मत्ती के जरिये लिख्या गया सुसमाचार
जानकारी
मत्ती के जरिये लिख्या गया सुसमाचार यो सन्देस देवै सै, के यीशु मसीह ए वो उद्धारकर्ता सै, जिसके आण की भविष्यवाणी करी गई थी। परमेसवर नै पुराणे नियम हजारां साल पैहले अपणे माणसां तै करे गए करार ताहीं उस्से उद्धारकर्ता के जरिये पूरा करया। यो सन्देस सिर्फ यहूदी माणसां खात्तर ए कोनी, जिन म्ह यीशु पैदा होया अर पाळा-पोस्या गया, पर सारी दुनिया खात्तर सै।
वर्णन सै। इसकै बाद इस सुसमाचार म्ह यीशु की गलील परदेस तै यरुशलेम नगर तक का सफर अर यीशु मसीह की जिन्दगी के आखरी हफ्तै का वर्णन सै, जिस म्ह उसका क्रूस पै चढ़ाया जाणा अर दुबारा जिन्दा हो जाणा सै।
इस सुसमाचार म्ह यीशु मसीह ताहीं एक महान गुरु के रूप म्ह पेश करया गया सै। उस ताहीं परमेसवर के नियम-कायदा ताहीं व्याख्या करण का हक सै अर वो परमेसवर के राज्य की शिक्षा देवै सै। उसकी शिक्षा ताहीं पाँच भाग्गां म्ह बाट्या जा सकै सै: (1) पहाड़ी उपदेश, जो सुर्ग के नागरिकां के चरित्र, फर्ज, खास अधिकार, अर आखरी उम्मीद तै सै (पाठ 5-7); (2) बारहा चेल्यां ताहीं सेवकाई करण की शिक्षा देणा (पाठ 10); (3) सुर्ग के राज्य तै सम्बन्धित उदाहरण (पाठ 13); चेल्यां तै सम्बन्धित शिक्षाएँ (पाठ 18); (5) सुर्ग राज्य के आगमन अर आण आळे युग तै सम्बन्धित शिक्षाएँ (पाठ 24-25)
रूप-रेखा
पीढ़ी अर यीशु मसीह का जन्म 1:1-2:23
यूहन्ना बपतिस्मा देण आळा के सेवा के काम 3:1-12
यीशु का बपतिस्मा अर उसका इम्तिहान 3:13-4:11
गलील परदेस म्ह यीशु के जरिये माणसां की सेवा 4:12-18:25
गलील परदेस तै यरुशलेम नगर तक सफर 19:1-20:34
यरुशलेम नगर म्ह आखरी हफ्ता 21:1-27:66
प्रभु यीशु का दुबारा जिन्दा हो जाणा अर उसका दिखाई देणा 28:1-20
1
यीशु की पीढ़ी
(लूका 3:23-38)
1 ये यीशु मसीह के पूर्वजां के नाम सै। वो राजा दाऊद का वंशज था, अर राजा दाऊद अब्राहम का वंशज था।
2 अब्राहम का बेट्टा इसहाक था, अर इसहाक का बेट्टा याकूब था, फेर याकूब तै यहूदा अर उसके भाईयाँ का जन्म होया।
3 यहूदा के बेट्टे फिरिस अर जोरह थे। (फिरिस अर जोरह की माँ का नाम तामार था।) फिरिस का बेट्टा हिस्रोन था। हिस्रोन का बेट्टा एराम था,
4 एराम का बेट्टा अम्मीनादाब था। अम्मीनादाब तै नहशोन, अर नहशोन तै सलमोन का जन्म होया,
5 सलमोन का बेट्टा बोआज था। (बोआज की माँ का नाम राहाब था।) बोआज अर रुत तै ओबेद का जन्म होया, अर ओबेद का बेट्टा यिशै था।
6 अर यिशै का बेट्टा राजा दाऊद था। (राजा सुलैमान दाऊद का बेट्टा था।) जो उस बिरबान्नी तै जन्मा था जो पैहले उरिय्याह की घरआळी थी,
