24
Iesu mi karigesisina awa, oro kotopu bajina sitedo duraina.
(Mark 13:1-2; Luke 21:5-6)
1 Ango edo Iesu Jew embomaida oro kotopu bajinada edo idegedo maunteiri ainda ambodani gundo ami oro kotopu ainda oro kariwa neide kainde garate sitera.
2 Ata Iesu mi awamanede sisina, “Imomane rorae berari eiwa gotevi? Eiwa awa gebé imondemane tena, oro kotopuda oro neide kaindeda ganuma berari einda dedo sitedo agaugaro wotara.”
3 Edo Iesu Olive de Pejida anumbedo isiri, ambodani akuta ainda yai gundo sitera, “Nakare teyo gore! Oro kotopu bajina sitedo durari teteta awa, ijibé nonde idegaini? Edo ito gumbari ae iji beao ari deda kariwa ro idegaini?”
Memesi bouga bajinada iji awa engo gumaina.
(Mark 13:5-23; Luke 21:5-24)
4-5 Edo Iesu mi awamanede mina sisina, “Embo jiwae nato daoda gundo site ‘Na awa Keriso,’ edo embomai jiwae udumbara, awatedo imomane akuta goteite iwo. Embo neimi imomane udumainyae.
6 Edo imomane itoro jiwae idegedo era ainda bino edo itoro nenei idegae etera ainda bino awa ingawa, ata ge awa ingido do buriya eove. Roviravi berari eiwa idegaina, ata iji beao ari awa gumbae isira.
7 Ewowo yai neneidami erido ewowo yai neneida ainde duduno ara, edo daotari neneida embobomi erido daotari neneida embobode itoro ara. Edo embo jiwaebé indari itae ari beji bebetegara, edo embo jiwaebé karu amburo bebegaebé bara, edo butu dededa, yai evekarada jijira tawaina.
8 Roviravi berari eiwa dá tuturoda eutumi mai engarida memesi babaingae budo eira ango.
9 “Edo iji ainde, itomane gitopo embobomi imomane kundo piaro memesi neide kainde bawa, edo daro betawa. Imomane awa nato ambodani, awatedo orobe babain beraridami imomane jipapa ae ara.
10 Ango edo embo jiwae awamaneda gebé ari nato yai awa dowara. Edo awamane akuta awamaneda gitopo emboda ipada mina piya ara, edo jipapa ae mina ara ara.
11 Edo peroveta pitawa jiwae idegedo embomai jiwae udumbara.
12 Aindabé embomaida wasiri bebegae ari awa bajido arapu aina, embomai jiwaeda dubo mina bara ari awa damodamo aina.
13 Ata embo ainmi ainda tumonda ari nato yai dowae matawa piaina awa, edo imo iji beao arida ango mamaina awa, God mi toregaina.
14 Edo God da gisijiarida bino dave eiwa butu dededa karigaro orobe babain yai berarida ami ge eiwa ingara. Ango edo iji beao ari gumaina.
15 “Awatedo, iji ainde ‘rorae beyaebé’ yai kotopuda kundo maundo doda piaro petedo isite, ami mengari bajinabé God da embomaida yai piari gawa. Iji matuda peroveta Daniel mi ge ango sisina.” (Imo ainmi ge eiwa ajijigeteite gido, bé kotembeyo!)
16 “Iji ainde rorae awa idegari embomai yai Judea da itera awa burigibé tumundo peji pamoda visido kaviegari borote.
17 Iji angode embo da ain ainda mando tada isira awa, dowari wotedo ainda mando doda rorae nei ro bainyae.
18 Daedo, embo da ain buroda eimango tekago egenembedo aundo ainda ombarijiari bainyae.
19-21 Edo memesi bouga bajina embomaida yai idegaina, dá tuturoda butu esisina ainda edo gundo boroko einda ango awa gisi idegae, edo tekago mana idegaina. Awatedo deguta angogode, do ari awa eutumai watoude ae aimono mamai ami beda itera ainde! Ata God da yai benunu tewo, ‘Nakare dowato bisibubura yoade ko Oena Apari Degutade adu tumundo peji pamoda vitóre.’
22 Edo God mi deguta angogo awa kapae dowari idegaina awa, embo da ain kaviegari mana baina. Ata ainda gerari embomai awaembo deguta angogo awa kapari tupo aina.
23-24 Edo keriso mane pitawa ae peroveta mane pitawa de idegedo embomai udumain tedo kariwa babain de wasiri babain de awa piara. Edo daedo God da gerari embomai udumain ara. Awatedo, edo embo da ainmi imondemane taina, ‘Giwo, Keriso eire!’ o, ‘Awa oure!’ awamane gebé ainyae.
