बारे रे करूँआ, सेई मेरा गवा ए कि आऊँ आपणी प्रार्थना रे तुसा लोका खे लगातार याद करदा रऊँआ।
10 और हर रोज आपणी प्रार्थना रे बिनती करूँआ कि परमेशरो री इच्छा रे मुताबिक माखे आखरी रे तुसा लोका गे आऊणे रा मौका मिलो।
11 कऊँकि आऊँ तुसा खे मिलणे री बड़ी इच्छा करूँआ, ताकि आऊँ तुसा खे कोई आत्मिक बरदान देऊँ, जेते कि तुसे विश्वासो रे मजबूत ऊई जाओ।
12 मेरा मतलब ये कि आऊँ तुसा खे और तुसे माखे आपू बीचे एक दूजे खे विश्वासो रे मजबूत करिए। तुसे मजबूत ऊई जाणे कऊँकि तुसे जाणोए कि मैं किंयाँ विश्वास कित्तेया और आँऊ मजबूत ऊई जाणा कऊँकि आँऊ जाणूंआ ए कि तुसे किंयाँ विश्वास करोए।
13 ओ साथी विश्वासियो! आऊँ नि चांदा कि तुसे इजी ते अणजाण रओ कि मैं बार-बार तुसा गे आऊणा चाया पर एबुए तक आँऊ रोकी की राखी राखेया। आँऊ चाऊँआ कि जेड़े मैं दूजी कई जगा रे दुजिया जातिया रे मसीह रे चेले बणाए, तेड़े ई रोमो रे तुसा बीचे मसीह रे चेले बणाई सकूँ।
14 आऊँ आपणे आपू खे यूनानी पाषा बोलणे वाल़ेया रा और अन्यभाषिया रा, अक्लमंद और मूर्खा खे सुसमाचारो रा प्रचार करने खे कर्जदार ए।
15 तो तेबे आऊँ तुसा खे बी जो रोम नगरो रे रओए, सुसमाचार सुनाणे खे त्यार ए।
सुसमाचारो री सामर्थ
16 कऊँकि आऊँ मसीह रे बारे रे एस सुसमाचारो ते शर्मांदा निए। ये तिना सबी खे उद्धारो रे निमित परमेशरो री सामर्थ ए, सबी ते पईले यहूदिया खे तिजी ते बाद दूजी जातिया खे जो एस सुसमाचारो पाँदे विश्वास करोए।
17 कऊँकि सुसमाचारो रे परमेशरो री धार्मिकता विश्वासो ते और विश्वासो खे प्रगट ओई, जेड़ा पवित्र शास्त्रो रे लिखी राखेया, “विश्वासो रे जरिए तर्मी मांणू जिऊँदा रणा।”
मांणूआ री जातिया रा पाप
18 परमेशरो रा रोष तो तिना सबी री अभक्ति और पापो पाँदे जो लोक करोए स्वर्गो ते प्रगट ओआ, जो सच्चो खे पापो रे कामो ते दबाई की राखोए।
19 इजी खे परमेशरो रे बारे रे ज्ञान तिना रे मनो रे प्रगट ए, कऊँकि परमेशरे तिना पाँदे प्रगट करी राखेया।
20 परमेशरो रे अणदेखे गुण, मतलब तेसरी सनातन सामर्थ और परमेशरो री तागत दुनिया री सृष्टिया रे बखतो ते, तेसरे कामे की देखणे रे आओए। इजी खे तिना लोका गे आपणे आपू खे बचाणे खे कोई जवाब निए, “आसे परमेशरो खे नि जाणदे।”
21 कऊँकि तिने परमेशरो खे जाणदे ऊए बी परमेशरो खे परमेशरो जोगा आदर और धन्यवाद नि कित्तेया। इजी रे बदले सेयो लोक बेकारो रे सोचणे लगे, एथो तक की तिना रे मूर्ख मनो रे न्हेरा ऊईगा।
22 सेयो आपू खे अक्लमंद जताई की मूर्ख बणी गे।
23 और तिने अविनाशी महिमामय परमेशरो री आराधना छाडी की नाशवान मांणू, पंछी, जानवर और लूरने वाल़े जन्तुआ री मूर्तिया री आराधना कित्ती।
24 इजी री बजअ ते परमेशरे सेयो तिना रे शरीरो री पापमय इच्छा रे मुताबिक यौन अशुद्धता खे छाडी ते ताकि सेयो आपू बीचे बुरे कामो रे जरिए आपणे शरीरो रा अनादर करो।
25 तिने परमेशरो री सच्चाईया रे बारे रे विश्वास करने ते ना कित्ती और चूठो पाँदे विश्वास कित्तेया। तिने परमेशरो रे बजाये तिना रे जरिए बणाई री सृष्टिया री पूजा और सेवा कित्ती, जो सदा धन्य ए। आमीन्।
26 इजी री खातर परमेशरे सेयो निर्लज्ज वासनाओं रे वशो रे छाडी ते। एथो तक कि तिना री जवाणसे बी आपणा कुदरती यौन सम्बन्ध छाडी की तिजी खे जो सबाओ रे खलाफ ए, बदली ता।
27 तिंयाँ ई मर्द बी जवाणसा साथे कुदरती मेलजोल छाडी की आपू बीचे कामातुर ऊई की जल़ने लगे और मर्दे, मर्दा साथे बेशर्म काम करी की आपू पाँदे बुरे कामा री सजा रा ठीक फल पाया।
28 इजी ते बाद बी तिने ये ठीक नि समजेया कि परमेशरो रे सारे ज्ञानो खे मानो। तो परमेशरे बी सेयो सब गल़त काम करने खे तिना रे नक्कमे मनो रे वशो रे छाडी ते।
29 सेयो सबी प्रकारा रे पाप, दुष्टता, लोब, बैरभावो ते परी गे और जल़न, अत्या, चगड़े, छल और ईर्ष्या ते परी गे और चूगलखोर,
30 बदनाम करने वाल़े, परमेशरो ते करीणा करने वाल़े, ओरी रा अनादर करने वाल़े, कमण्डी, त्वाल़िया देणे वाल़े, बुरिया-बुरिया गल्ला बनाणे वाल़े, माया-बाओ रा कईणा ना मानणे वाल़े,
31 निर्बुध्दि, विश्वासघाती, दयारहित और निर्दयी ऊईगे।
32 सेयो परमेशरो री ये तर्मो री बिधि जाणोए कि एड़े-एड़े काम करने वाल़ेया खे मौता री सजा मिलणी, तेबे बी ना सिर्फ आपणे आपू ई एड़े काम करोए, बल्कि करने वाल़ेया ते बी खुश ओ ए।