18
बेबीलोनो रा टल़ना
1 इजी ते बाद मैं एक स्वर्गदूत स्वर्गो ते उतरदे ऊए देखेया। से बऊत ई सामर्थी था और तरती तेसरे तेजो ते चमकी गी।
2 तिने जोरे की आक्का पाई की बोलेया,
“टल़ी गा, बड़ा बेबीलोन टल़ी गा रा।
और से दुष्टात्मा री रणे री जगा,
हर एक अशुद्ध आत्मा रा अड्डा
और हर एक अशुद्ध
और घृणित पंछिया रा अड्डा ऊईगा।
3 कऊँकि तेसा रे व्याभिचारो रे
शराबो री बजअ ते सब जातिया टल़ी गी रिया।
तरतिया रे सामर्थी राजेया तेसा साथे
व्याभिचार करी राखेया
और तरतिया रे बपारी तेसा रे बऊत जादा
सुख-बिलासो री बजअ ते अमीर ऊई रे।”
4 तेबे मैं स्वर्गो ते केसी ओरी री आवाज सुणी,
“ओ मेरे लोको, तिजी बीचा ते निकल़ी की आओ!
कि तुसे तिजी रे पापो रे शामिल ना ओ
और तेसरी मुसीबता बीचा ते कोई बी तुसा पाँदे नि पड़ो,
5 कऊँकि तेसा रे पाप स्वर्गो तक पऊँछी गे रे
और तेसा रे बुरे काम परमेशरो खे याद आयी रे।
6 जेड़ा तिने तुसा खे देई राखेया, तेड़ा ई तेसखे बी देओ
और तेसरे कामो रे मुताबिक तेसखे दुगणा बदला देओ,
जेती कटोरे रे तिने परी ता था, तिदे ई तेसखे दुगणा परी देओ।
7 जितणी तिने आपणी तारीफ कित्ती और सुख-बिलास कित्तेया,
तिथणी तेसखे पीड़ और शोग देओ,
कऊँकि से आपणे मनो रे बोलोई,
‘आऊँ राणी ऊईगी री, बिदुआ नि
और शोगो रे कदी नि पड़ुँगी।’
8 इजी बजअ ते एक ई दिनो रे तेसा पाँदे मुसीबता आऊणियां,
मतलब मौत, शोग, अकाल़
और से आगी रे स्वा करी देणी,
कऊँकि तेसा रा न्यायी प्रभु परमेशर तागतबर ए।
9 “तरतिया रे राजा, जिने तेसा साथे व्याभिचार और सुख-बिलास कित्तेया, जेबे तेसा रे फूकणे रा तुआँ देखणा, तो तेसा खे रोणे और छाती पीटणी।
10 तेसा री पीड़ा रे डरो रे मारे दूर खड़े ऊई की बोलणा,
“ओ बड़े नगर बेबीलोन, ओ मजबूत नगर तुसा खे धिक्कार ए,
एकी कंटे बीचे ई ताखे सजा मिलीगी।
11 “तरतिया रे बपारी तेसा खे रोणे और शोग करना, कऊँकि एबे केसी बी तिना रा माल नि लणा,
12 मतलब सुईना, चाँदी, रत्न, मोती, बैंगणी, रेशमी और लाल टाले और हर प्रकारा री खुशबूदार लकड़ी, आथी दाँदो रिया हर प्रकारा रिया चीजा, किमती लकड़ी, पीतल़, लोआ और संगमरमरो रे सब प्रकारा रिया चीजा,
13 और दाल़चीनी, मसाले, तूप, इत्र, लोबान, शराब, तेल, मैदा, कणक, गाय, बल़द, पेडा, बाकरिया, कोड़े, रथ, दास और मांणूए खे खरीदणे वाल़ा कोई नि रया।
14 “बपारिए तेसा खे बोलेया, ‘एबे तेरे मनचाए फल तांगा गे ते चली गे और सुख-विलास और पड़कीली चीजा तांते दूर ऊईगिया और सेयो फेर कदी नि मिलणिया।’
15 इना चीजा रे बपारी, जो तेसा रे जरिए अमीर ऊईगे थे, तेसा री पीड़ा रे डरो रे मारे दूर खड़े ऊणे और रोंदे और शोग करदे ऊए बोलणा,
16 “ताखे धिक्कार ए, धिक्कार ए, से बड़ा नगर,
जो मलमल, बैंगणी और लाल टाले पईनी की था
और सुईना, रत्न और मोतियो साथे सजेया रा था,
17 थोड़े बखतो रेई तिजी रा एड़ा पारी धन नाश ऊईगा।
“हर एक मांझी, जलयात्री, मल्लाह और जितणे समुद्रो ते कमाओ थे, सब दूर खड़े ऊईगे।
18 और तेसा रे फूखणे रा तुआँ देखदे ऊए आक्का पाई की बोलणा, ‘कुण जा नगर, एस बड़े नगरो जेड़ा ए?’
19 तिना आपणे-आपणे सिरो पाँदे तूड़ पाणी और रोंदे और शोग करदे ऊए चींगी-चींगी की बोलणा,
“धिक्कार ए, धिक्कार ए, ये बड़ा नगर
जेतेरी जायदाता रे जरिए समुद्रो रे
सब जाह्ज वाल़े अमीर ऊईगे थे,
थोड़े बखतो रेई उजड़ी गे।
20 ओ स्वर्ग और ओ परमेशरो रे लोको और प्रेरितों
और भविष्यबक्तेयो, तेसा पाँदे खुशी करो,
कऊँकि परमेशरे न्याय करी की
तेसा ते तुसा रा बदला लयी राखेया।”
21 तेबे एक तागतबर स्वर्गदूते एक बड़ी चाक्किया रे पूड़ो जेड़ा एक पात्थर चकेया और ये बोली की समुद्रो रे सेटी ता,
“बड़ा नगर बेबीलोन एड़ी ई बड़ी तागता ते सेटेया जाणा
और फेर कदी तेसरा पता नि मिलणा।
22 बीणा बजाणे वाल़े, गाणे वाल़े, बंसी बजाणे वाल़े
और तुरहिया रे फूकर बाणे वाल़ेया री
आवाज फेर कदी तांदे नि सुणनी
और केसी कामो रा कारीगर बी
फेर कदी तांदे नि मिलणा
और चाक्किया रे चलणे री आवाज
फेर कदी तांदे सुणनी नि।
23 दिऊएया रा प्रयासा फेर कदी तांदे नि चमकणा
और लाड़े-लाड़िया री आवाज फेर कदी तांदे सुणनी नि,
कऊँकि तेरे बपारी तरतिया रे प्रदान थे
और तेरे जादू-टोणे ते सारी जातिया भरमाईया थिया।
24 भविष्यबक्ता, परमेशरो रे लोक
और तरतिया रे सब काये रे रा खून तिदे ई मिलेया।”