21
1 Yangeko, em Sunbin-Got em am yol ka kakabe ding dim bakate, Yesus e mali on kisol so kawtiw ilo yetemete: I tum win de teleko, tum win dukukabiliw tem ka kel duku kebiliwi, e yetemse kale.
2 Yetemeko, kaem ding dim bakate, um banim waneng kalun mak u feni kom alew mak de teleko, tum win dukukabiliw tem ka kel dukusu kale.
3 Dukului, Yesus e bokolomele: “Feinka! Um banim waneng kalun bu tum win gelgel kuw dukulu kate, u tum win fian dukuliw em so kawtiw biilo atin kuw bakiyemu te.
4 Nimtew angom? Em so kawtiw bi on kisol banso aluweko, beem anung kuw kuse, kabalak daliw kate, um banim waneng kalun bu mesesem banimeko, ukalem tum win fong gel be alikum kuse kabalak dalu kasike.”, yangse kale.
Kawin Dim Kaleem Kaneloke em Weng te.
5 Beli, mali kawtiw mak bokolomeliw: “Am gemin kunum i Sunbin-Got em am yol aneng kale tum ati so ati so geleweko, kawtiw im Sunbin-Got elo sak dulewsiliw eisneng be so kait atite kolewsiliw kai!”, angsiliw kale.
6 Angsiliw ding dim bakate, Yesus e bokolomele: “Alik alik yu kilele kililoliwka! Deiw mak ding mak kelei, maka mak teleko, atite eisneng alik alik be tum ati so mak em tikin dim, mak em tikin dim banimeko, alik alik dakaleko, mit da kolewokoliw te.”, yangse kale.
7 Yangei, ka biliw kawtiw bi elo dakalalomeliw: “Kukuyemin kunum kutaka! Nalem ding ete eisneng be keloke ye? Nomin eisneng ete nu atemeko, beem dim elote kal keluwete: ‘Kaneloke eisneng be kame keloke kai!’, angokoluw a? Ku nulo bokoyema!”, dangsiliw kale.
8 Dangiwi, Yesus e ilo yan weng mak bokoyemomele:
“Wee yutaka! Yu kilelbiko, boliwka! Mali dasuw kunum banso mak teleko, nem wiin dim yulo dasuw weng bokoyemomeliw: ‘Num ding fenbiliw kunum nute te!’, yangokoliw te. Yangeko, mali kawtiw mak ikati teleko, yulo bokoyemomeliw: ‘Kame kuw Yesus em tolomin ding mewso kele kai!’, yangokoliw kate, yu kanelom im weng be kililokoliw te!
9 Beemdiw, yu kililiwete: ‘Aneng fian mali mak aneng fian mali mak iso ganen ganbiliw kai!’, angeko, yulo bokoyemiwi, yu kililokoliw kate, yu kanelom finganemokoliw te! Nimtew angom? Kanele eisneng be emisik keloke kate, fefe ding e ibik ete kuw keloke te.
10 Aneng kukum kasel mak isik uneko, aneng kukum kasel mali mak iso ganen unokoliw te. Beemdiw, kukum kasel im kamok mak isik uneko, kukum kasel mali im kamok iso ganen unokoliw te.
11 Keko beli, kawin kalakati bim fian fi atuk atuk keloke te. Kesomi, aneng aneng mali mak olfut fian kelei, aneng aneng mali mak wakamin fian mak keloke te. Kelei, abiil elote finganin fian kitil so eisneng mali mak akati keyemei, yukal atemeko, yol angeko, ‘Kale nomin eisneng yake?’, ange ange kelokoliw te.
12 Kate, kaneloke eisneng alik alik beem telinba keloke ding dim kabalak e, mali kawtiw mak teleko, nelo ‘Fein!’, nangbiliw kunum waneng yulo yauleko, yulo wa kukuw keyemeko, num wensankabiliw am dim so, sok am tem so, kalo yemde uneko, yulo emisik kamok fian so, yetebin kunum iso, alik alik im kiin dim mo koyemokoliw te.
13 Mo koyemokoliw kasike, yu yukalem fein ibolow beem sang be alik alik biilo kilele kukuyem kemokoliw te.
14 Kaneko kasike, yu kanelom ibolow tiaktiak kebomi, ‘Nu nono yan weng mak bokoyemokoluw a?’, angokoliw te!
15 Yom yangokoliw weng be nakalem ete yom bontem dim dukulii, yu kilele kal kelokoliw kasike, maka kawtiw bi ki keko, yom weng be nam mit da koyemokoliw te.
16 Beem ding dim bakate, yukalem kauk kumel o, kalew kumel o, kawkunum kumel o, yukalem kaim atuk o, ken kawkunum o, alik alik bi yulo maka im teing dim da koyemokoliw kasike, i yulo yeniwi, mali mak yu fein kuanokoliw te.
17 Yom nelo ‘Fein!’, nangbiliw beem mongom ete i yulo ibolow kaim alel kuw keyemokoliw te.
18 Kate yu nem weng kale kiliko, ibolow fukunemoliwka! Yukalem kak kon makmak be nam sak kuw kuminoke te.
19 Yu kitil keko, maka im awan nam dubuluw angiw tewe, yu sunsun finik so bin be fein kulokoliw te.
20 Deiw mak ding mak, ganbin kunum banban mak im Selusalem abiw mutuk fian be ow falal kelewokoliw ding dim kabalak e, yu ilo yetemeko, kal keliwete: ‘Kame, Selusalem abiw mutuk fian beem kuiaw banimoke ding dim e mewso kele kai!’, angoliwka!
