1 यूहन्ना दी पेहली चिठ्ठी
जानकारी
यूहन्ना मसीही विश्वासियां जो ऐ दसणा चांदे है कि जालू असां परमेश्वरे जो साड़े पापां दे बारे च दसगे, तां परमेश्वरे सांझो माफ करी देणा। (1-9) भरोसे दी सच्ची परिक्षा इक-दुज्जे तांई प्यार (अध्याय 3:11-24) है। क्योंकि परमेश्वर प्रेम है, उदे लोकां जो उदे सांई होणा चाईदा (अध्याय 4:1-21)। पाप पर पूरी जित तांई, सांझो ना सिर्फ दुजयां ला प्रेम करणा चाईदा, बल्कि सांझो ऐ भरोसा करणा चाईदा कि यीशु, परमेश्वरे दा पुत्र, असल च मसीह है, कने ऐ कि साड़े तांई उदी मौत असल थी (अध्याय 5:1-12)। याद रे ऐ सै शब्द है जड़ा जिन्दगी दिंदा है सै शुरू ला था, कने ऐ सै है जिदे बारे च साड़े संदेश न। (अध्याय 1:1)
रूप रेखा
सै शब्द जड़ा जिन्दगी दिंदा है 1:1-4
परमेश्वर लौ है कने मसीह साड़ा उदाहरण है 1:5-2:6
नोआ हुकम 2:7-17
मसीह कने परमेश्वरे दे बचयां दे दुश्मन 2:18-3:10
परमेश्वरे दा प्यार कने साड़ा प्यार 3:11-4:21
दुनिया पर जीत 5:1-21
1
जिन्दगी दा बचन
1 असां तुहांजो इक माणुऐ दे बारे च लिखा दे न जड़ा जीवन दा बचन है, कने सै शुरुआत ला ही था, जिसयो असां सुणया, जिसयो असां ध्याने ने अपणी हखी ने दिखया कने हथां ने छुता।
2 ऐ माणु जड़ा जिन्दगी दिंदा है सै धरती पर आया है, कने असां उसयो दिखया, कने उदी गबाई दिन्दे न, कने तुहांजो हमेशा दी जिन्दगी दे बारे च दसदे न, जिसयो पिता परमेश्वरे सांझो दसया।
3 जड़ा कुछ असां यीशुऐ मसीह दे बारे च दिखया कने सुणया है, उदी गबाई तुहांजो भी दिन्दे न, इस तांई की तुहाड़ी संगती साड़े सोगी हो: कने साड़ी ऐ संगती पिता परमेश्वर सोगी, कने उदे पुत्र यीशु मसीह सोगी है।
4 कने ऐ गल्लां असां इस तांई लिखदे न, की तुहाड़ी खुशी पूरी होई जा।
ज्योति च चलणा
5 जड़ा शुभसमाचार असां यीशुऐ ला सुणया है, सै ऐ है, की परमेश्वर अच्छा है कने ज्योति सांई पबित्र है कने उदे च कोई भी बुराई नी है।
6 अगर असां बोलन, की परमेश्वरे सोगी साड़ी हिस्सेदारी है, कने असां फिरी भी बुराई करदे रेंदे न, तां असां झूठ बोलदे न कने सच्चाई ने नी जिन्दे न।
7 तुसां सै ही करा जड़ा सही है जियां परमेश्वर सिद्ध रुपे च सही है, तियां ही असां भी लौई च जी न, तां परमेश्वरे कने इक दुज्जे ने हिस्सेदारी रखदे न, कने उदे पुत्र यीशु मसीह दा खून सांझो साड़े सारयां पापां ला शुद्ध करदा है।
8 अगर असां बोलन की असां कोई पाप नी किता, तां असां अपणे आपे जो धोखा दिन्दे न, कने जड़ी सच्चाई परमेश्वर बोलदा है इस पर भरोसा नी करदे।
9 अगर असां परमेश्वरे सामणे अपणे पापां जो मन्नी लेन, तां सै साड़े पापां जो माफ करणे कने सांझो सारे अधर्म ला शुद्ध करणे च भरोसे दे काबील कने धर्मी है।
10 अगर असां बोलन की असां पाप नी किता, तां असां परमेश्वरे जो झूठा बणादे न, कने असां परमेश्वर दे बचन जो नी समझदे न कने सै जड़ा बोलदा है उदा पालन नी करदे।