25 Giwo! Nane roviravi awa idegae gisida awa garedo ge eiwa imondemane tetena.
26-28 “Aindabé dá piripirida parara iji vitarida datembedo maundo iji wotarida euri embomai berari gido era ango, daedo embo berarimi Embo da Mai da gumbari awa gara. Edo yai nonda betari tamo isiuri ni barupimane gundo dada utedo era dá ango, embo berarimi ainda gumbari gara. Awatedo iji ainde awamanemi imondemane tara, ‘Oure giwo! Embo awa abu damodamoda ounda isira,’ ango taro idegedo mambove; ko ‘Eire giwo! Embo awa mando do jiumbarida einda isira,’ ango taro gebé eove.
Embo da Mai gumaina.
(Mark 13:24-27; Luke 21:25-28)
29 “Edo deguta angogoda memesi bouga bajina amboda, burigibé
ijida parara kumboro aina,
edo karigada parara datembari dowaina;
dabori utuda tokedo durara,
edo God mi utuda rorae berari awa jipaina.
30 “Edo iji ainde, Embo da Mai da kariwa awa utuda idegaina, edo ewowo berari butu dededa ami mamato ara. Edo awamanemi Embo da Mai utuda poraga tamonda gorobade taogari bajinade gupeiari gara.
31 Edo ine to yavi bajina ami ainda anelamane piari maundo ainda gerari embomai butu de utu deda umbugo berarida sirigedo kundo gundo dada ara.
Iesu mi eniya ge ni dungada budo atopaposisina.
(Mark 13:28-31; Luke 21:29-33)
32 “Edo eniya ge ni dungada atopatari awa kotembewo! Iji ainde ainda yanda teteka dadain jivedo eira, imomane gari budo ewa, tuvira iji awa aikae.
33 Imomane daedo iji ainde rorae berari eiwa idegari gawa awa giwo! Ainda gumbari iji awa aikae, manguro beda.
34 Eiwa awa gebé imondemane tena, embomai iji einda itera awa betae gisida isiaro jirari, rorae eiwa berari idegaina.
35 Rorae berari utuda edo butuda awa mandedo itae aina. Ata ge nato awa mana mandedo itae aina.
Iesu mi Noah da ijideda kariwa ge budo atopaposisina.
(Mark 13:32-37; Luke 21:34-36)
36 “Ata embo da ainmi ainda gumbari deguta edo ora awa gae. Edo daedo anelamane utuda awa gae. Ata nato Mamo akuta awa gari.
37 Ata dá Noah da ijide wasiri ro embomi edo esitera ango, awamanemi daedo ango eiaro iji ainde Embo da Mai gumaina.
38 Aindabé deguta angogode un dauma gumbae gisida, embomai dá ango indari indeite, un indeite, iu aro jipero, edo deguta awa gumbiri Noah un ma akida totorisina.
39 Edo awamane ro idegaini awa gae itero un dauma gundo awamane berari pasiri un injido bebetegesitera. Daedo ango eiaro iji ainde Embo da Mai gumaina.
40 Edo embo tote (2) indari buroda eiaro God mi embo da (1) budo nei dowaina.
41 Edo eutu tote (2) wheat ganumami mundeiaro God mi eutu da (1) budo nei dowaina.
42 “Aindabé ora nonde itomane Badari gumaini awa imomane gae, simageteite isiwo.
43 Ata eiwa giwo. Edo mando tutumi beono embo ora nonde gumaini awa gisi gari, ainda mandoda simagari dowainyae, edo beono embomi bededo torari tao ae.
44 Edo Embo da Mai da gumbari awa dá ango, aindabé ora nonde imomane kotembae eiawo embo awa gumain eira. Awatedo imomane daedo siya ewo.”
Iesu mi eniya ge buro embo tote (2)da budo atopaposisina.
(Luke 12:41-48)
45 Edo Iesu mi sisina, “Buro embo ain gebémi edo dubogarimi buro dave edo eiri? Embo awa ainda badarimi gisijiarida dero avigaina. Ango ari buro embo ami badarida mando sima eite buro embo neneida indari iji tegabéda awamaneda yai piedo aina.
46 Edo dubodave awa buro embo ainmi buro ango eiari ainda badari tekago overegedo gundo gaina.
47 Eiwa awa gebé imondemane tena, badarimi buro embo awa avigari ainda gunaguguye berari awa sima aina.
48 Awarata, edo buro embo awa beyae, ami imo akuta taina, ‘Nato badari iji ribori ounda isite boraebé tekago gumainyae. Awatedo na buro ro ana embo awa gari tao ae.’
49 Ango tedo imo tuturo edo ainda buro otatawo dedo gaiedo aina. Edo imo un okain jiwae injido dutari embobode daedo indari de un de injido kundo aina.
50 Edo ango eiari, ainda badari tekago overegedo gumaina deguta imo gae ko ora ainde awa imo kotembae.
51 Ango edo badarimi embo awa dedo kupo tote (2)de butedo piari maundo embomai iwawa tote (2)de daedo yai beyae ainda ji site edo ji vegeite itara.