21 Beem ding dim bakate, mali kawtiw i Sudia aneng fian ka biliw kawtiw i fon uneko, amgu tikin dim elo unoliwka! Beemdiw, mali Selusalem abiw mutuk fian ka biliw kawtiw i abiw mutuk fian ka koleweko, kut aneng elo fon unoliwka! Kut aneng aneng biliw kawtiw i kanelom Selusalem abiw mutuk fian kawtem elo unokoliw te!
22 Nimtew angom? Beem ding dim bakate, Sunbin-Got em sua kel fut tem kel boko, yangse weng be fein dem gilaloke kasike. Feinka! E Selusalem abiw mutuk fian kasel biim ibolow sili sili nam beem yan wa be fein duyemoke te.
23 Duyemoke ding dim bakate, Sunbin-Got e ka biliw kawtiw ilo kaisuw fian keyemeko, aneng kale ilum fian kuw dukuloke kasike, aul kumun so waneng so, aul beliw non yemgibiliw waneng iso, waneng alik alik bi ki keko, fongate akate nam foniw kasike, i kal ilum fian mak kulokoliw te.
24 Kulusomeliwi, maka i on balam so teleko, mali ka biliw kawtiw mak ilo yeneko, mali ilo nanew aneng nanew aneng kalo yamde unokoliw te. Yamde uneko, Selusalem abiw mutuk fian kasel biilo yet sansan keyemokoliw te. Keyemiwi, tiak ding mak Isalael im ibik biliw kawtiw i ka kel bokoliw kate, deiw mak ding mak kabalak e, Sunbin-Got e ding beem awet kelewoke te.
25 Beli, beem ding dim kabalak be, kawtiw i ataan o, kayow o, fial o, alik alik biim dim e mesesem fian mak atemeko, beem dulum elo ibolow tiaktiak kelokoliw te. Keko, kawin dim kaleem kawtiw bi okmun fian em guigui kiman atew fokolu anung anung kemoke be kiliko, finganin fian mak kulusomi, ‘Kak nu kuanokoluw kai!’, angeko, fukunokoliw te.
26 Kaem ding dim bakate, abiil katem em kitil keko, mesesem aluwbe eisneng be beit keko, fi atuk atuk keloke kasike, kawtiw i ‘Nono eisneng ete, kawin kale toloke yake!’, angeko, finganin fian mak kebomi, mali kawtiw mak kuanomin kis kelokoliw te.
27 Keloke ding dim bakate, Kawtiw Aul ne auk so kitil kamok fian keko, yukam dim moko, abiil katem elote telii, yu nelo netemokoliw te.
28 Kaneloke eisneng alik alik beem kelomin keloke ding dim kabalak e, yu kalaing kuw keko, gatak daok angeko, kilele kal keliwete: ‘Sunbin-Got em yulo atin kuw dokoyemin ding dim kabalak e, kame mewso kele kai!’, angoliwka!”, yangse kale.
Yesus em Tolomin em Fakam Weng te.
29-30 Yangeko, kiskiw weng mak bokoyemomele:
“Seil em gilalomin ding dim kabalak e, awon bolokbolok gaanoke kasike, yu kal keliwete: ‘Kame seil gilalomin ding keme kai!’, angenkabiliw te.
31 Beemdiw, kaneloke finganin fian eisneng be keloke ding dim kabalak e, yukal kal keliwete: ‘Sunbin-Got em gawman ding dim e kame mewso kuw kele kai!’, angoliwka!
32 Feinka! Kaneloke ding dim beem finik so biliw kawtiw i kuaninba kun so kal so biliw akate, kaneloke eisneng be alik alik fein keloke te.
33 Yu kilele kililoliwka! Abiil so kawin so be banimoke kate, nem yangi weng kale, nam banime te. Fein sunsun kuw boke te.
34 Yu kilelbiko, boliwka! Yu kanelom wain ok banban so, wanin fian so waneko, beem dulum elote mamtel kemokoliw te! Beemdiw, yu kanelom kawin kaleem mesesem mesesem eisneng beem dulum elo sakik kelomi, ibolow tiaktiak kebokoliw te! Mesik esik yu kanebiw tewe, fefe keloke ding dim be abil emdiw keko, yulo yemkatikoko, koyemoke kasike.
35 Yu kilelbiko, boliwka! Fefe keloke ding dim be kawin dim kaleem kasel alik alik biim dim toloke kasike.
36 Kate, yukalem ete Sunbin-Got elo gaaleweko, bokolewmoliw: ‘Kom kitil ete nulo duyema o!’, dangboliwka! Keko kasike, nem ‘Ilum fian keloke ding dim kaneloke kai!’, yangbi weng be fein dem gilaloke ding dim kabalak e, yu ki keko, Kawtiw Aul nem kiin dim kel sen so banim mololiwka.”,
yangse kale.
37 Beli, aneng taw kese ding dim kabalak e, Yesus e Sunbin-Got em am yol aneng ka kel bomi, ka kel biliw kawtiw ilo kukuyembise kate, aneng mili ange ding dim kabalak e, e abiw mutuk fian be iti koleweko, Oliw amgu tikin kalo akalomin unse kale.
38 Keko kasike, aneng dane ding dim kabalak e, kunum waneng banban mak teleko, Sunbin-Got em am yol aneng ka kel ‘Em weng kililuma!’, angeko, telemaliw kale.