7 सुलैमान का बेट्टा रहबाम था। अर रहबाम का बेट्टा अबिय्याह था। अर अबिय्याह तै आसा का जन्म होया।
8 आसा का बेट्टा यहोशाफात था। फेर यहोशाफात तै योराम अर योराम तै उज्जियाह का जन्म होया।
9 उज्जियाह का बेट्टा योताम था अर योताम, आहाज का। फेर आहाज तै हिजकिय्याह का जन्म होया।
10 हिजकिय्याह तै मनश्शिह का जन्म होया। मनश्शिह का बेट्टा आमोन था, अर आमोन तै योशिय्याह का जन्म होया।।
11 फेर इस्राएल के माणसां नै कैदी बणाकै बेबीलोन देश ले जाण के बखत योशिय्याह तै यकुन्याह, अर उसके भाईयाँ का जन्म होया।
12 बेबीलोन देश म्ह पोहचाये जाये पाच्छै यकुन्याह तै शालतियेल का जन्म होया, फेर शालतियेल तै जरुब्बाबिल का जन्म होया।
13 जरुब्बाबिल तै अबीहूद का जन्म होया, अबीहूद तै एलयाकीम का अर एलयाकीम तै अजोर का जन्म होया।
14 अजोर का बेट्टा सदोक था। सदोक तै अखीम अर अखीम तै इलीहूद का जन्म होया।
15 इलीहूद का बेट्टा इलियाजार था। अर इलियाजार मत्तान का। मत्तान का बेट्टा याकूब था।
16 अर याकूब तै यूसुफ का जन्म होया, जो मरियम का धणी था। अर मरियम तै यीशु जो मसीह कुह्वावै सै, पैदा होया।
17 इस तरियां अब्राहम तै दाऊद तक चौदहा पीढ़ी होई, अर दाऊद तै लेकै इस्राएलियाँ नै कैदी बणाकै बेबीलोन देश भेज्जे जाण तक चौदहा पीढ़ी, अर इस्राएलियाँ कैदी बणाकै बेबीलोन देश म्ह भेज्जे जाण कै बखत तै मसीह तक चौदहा पीढ़ी और होई।
मसीह का जन्म
18 यीशु मसीह का जन्म इस तरियां होया, कै जिब उसकी माँ मरियम की सगाई यूसुफ कै गैल होग्यी, तो उनका ब्याह होण तै पैहल्याए बेरा पाट्या के वा पवित्र आत्मा की शक्ति तै गर्भवती सै।
19 पर उसका धणी यूसुफ जो एक धर्मी माणस था, उसनै बदनाम न्ही करणा चाहवै था, इस खात्तर उस ताहीं चुपके तै छोड़ण का विचार करया।
20 जिब वो इन बात्तां नै सोच्चै ए था तो परमेसवर का सुर्गदूत उसनै सपनै म्ह आकै कहण लाग्या, “हे यूसुफ! दाऊद के वंशज, तू अपणी घरआळी मरियम नै अपणे उरै ल्याण तै ना डरै, क्यूँके जो उसकी कोख म्ह सै, वो पवित्र आत्मा की ओड़ तै सै।
21 वो बेट्टा जाम्यैगी अर तू उसका नाम यीशु धरिये, क्यूँके वो अपणे माणसां का उनकै पापां तै उद्धार करैगा।”
22 यो सारा इस खात्तर होया के जो वचन प्रभु नै यशायाह नबी कै जरिये कह्या था, वो पूरा हो
23 देक्खो एक कुँवारी गर्भवती होगी अर एक छोरा जण्येगी, अर उसका नाम इम्मानुएल धरया जावैगा, जिसका मतलब सै “परमेसवर म्हारै गैल सै।”
24 फेर यूसुफ नींद तै जाग कै परमेसवर कै सुर्गदूत के हुकम कै मुताबिक मरियम नै अपणी घरआळी बणाकै अपणे याड़ै ले आया।
25 अर जिब ताहीं उसनै छोरा ना जण्या जिब तक यूसुफ उसकै धोरै न्ही गया अर उसनै बाळक का नाम यीशु धरया।